أخبار الآن | القاهرة- مصر- (ندى عبد السلام)

الإصابة بسرطان الثدي ليست بالضرورة النهاية ، هذا ما اثبتته التجارب لناجيات مصريات من المرض الفتاك ، تجربة مريرة مع العلاج استمرت لسنوات يلخصنها في هذه العبارات 

زينب علي ناجية من سرطان الثدي  " عندي سرطان من 6 سنين والحمدلله اخدت جلسات الكيماوي وبعون الله خفيت وبقول لكل زوج إن مش أي ست عملت سرطان الثدي بتفقد انوثتها لاء عمر السرطان ولا عمر العملية دي ما بتاثر على انوثة الست يعني والحمدلله نحمد ربنا،  وكل ست اي حد يجيله سرطان مش هي دي نهاية العالم احنا ده مرض زي اي مرض وكل واحد بيشفى منه الحمدلله "

شادية علي  ناجية من سرطان الثدي " الحمدلله احنا قاومنا في المرض ده كتير والحمد لله أهم حاجة العزيمة عندنا مادام فينا عزيمة نقدر نقاوم اي حاجة تضرنا والحمدلله يعني اي انسان يبقى عنده المرض ده ياخده في منتهى البساطة سوية برد هيتعالج منه وهيبقى كويس واهم حاجة مادام الزوج هو واقف جنبي وساعدني في العملية والحمدلله "

مروة قاسم  ناجية من سرطان الثدي " مريت بتجربة قاسية جدا جدا مختلفة عن اي واحدة وتجربتي كانت مختلفة وكانت عمليتي كبيرة جدا وانا انسة اساسا، وانا بنصح كل واحدة انها ما تيأسشي انا كنت بموت بالبطيء بالبطيء بالبطيء حوالي 3 سنين، لكن بالايمان بالله والصبر واللي حواليا قدرت ان انا اقوم على رجلي رغم اني انا صغيرة وبعتبر انسة بس انا بنصح كل واحدة فينا انها ما تيأسشي بالصبر والايمان هتشفى، وتبص على اللي حواليها وتتفاءل وتبص لامل لبكره هتلاقي كل الناس اللي حواليها معاها وتضحك وتنبسط وميهمهاش اي حد في الدنيا طالما عندها ايمان بالله وبالصبر هتقدر انها تشفى ان شاءالله، انا اعتبر ايه لاي واحدة لان انا معجزة لاي حد ".