البودكاست الإخباري: كيف تطورت علاقتنا مع استهلاك الأخبار؟

نص الحلقة :

المقدمة:

أصدقائي الأعزاء .. في الحلقة دي من البودكاست المفضل .. هنتكلم عن الأخبار .. ازاي اتغيرت واتطورت عبر الزمن .. وهنرشحلكم أفضل حلقات وبرامج البودكاست الإخبارية .. أنا محمد علي .. وهكون معاكم في الحلقة التالتة .. من الموسم التاني.. من البودكاست المفضل .. من أخبار الآن"

في عالم مليان بالمعلومات والدوشة والأخبار الكتير طول الوقت.. والضجة المستمرة لعنواين الأخبار الرئيسية.. هتيجي لحظة هتتغير فيها سلطة الصحافة التقليدية.. من كونها هي المصدر الوحيد لنقل الأخبار لعصر جديد بتظهر فيه الصحافة الرقمية والبودكاست الاخباري إللي من خلاله كل واحد فينا بيكون عنده القدرة إنه يحكي وينقل الخبر.

بس يا ترى البودكاست الإخباري ازاي قدر يشكل الخطاب العام ويأثر ع وسائل الإعلام التقليدية؟

ف حلقة النهاردة هستكشف معاكم ازاي برامج البودكاست الاخبارية لقت لنفسها مكان في المشهد الإعلامي والصحافي النهاردة.. وازاي غيرت الصحافة الرقمية من شكل علاقتنا مع استهلاك الأخبار وهنعرف ازاي قدرت تسلط الضوء ع القصص اللي بتتجاهلها وسائل إعلام رئيسية.. أنا محمد علي ودي حلقة جديدة من الموسم التاني من "البودكاست المفضل

الحلقة:

محمد علي تاريخ الأخبار، لازم نرجع شوية بالزمن ونتكلم عن تاريخ الأخبار، تاريخ الأخبار هو رحلة طويلة بترجع جذورها لبدايات التواصل البشري، والخبر المسموع بترجع بداياته للعصور القديمة، لما كان الإنسان بيستخدم الأبواق أو صرخات أو صيحات معينة كده عشان يعلن عن حاجة، زي الحروب أو الأعياد أو مناسبات اجتماعية مختلفة، بالإضافة طبعاً لفكرة المنادي اللي كان بلف في الأسواق وأماكن التجمعات عشان يبلغ الرعية بأوامر الحاكم، وزي ما حكينا كده في الحلقة الأولى، إزاي كان بيتم تبادل الأخبار عن طريق رواية القصص الشفهية لما كانت المجتمعات بتعتمد على الكلمة المنطوقة، عشان تقدر إنه هي تنقلها من جيل لجيل، لغاية لحظة اختراع الكتابة، واللي كانت طبعاً لحظة فارقة، لأنه وقتها بقى فيه إمكانية إنه إحنا نسجل الأخبار وننشرها بطريقة منظمة أكتر، وعلى مر القرون تطورت المخطوطات المكتوبة بخط الإيد دي لصحف مطبوعة في العالم كله، وده طبعاً كان مع اختراع المطبعة على إيد الأستاذ غوتنبرغ في القرن الـ15 تقريباً، واللي بدوره بقى عمل ثورة كبيرة جداً في نشر وتوزيع الأخبار، بما إننا جبنا سيرة الطباعة فالمطبعة مثلاً وصلت مصر تقريباً مع نابليون أثناء الحملة الفرنسية، جيه وهو معاه مطبعة عشان ينشر فيها القرارات اللي هيذيعها ما بين الناس، وحتى بعد خروج الحملة الفرنسية وتولي محمد علي، مش محمد علي أنا محمد علي باشا، اللي اهتم جداً إنه هو يعني اهتم بفكرة الطباعة، اشترى مطبعة بولاق وعمل جريدة الوقائع المصرية، واللي كان الهدف منها هو نفس هدف أي نظام حاكم، تعريف المصريين بالإنجازات اللي بتعملها حكومة محمد علي باشا، طبعاً انتشار الصحف المطبوعة ما سهلش انتشار الأفكار وبس، لأ كمان لعب دور محوري في تشكيل الرأي العام وإثارة الحركات الاجتماعية والمعارضة السياسية، فمثلاً جريدة الوقائع المصرية دي كانت أول جريدة تقريباً عربية بتنشر أخبار الدولة والمقالات، ورفاعة الطهطاوي اللي بدأ فيها بقى وجع الدماغ وفكرة المقال السياسي، اللي هيتسبب بعد كده في إبعاده للسودان، بس خلونا كده يا جماعة نروح سريعاً كده للبث الإذاعي، اللي مكانته هتبدأ أنه هي تبيان أكتر في بدايات القرن العشرين، ودي يا جماعة كانت لحظة محورية تانية في تطور الأخبار، واللي بقت في متناول الجميع، يعني بشكل أكبر حتى من الصحف المطبوعة، لما كنت بحضر للحلقة دي كنت بفكر يا ترى ممكن نبدأ منين؟، لغاية لما جيه فبالي صوت الراديو القديم في بيتنا، صوت اللي فيه تشويش وخربشة ده وإحنا بنقلب في محطات مختلفة، وعند اللقطة دي قررت أنه أنا أرجع شويةا بالزمن ليه؟ لأنه أنا شايف أن تأثير الإذاعة على نشر الأخبار كان يعني تأثير عظيم جداً بشكل غير عادي، مش بس في العالم العربي لكن في جميع أنحاء العالم، وكونه الراديو يعني وسيط ده شكل وعمل تحول يعني عمل تحول كبير جداً في وسائل الإعلام المطبوعة التقليدية، طبعاً يعني عظمته كانت في أنه هو قدر إنه هو يجيب الأخبار كده مباشرةً لبيوت الناس، يعني خلى الوصول للمعلومة أكثر سهولة من أي وقت قبل كده

أصوات من الراديو القصة يا أخي الكريم، هذا الإنسان، سوف نلتقي، وذكرٌ، إسرائيلي، غزة، فلسطين، أيها الإخوة

محمد علي يا سلام الراديو، الصندوق السحري اللي تجمع حوليه الناس، الراديو ده كان واحد من أهم عوامل تشكيل الوعي عند مستمعيه، وكان شاهد على أحداث مهمة جداً جداً في التاريخ، مش بس كده لأ كمان يعني زي ما قال الإعلامي وجدي الحكيم في واحدة من مقابلاته، وهو بيوصف الراديو وأهميته عند الناس، كان في بدايه يعني بداية ظهور الراديو كان بيقول أنه البيوت المصرية كانت بتقدر الراديو، وكانت بتحطه على رف عالي كده في البيت وبتعمله غطى قطيفة حمايةً ليه من التراب، كان فيه إحساس جماعي أنه هو بيجمع الناس وبخلي الناس تقعد وتتلاقى عشان يعرفوا الدنيا فيها أيه

اغنية1 الراديو والراديو، الراديو ينقل أخبار الراديو يفضح الراديو

محمد علي أنتم متخيلين الراديو كان مهم قد إيه زمان؟ الناس كانت بتتجمع عشان تعرف إيه اللي بيحصل في الدنيا، فعشان كده يمكن صعب إنه إحنا نحكي شوية عن لحظة انتشار البودكاست الإخباري النهاردة، من غير لما نرجع لورا شوية أو شويتين الصراحة، لعشرينات القرن الماضي لما بدأ البث الإذاعي وتحديداً في مصر، ولكن وقتها كان بدأ من إذاعات أهلية وخاصة، كان ليها طابع تجاري كده وكانت المحطات دي يعني بتتسمى على أسماء أصحابها زي راديو صايغ وراديو فريد وغيرهم

اعلان ألو هنا راديو مصر الملكية، سيداتي وسادتي لا يفوتكم الإطلاع على أجمل تشكيلة من الأسنان الصناعية لدى معمل أسنان عبد الصمد بالسيدة زينب

محمد علي المحطات الأهلية دي لما بدأت بدأت تزيد وتكتر، السلطات البريطانية كمان بدأت تحس أنه لأ ده في حاجة غلط، بدأت تحس بالقلق تجاه المحطات الأهلية دي، خاصةً أنه الشباب في الوقت ده الشباب الوطني كان بيستخدم المحطات دي كمنبر ليهم لمهاجمة السلطات، وبالتالي السلطات البريطانية يعني حاولت إنه هي توقف الموضوع ده، وفعلاً بالفعل وقفته بعد صدور تصريح 28 فبراير، وبعد سنتين لما رجعت المحطات الأهلية مرة تانية للظهور وبدون رقابة طبعاً، كان أصحابها بياخدوا راحتهم بقى عالآخر لدرجة إنه هم بيتبادلوا الشتائم مع النقاد اللي كانوا بينتقدوهم في الصحف، ف واحدة مثلاً من أشهر المهاجمات أو المشاكل اللي حصلت على الهواء واللي حكوا عنها في حلقة عن تاريخ الإذاعة في البرامج في البرنامج العام في 2008، كانت مهاجمة الشيخ محمود صبح على الهواء رداً على الانتقادات اللي كان بيتعرض ليها في مجلة روز اليوسف، راح الشيخ وقتها شيخ محمود لمحطة إذاعية أهلية كانت بتذيع أغانيه والموسيقى بتاعته، وقعد يعزف على العود بتاعه وكل لما كان يخلص مقطع معين يوقف ويقول بأعلى صوته تعالوا نسمع

شيخ محمود الله الله يا روحي الله يا عيني الله يا شيخ صبحي يلي مفيش منك سامع يا سي مختار سامع يا ابن يقدر سي عبد الوهاب بتاعك يقول دي طيب بلاش دي يقدر يقول

محمد علي شيء مضحك الصراحة ودمه خفيف لكنه يعني عبثي تماماً، طيب ده فضل مستمر بقى لغاية لما تم اصدار قرار حكومي بوقف كل الإذاعات الخاصة أو الأهلية بشكل نهائي، وفي 31 مايو سنة 1934 انطلقت أول محطة إذاعية حكومية في مصر، بصوت أول مذيع مصري وهو أحمد سالم، مع أولى كلماته الشهيرة ألو ألو هنا الإذاعة اللاسلكية للحكومة المصرية

أحمد سالم هنا القاهرة

محمد علي الإذاعة يعني كانت بالتعاون مع شركة Marconi أعتقد العالمية اللي كانت بتشرف على الإذاعة بشكل فني وهندسي، والعقد كان ما بين الحكومة المصرية وشركة Marconi، كان بينص على أنه الإذاعة المصرية هتقدم بس أو تقوم بتقديم الترفيه والتسلية، وأنها تكون على الحياد تماماً وبعيدة عن السياسة، وفعلاً كانت بعيدة نوعاً ما وكانت بس بتقدم نشرات الأخبار وتعلق على الأنباء، ولكن مع كتير من تدخل بقى الخبراء الإنجليز في كل حاجة تخص الإذاعة، ووضعهم زي محاذير أو يعني محظورات سياسية بدأ المصريين اللي كانوا بيشتغلوا في الإذاعة وقتها يحسوا بالإنزعاج أكتر وأكتر، وبالتالي تم فسخ التعاقد وتمصير كل المواقع اللي شغلها الإنجليز في الإذاعة لغاية آخر موقع انسحب منه الإنجليز وهو إدارة الأخبار، الإذاعة بعد كده يعني هيكون ليها دور في تحريك الروح الوطنية، ودعم فكرة الاستقلال وجلاء المستعمر عن أراضيها، وبالتالي أو بالإضافة يعني لإنها كانت سند كبير للجيش والمقاومة، كانت بتذيع بعض الأخبار الفدائيين وأخبار حرب فلسطين في 48، ودي كانت بداية جديدة لعالم العلاقات ما بين مصر والعالم الخارجي، لغاية لما هتبدأ مرحلة جديدة تماماً، أو خلينا نقول في العصر الذهبي للصحافة الإذاعية في منتصف القرن الـ20، لما بقت الإذاعة والتلفزيون يعني أدوات قوية جداً لنشر الأخبار وتشكيل الرأي العام في كل أنحاء المنطقة، واحدة من لحظات العصر الذهبي دي لما أطلقت الحكومة المصرية بقيادة الرئيس جمال عبد الناصر صوت العرب، في سنة 1953، وهي محطة إذاعية باللغة العربية بثها كان من القاهرة، الحدث ده كان بمثابة يعني لحظة فاصلة في تاريخ الصحافة والإعلام العربي

اغنية 2 الراديو ما دام ينور الأفكار ما دام يفتح الأبصار ما دام يفضح الأسرار يعني يضر الاستعمار يحيا الراديو يحيا الراديو

محمد علي ف جمال عبد الناصر يعني مش بس هيستخدم الراديو كمنصة إعلامية مهمة في شرعنة الثورة ومشروعه القومي، ولكن كمان كمنصة بيتوجه بيها للعالم العربي والأفريقي، اللي بيسعى للتحرر من خلال إذاعة صوت العرب، اللي ساهمت في حركات التحرر العربية، وبالتالي طبعاً اتحاربت يعني إذاعة صوت العرب اتحاربت من الدول الاستعمارية لكونها بقت من أقوى الوسائل لنشر مبادئ القومية العربية، لدرجة أن العدوان أن في العدوان الثلاثي سنة 1956 وأثناء غارة جوية كده تم استهداف أجهزة الإرسال الرئيسية في منطقة صحراء أبو زعبل، واللي كان بيرسل منها أو كان ببث منها إذاعة صوت العرب، وقتها أعلنت أكتر من إذاعة عربية بث صوت العرب من خلالها، زي إذاعة صوت أو إذاعة دمشق بصوت المذيع السوري عبد الهادي البكار، نفتكر أنه كان من دمشق كما يقول من دمشق هنا القاهرة

عبد الهادي البكار من دمشق هنا القاهرة

محمد علي دي كانت كان رد قوي جداً على نبأ قطع الإرسال عن الإذاعة المصرية، في حركة تضامن كبيرة وواسعة، واللي بنشوف فيها طبعاً أكيد تأثير الإذاعة وصوت العرب تحديداً

اغنية3 ما جننة لوما هالراديو أصبح كل واحد من عندنا يشوف بعينه ويسمع ويميز اليسرى من اليمنى ويدري بالحرب وبالهدنة ويقرأ الممحي بالراديو

محمد علي ولكن صوت العرب هيتغير بعد كده توجهها وهتفقد مصداقيتها شوية بشوية، ده بعد إيه؟ بعد ما نشرت أخبار مضللة من خلال بيانات بعيدة عن الواقع، زي اللي حصل في 1967 والمذيع أحمد سعيد بذيع أخبار عن انتصارات وهمية للجيش، في حين أن الواقع على أرض المعركة كان مختلف تماماً عن الأخبار اللي بتتقال، وده بطبيعة الحال يعني هز ثقة الناس في الإذاعة المصرية، اللي بدأت أو يعني بذلت جهد كبير جداً عشان بعد كده تحاول أن هي ترجع الثقة عند الناس، الفترة دي زي ما شهدت هيمنة للإذاعة في العالم العربي واستخدام الحكومات لها كوسيلة للسيطرة على السرد الإخباري، فهي كمان أسست للدور المحوري اللي هتستمر وسائل الإعلام في لعبه في المشهد الاجتماعي والسياسي في المنطقة، واللي هنشوف فيه إزاي استمر التأثير أو يعني استمر تأثير ميراث الراديو على نشر الأخبار في تشكيل الصحافة، ومهد بعدها الطريق لتطور الأخبار من خلال التلفزيون

اغنية 4 والله حاجات بلادنا ودخل والله ما شافوها والله

محمد علي ظهور التلفزيون ده في حد ذاته في العالم العربي في الخمسينات، في العراق والجزائر ولبنان ومصر بعدها كان ليه تأثير كبير جداً جداً على الأخبار وتقدمها أكيد يعني، بل وكمان أثر على الطريقة اللي استقبل بيها الجمهور بعد كده التلفزيون، لأنه بقى صوت وصورة يعني أضافت بعد جديد للسرد القصص والأخبار، ومع انتشار ظهور بعض الفضائيات العربية بعد كده هتحصل منافسة كبيرة ما بين الراديو والقنوات، يعني اتجه ليها الناس بعد كده بشكل أكبر، لأن الإذاعة ما بقتش يعني متجددة أو بتجذب الناس ليها بالشكل الكافي زي الأول مقارنة أكيد بالتلفزيون، بس بعدها بسنين هتشهد المنطقة بتاعتنا أو يعني هتشهد المنطقة العربية بتاعتنا ثورة إخبارية كبيرة جداً بظهور عالم البودكاست، إحنا سبقنا شوية قدام صح؟، أه بس خلونا نركز بقى دلوقتي على البودكاست، أخيراً وصلنا للبودكاست اللي هو يعني بدأ يكتسب شهرة نوعاً ما في العالم العربي في أواخر 2010 تقريباً، في حين إنه هو كان منتشر فعلاً في أجزاء كتير من العالم، إلا أنه خد وقت طويل نسبياً عشان يكتسب نفس الشهرة في منطقتنا العربية، ولكن خلونا نقول كده إنه في أواخر 2011 لما أعتقد أنه بدأ في 2011 أواخر 2011 البودكاست إنه هو ينتشر أكتر، ويبقى يعني خاصةً مع سطوع نجم الـYoutube ومنصات التواصل الاجتماعي وطبعاً الثورات العربية، اللي لعبت أكيد دور يعني لعبت دور كبير جداً في إثارة الاهتمام بوسائل الإعلام والـsocial media البديلة والمستقلة، وبدأ بقى المدونين وصناع المحتوى والصحفيين في المنطقة أنهم يدركوا إمكانيات البودكاست، في إنه هو يوصل للجماهير بطريقة أسهل وأسرع وطريقة طبيعية كمان، لأن الناس بدأت تفقد الثقة شوية في في في الإعلام السائد، وتحب إنه هي تأخذ المعلومة من إعلام مستقل شوية، ويعني الأهم من ده كله بقى أنه هي كانت بتقدم رواية بديلة عن اللي بيحصل، يعني كانت بتقدم حاجات بديلة عن اللي بيحصل شايفينه قدامهم طول الوقت في الإعلام السائد، ده اللي خلانا نوصل النهاردة لمرحلة اللي بتكون فيها الأخبار مش بس حكر على القنوات الفضائية أو الجرايد أو مواقع الأخبار الرسمية، وتغطيتها كمان ما بقتش حكر على الموقع دي، اللي كتير منها أصلاً بيكون يعني أو كان محدود جداً وموجه تماماً، وده كلنا شفناه في أحداث حرب غزة الأخيرة، اللي كان واضح فيها جداً التغيير الكبير في ديناميكية المشهد الإخباري أصلاً، يعني خاصة مع تبني وسائل الإعلام رواية واحدة طول الوقت في تغطيتها، أو يعني مع وجود الأخبار المضللة اللي بتنكر أصلاً القصف اللي كان بتتعرض له غزة من يوم 7 أكتوبر، هنا بقى ظهرت أصوات هتكون يعني زي منافذ إخبارية مستقلة وبديلة تحكي لكل الناس وبلغات مختلفة، وتنقل لهم الأخبار الفورية على الـsocial media، كانت الحاجات دي بتقدم رواية يعني كانت بتقدم روايتها للأحداث بلسانهم نقدر نقول، زي المصور الصحفي العظيم معتز عزايزة من غزة، اللي من أول يوم كان بيغطي القصف المتواصل بعدسة الكاميرا بتاعته وبينقل الأخبار على حسابه على Instagram، وكذلك في بيسان عودة حكواتية من غزة وبلستيا العقاد وغيرهم وغيرهم كتير من الناس اللي استخدمت كل المنصات بتاعتهم عشان يحاولوا إنهم يوصلوا الصوت والصورة والأخبار للعالم.

محمد علي للـinfluencers أو المؤثرين على الـsocial media يعني من جنسيات مختلفة كتير جداً، دول كمان ما كانوش بعيد أو ما كانوش برة المشهد الإخباري، بالعكس كان عندهم مساحة وكان ليهم دور كبير في إنهم يحكوا وينقلوا اللي بيحصل في غزة، وكانوا كمان الحاجات دي أو الأخبار دي كانت بتترجم للغات كتيرة جداً، يعني كانوا بييعرضوا فيها اللي بيحصل لأهالينا في غزة بالصوت والصورة، وبيعملوا لقاءات يعني مباشرة مع مصورين وصحفيين من جوة غزة، ده كانوا بيطلعوا على برامج أجنبية وبيحكوا بصوت عالي جداً وباستياء كبير كمان، زي اللقاء بتاع الـpodcaster بالمناسبة اللي كان اسمها رحمة زين آه رحمة زين كانت هي podcaster بالمناسبة، وعملت مقابلة مع المراسلة بتاع CNN قدام معبر رفح، أكيد كلنا شوفنا الفيديو بتاعها وهو غضبانة جداً وبتعبر عن الاستياء بتاعها من التغطية الإعلامية الغربية

محمد علي بس اللي كان مدهش بالنسبة لي بقى على مدار متابعتي للأخبار، إزاي المشهد الإعلامي بيتطور وقواعده عمالة بتتغير، ده لاحظناه بعد مقابلة مثلاً Piers Morgan مع مع باسم يوسف، اللي انتشرت بشكل كبير جداً جداً على الـsocial media، ووصل عدد مشاهدتها بس يمكن في يومين بعد المقابلة يمكن فوق الـ20 مليون مشاهدة، وده كان يعني حدث تاريخي في القناة

محمد علي كانت الحلقة قوية جداً طبعاً لو إنتوا ما شوفتوهاش فأنصحكم جداً تشوفوها، ولكن الأهم من ده إنه أنتوا تشوفوا ردة الفعل بقى على الحلقة نفسها، لأنه بعد عرض الحلقة دي أخدت بالي من قد إيه في برامج وحلقات podcast أجنبية بدأت تطلع وتعمل مراجعات وreviews، عن حلقة باسم يوسف واستخدامه للسخرية والكوميديا السوداء في رده على Piers Morgan، الحلقات دي كان في منها يعني بيحلل التغطية الإعلامية الغربية للحرب في غزة وبينتقد التبريرات اللي بيقدمها Morgan، ودي حالة كده أو ظاهرة أُختلقت مؤخراً، وفتحت باب من المناقشة حولين فكرة التحيز الإعلامي والخيارات التحريرية في تقديم الأخبار، ولكن المرة دي مكانتش من خبراء ومحللين من قنوات أخبار لأ ده كانت من ناس عادية وصناع محتوى على الـsocial media، واحدة مثلاً من الحلقات دي كانت لصانع محتوى أمريكي اسمه تقريباً Lenear Boyd أو يعني قناته على youtube اسمها MrLboyd حاجة زي كده، كان فيها يعني كان بيعمل فيها زي مراجعة كده للمقاطع بتاعت مقابلة باسم يوسف مع Piers Morgan

محمد علي Lenear بعدها بيعلق بأن كثير من الناس مش بدوروا على المعلومات قبل ما يكونوا رأيهم، وإن قد إيه ده مشكلة كبيرة جداً، أنهم بس لو حللوا اللي بتم نشره على وسائل الإعلام زي fox news وCNN هيلاقوا إن اللي بيقولوه، اللي بيقوله باسم يوسف في الحلقة ما بتمش أصلاً نشره، يعني ما بيوصلش على نطاق واسع، وإن ده بسبب متابعة الناس أصلاً للـtrend بدون البحث عن الحقائق بنفسهم

مهم إنه إحنا نوقف شوية، عشان نشوف اللي بيحصل بعدسة أوسع، وخلونا كده نأخد يعني نفس عميق ونركز عشان نقدر نفهم الحكاية من الأول، لأننا يعني كثير بننشغل عن الحدث نفسه وبننسى أصلاً أصله هو بدأ إزاي؟ وليه حصل؟ وإيه اللي ممكن يحصل في المستقبل، من الأشياء اللي ممكن تساعدنا إنه إحنا يعني نفهم أكثر عن إيه اللي بيحصل النهاردة في فلسطين مثلاً، هو إنه إحنا نتعرف على أصل اليهود تاريخهم وسبب اختيارهم لفلسطين، وده اللي ممكن نعرفه من خلال حلقة التاريخ المجهول لليهود واسرائيل، اللي بتكشف لنا سر اليهود وعلاقتهم بالمسلمين في حلقة يعني مثيرة جداً وغنية جداً بالمعرفة والمعلومات من بودكاست فنجان، وده كان يعني بيحاول فيه ضيف الحلقة المميز جداً جداً جداً الدكتور فوزي البدوي، إنه هو يجاوب لنا على أسئلة زي هو ليه أصلاً اتأسست اسرائيل وإزاي تحولت للصهيونية من مذهب ديني إلى دولة بلا حدود

فوزي البدوي أولاً لأن كما قلت المشروع في البداية لم يكن مشروعاً دينياً، كان مشروعاً سياسياً هو حل لمشكلة اليهود، ما كان إمكانية للاندماج ما كان إمكانية للبقاء في الـghetto، يجب الحل في إطار مشكلة القوميات الناشئة آنذاك هناك شيء اسمه القومية اليهودية، ويجب حل هذه المشكل مشكل سياسي، فإذاً المهم هو ليس بشرط أن يكون هذا الأمر فلسطينياً وهذا مسألة دينية

محمد علي برامج البودكاست الإخبارية العربية كمان كانت مشاركة في التغطية وفي نقل الأحداث، زي بودكاست الفجر وده هيكون أول أو تاني بودكاست بقى إخباري منرشحه ليكم النهاردة لأ اللي فات فنجان ما كانش إخباري فده أول بودكاست إخباري بنرشحه ليكم هو بودكاست الفجر، بودكاست إخباري لطيف بيطلع فجر كل يوم، ويشرح لك في سياق الأخبار في 10 دقائق، يعني حاجة موجزة ومختصرة، وأحياناً كمان بيحللوا الأخبار مع مناقشات بسيطة، ممكن نسمع منه شوية حاجات

فجر صعدت قوات الاحتلال الاسرائيلي من حربها على قطاع غزة بدءً من ليلة الجمعة، حيث قطعت الاتصالات عن القطاع بالكامل، ثم رفض الاحتلال قرار الأمم المتحدة اللي طالب يوم الجمعة بهدنة إنسانية، ووقف فوري لإطلاق النار المستمر من ثلاثة أسابيع، وقالت وزارة الاتصالات الفلسطينية إن انقطاع خدمات الاتصال والإنترنت في غزة قامت به إسرائيل عمداً من خارج قطاع غزة، وأضافت أن جيش الاحتلال قطع الاتصالات ومعظم الإنترنت لارتكاب مجازر، لا أحد يعلم حتى الآن حجم الدمار اللي خلفه القصف الإسرائيلي لغزة خلال اليومين الماضية

محمد علي البودكاست التاني هو أخبار اليوم من سكاي نيوز، واللي بيقدم نشرة سريعة كده لكل الأخبار، بالإضافة لسياق وحكاية كل خبر، فده بودكاست كمان مميز

اخبار اليوم أما في مناخات الهدنة بين إسرائيل وحماس، فالتمديد في مصلحة الجميع عنوان المرحلة من هذه الحرب الدائرة بين إسرائيل وحركة حماس، فهذه الأخيرة أبلغت الوسطاء بموافقتها على تمديد الهدنة في قطاع غزة لأربعة أيام أخرى

محمد علي كوني حد بيهتم جداً بفكرة التحليل وبشوف الأخبار مش بس مجرد عناوين رئيسية كده، ولكن هي يعني ممكن تخلينا نفهم كل اللي بيحصل حوالينا من خلال إنه هي توفر صورة أكبر ووجهات نظر مختلفة، لقيت بودكاست نقاش مونت كارلو واللي كان بيتم فيه استضافة ضيوف ومحللين بعد كل خبر بيقدموه

نقاش مونت كارلو أهلاً بكم أينما كنتم في الاستماع إلينا وفي فقرة نقاش نتناول قضية اليمين المتطرف الراديكالي الفرنسي، وقرار وزير الداخلية الفرنسي Gérald Darmanin بحل مجموعة من التنظيمات التي تشكل خطراً على الأمن الوطني، في سياقٍ ما يزال فيه النقاش البرلماني مستمراً ومتواصلاً حول قانون جديد حول الهجرة

محمد علي والحقيقة وأنا بدور على بودكاست أخبار، كنت بحاول ألاقي بودكاست بضيف ذي طابع إنساني كده على الأخبار، من خلال مشاركته للقصص الشخصية للأفراد اللي بيعني بيتأثروا بأحداث أو أزمات أو قضايا مجتمعية مختلفة، وده لقيته فين بقى؟ لقيته في بودكاست أخبار الأمم المتحدة تعالوا نسمع

اخبار الامم المتحدة تتعدد أشكال العنف ضد المرأة في مصر، ويعتبر ختان الإناث الأبرز في هذه الأشكال لأنه من العادات السلبية المنتشرة بصورة كبيرة خاصة في صعيد مصر، ورغم الجهود المبذولة منذ التسعينيات إلا أن تلك الظاهرة مازالت مستمرة لتجد مواجهة من عدة جهات منها المجلس القومي للمرأة، هيئة الأمم المتحدة المعنية بالمرأة، برنامج الأمم المتحدة للسكان، وغيرها من الجهات

محمد علي ولأن الأخبار مش بس يعني سياسة، ولكنها كمان ممكن تشمل مواضيع وأحداث مختلفة في الاقتصاد، وفي الرياضة وفي الفنون وفي غيرها، وعشان كده كان يعني عندي فضول أعرف هل أصلاً في أي بودكاست إخباري عن الثقافة مثلاً؟ وفعلاً لقيت بودكاست النشرة الثقافية من مونت كارلو، واللي بيعرض المشهد الثقافي، الأفلام، الموسيقى، الأدب، الفنون وبيناقشها، وبيعرض تأثير الأعمال الإبداعية على المنطقة، من خلال استضافتهم لضيوف بعلقوا وبيحكوا أكتر عن الحدث ده

ميساء وإلى نشرة الثقافة وهي معك رضا جودي مرحبا رضا

رضا جودي مرحبا ميساء

ميساء ونبدأ من القاهرة مع معرض عن فلسطين من أرشيف المصور الهولندي Frank Scholten

رضا جودي وهو كذلك سيحتضن المعهد الهولندي بالقاهرة معرض عن فلسطين، يضم مختارات من المجموعات الأرشيفية للمصور الفوتوغرافي الهولندي Frank Scholten، المعرض يحتوي على مشاهد حياتية بعد انتهاء الحرب العالمية الأولى في فلسطين، وتشمل الصور واقع العديد من المهن وطبيعة أنشطة الحرفيين والعمال، وكذلك المناسبات الاجتماعية والمواسم الدينية ومشاهد عن الشوارع

محمد علي طيب لما نيجي بقى لمحبي التكنولوجيا وآخر أخبارها، هنلاقي في عندنا بودكاست نشرة الأخبار التقنية، واللي بيقدموا فيها آخر الأخبار والتطورات في عالم التقنية الناشئة، ده برضه بودكاست مميز جداً

مذيع 2 أهم الأنباء التكنولوجية من أجيال

نشرة الاخبار التقينة2 خدمة التواصل النصي الجديد Threads تقترب من إطلاق ميزة تتيح للمستخدمين تعديل المنشورات، وكان رئيس Instagram أكد بعد إطلاق التطبيق أن زر التعديل كان مدمجاً في قائمة المزايا

محمد علي جميل آخر بودكاست أخباري هرشحه ليكم النهاردة هيكون بودكاست CNN الاقتصادية، اللي بقدم فيه الأخبار الاقتصادية والمالية حولين مشهد الأعمال في العالم العربي، وبناقش فرص الاستثمار، والسياسات الاقتصادية وتأثير الأحداث الاقتصادية على المنطقة

مذيع 3 أنتم تستمعون إلى بودكاست CNN الاقتصادية

CNN الاقتصادية مع تصاعد العدوان الإسرائيلي على غزة، وتزايد المشاهد المأساوية للقتلى والجرحى، تحديداً الأطفال تعالت الأصوات المنادية بالمقاطعة للعديد من العلامات التجارية العالمية، خاصةً بعد إعلان بعض الفروع لتلك العلامات مساندتها الجيش الإسرائيلي

محمد علي طيب قبل ما نطلع من غرفة الأخبار وننتهي من حلقتنا النهاردة بتمنى إن تكونوا استمتعتوا بالحلقة دي، ويعني زي ما أنا استمتعت بيها وأنا بقدمها لكم، وبتمنى السلامة طبعاً لأهلنا في غزة، عايز أقول لهم يعني ربنا يقويكم، استنونا في حلقتنا الإضافية الأسبوع اللي جاي، اللي هتكون مع ضيف مهم إن شاء الله، ولغاية المرة اللي جاية استمروا في الفضول والاستكشاف وطرح الأسئلة، البودكاست المفضل من تقديمي أنا محمد علي ومن إعداد وكتابة أماني عادل، ما تنسوش أكيد إنه انتوا تشاركوا الحلقة دي مع أصدقائكم المهتمين إنهم يتعرفوا على برامج بودكاست جديدة، وكمان تعملوا اشتراك في القناة بتاعتنا على اليوتيوب، عشان تسمعوا وتشوفوا حلقتنا أول ما تنزل، وأكيد شاركونا رأيكم وتعليقاتكم على البودكاست المفضل والحلقة دي، البودكاست المفضل من انتاج أخبار الآن نشوفكم إن شاء الله الاسبوع اللي جاي في حلقة جديدة

اغنية5 يحيا الراديو يحيا الراديو يحيا الراديو يحيا الراديو يحيا يحيا يحيا الراديو