عماد الأرنب - مصمم الأزياء الذي وجد سعادته في المطبخ

نص الحلقة :

عماد أرنب تجوزت غصباً عنّي ماما حبيبي ما في شي أنا طبّاخ البيت تبع الشباب أنا لمّا شفتن كان بدّي كف تاني خلص لقوا الفاعل هن بعرف إنه في شي صار مافي داعي هو يقلي اعترف بعترف صارت سندويشة الشاورما طعمها دم وقت اللي أخدوني من هنيك حسيت حالي إنه أنا انكسرت كتير استهوتني فكرة إنه أطبخ لناس ما بيحكوا عربي وشوف الحبّيبة عم ياخدوا زوايا يطير عقلي وقت اللي  السيارة السوزوكي تفوت من  قلب الحارة وتكون علي القد مع إنه والله كنت حاول يعني اتخبّيت تحت الشاحنة تخبيت بقلب الشاحنة بس هنن قرروا إنه خلص نحنا ضاق خلقنا من هاي الديمقراطية اللي عايشين فيها وتعوا نعمل ثورة

نسرين طرابلسي اللاجئ المدير اليوم هو الشيف عماد أرنب صاحب أشهر مطبخ سوري بلندن عماد سيريان كيتشن الواقع بمنطقة سوهو حارة كارنابي واحدة من أشهر وأغلى المناطق السياحية الشعبية في مركز العاصمة البريطانية عماد مشهور كثير هون بالصحافة وزبائنه معظمهم أجانب بس بهالبودكاست رجع شامي عتيق بيكفي تعطيه المايك لحتى يستلم السردة وكل قصة بتجر سيرة ما انحكت من قبل لترجعنا لأصل عائلة أرنب المشهورة بتجارة الأقمشة وحكى لنا كيف إتحول من مصمم أزياء في دبي لشيف طبّاخ في لندن

عماد أرنب الحمد لله رب العالمين نحن من العماره بدون تحيّز بس هي واحدة من أحلى حارات الشام بابا بيشتغل بسوق الحميدية عنده محلات أقمشة نسائية الأصل الأصل بيت الحجّار جدّي كان كتير زلمة جبان وخوّيف قالوا عنه أرنب مشيت عليه صار أرنب إسم على مسمّى جاب 14 ولد وعندن ماشاء الله أحفاد فهي ك هاي العيلة الصغيرة عددهن كبير كتير وكلن بيشتغلوا بالأقمشة النسائية أو 99% بيشتغلوا بالأقمشة وتصميم الأزياء مع إنه جدّي الله يرحمه كان فرّان وكان عنا فرن الأرنب يلي بالعمارة ولا واحد من أولاده طلع فرّان مثل أبوه إنه يكمّل عنه والحمدلله أنا بيّاع شاطر ومن وقت اللي كنت صغير بنزل مع بابا عالمحل ماكنت طول الطاولة تبع القماش فيحطولي في عنا شغله صغيرة هيك اسمها سكمبلي هي متل الطاولة الصغيرة مثل الترابيزة بيحطولي إياها مشان وقّف عليها وطبعاً الزباين يؤبشني وحبيبي وشو حلو ومدري شو وأنت وأنا إتفضلي وتكرم عيونك ويا حلوة مثلي مثل باقي هالنسونجيه اللي كلن موجودين بالسوق وطلعت على دبي وبلّشت اشتغلت بالأقمشة النسائية وقت اللي طلعت لقيت حالي إنه أنا كتير مفتقد شغلات مثلاً إي بلشت أدرس تصميم الأزياء كان عمري 17سنة بعد بفترة صغيرة فتحت محل لتصميم الأزياء وكذا بس هذا الموضوع ما عم يرضيلي شغفي مع إنه الحمد لله كان في تصميمات حلوة وكان في زباين مهمين ومبسوط بحالي كتير بس ما في ما في هذا الرضا عن الذات أنا طبّاخ البيت تبع الشباب كيف بدي قلك بترجعي بتتذكري بقي أيام المطبخ بالشام أيام المطبخ مع أمي الله يرحمها حس حالي مبسوط أكتر وأنا عم بطبخ لرفقاتي من إنه أنا عم بصمم أزياء وحياة الله حتى بالبيت ببيت الشباب يعني الوضع الطبيعي لأيّ حدا إنه بيعرف يطبخ أنا هيك بالنسبة إلي تاري لأ مو كل الشباب هيك صار عندي ميزات ببيت الشباب بس لأنه أنا بعرف أطبخ  لما يرجعوا وصايمين برمضان مثلاً ويلاقوا يبرق هنن يطير عقلن و هذا اللي يبلش يبكي وهذا اللي مشتاق لأمه وهذا اللي مدري شو فكان إمتياز الشيف حتى أحياناَ غسيلاتي ما أطويهن ليش؟ أنا الشيف تبع البيت تخيّلي قديشو حلو بما إنه في عنا عسكرية بسوريا لكتير من الشباب السوري وضع الغربة وضع طبيعي و عادي يعني بالنسبة إلها الهريبة مو بس تلتين المراجل بالعكس هي عم تعمل شغلة تخدم فيها باقي الناس ما تنخرط بهذا المشروع المقيت للأسف

نسرين طرابلسي عماد لم يعش في جلباب أبيه لكنه تخرج بإمتياز من مطبخ الوالدة وكانت والدته بدون شك حالة فنية وإنسانية انتصرت لمّا ابنها خالف كل التوقعات وكان أول رجل طبّاخ بالعائلة

عماد أرنب الله يرحم أمي كانت تحطني على رخامة المطبخ تعمل الشيش برك أو تلف يبرق الله يرحمها كانت تكون عم تساوي تبولة تجيب البزر تبع البندورة تزتن بشقفة الزريعة اللي جنب منها الله يرحمها كانت إيدها خضرا ناكل بندورة طول الصيف من زراعة أمي الله وكيلك كانت بتطرز بتخيط بتعمل سجاد بترسم على الحرير بترسم على الزجاج ورسمات شي من اللي بيحبه قلبك لمّا كانوا صغار هي وخالاتي 3 إخوات بمنتخب سوريا لكرة الطائرة هي وخالاتي دارسين أدب إنجليزي العائلة من الطرفين مختلف جداً بيت أهلي بيت أهل بابا يعني بحارة شعبية حرفياً مفتوح إيمتى ما كان لأنه ما بتقدري تسكّري لمّا بيكون عندك 14 ولد و98 حفيد هاد الحكي بسنة 1991 لمّا توفّى جدّي الله يرحمه منين بدنا نلحّق نسكّر بابنا؟ كلياتنا أرانب وساكنين بهالحارة جنب بعضنا واللي فايت فايت واللي طالع طالع هيك كانت حارتنا وهيك كانت الشام لمّا كنت صغير ما كنت شايف هاي الحلاوة لمّا سافرت على دبي صارت هذا المخزون الذاكرة صار يطلع ويوم عن يوم إشتاق أكتر ويوم عن يوم بدّي إرجع أكتر أنا أول رجل بطبخ بالعيلة وماما الله يرحمها حسّت حالها إنه انتصرت إنه طلّعت أول طبّاخ بالعيلة يمكن بشكل من الأشكال كان هذا شغفها حسّت بنوع من أنواع النصر لمّا أنا قررت إنه بعّد عن موضوع الأقمشة النسائية مانو دكتور مهندس هاي الصورة النمطية إنه موضوع طبّاخ كان يمكن مهنة درجة ثالثة رابعة بس لمّا الحمدلله لمّا أنا بلشت ورجعت على سوريا وبدي إفتح مطعمي كان الموضوع واو صاحب مطعم كانت العالم عم تبلش تغير وتتجرأ وتفتح مطاعم ولقت إنه القصة صارت مجزية وصارت شغلة حلوة

نسرين طرابلسي وهيك بدأ مشوار عماد في عالم المطاعم بس الطبّاخ الشاطر أمه كانت أشطر منه

عماد أرنب فيكي تقولي اتجوزت عن حب اتجوزت غصباً عنّي أنا كنت رافض فكرة الزواج للفكرة أساساً يعني أنا ما بدّي إتزوج كان عمري 24 سنة وأنا ما بدّي رافض الفكرة تماماً الله يرحمها ماما إنه لأ ما في لا جواز ولا شي بس إمشي رايحين مشوار وأنا عرفان إنه هي أخدتني تدبسني ماما حبيبي ما في شي بس رايحين مشوار رحت فتحتلي الباب عرفت إنه خلص مشي الحال إتدبست إي  فحب إي من أول نظرة أماني إي وكمان أوّل ما اتزوجنا قررنا إنه هيك إنه نحنا بدنا نقعدلنا 3 سنين بدون ولاد الحمد لله رب العالمين بعد 9 أشهر إجتنا تالا بعد 3 سنين إجتنا لنوشة وب2010 إجتنا مريم الحمدلله بناتي رفقاتي حبيباتي وهنن أهم إنجازاتي

نسرين طرابلسي بالإستقرار العائلي والمهني ازدهر شغل عماد وصار بيمتلك بدمشق 3 مطاعم كاستلو وحطين وبينينو بيقدّم فيها كل شي من سندويشات البطاطا لأكل العزايم والحفلات هالمطاعم بمدينة دمشق ومحيطها سنحت لعماد يكون شاهد عِيان على بدايات الثورة السورية

عماد أرنب ما كان في شعار إسقاط نظام كان في شعار إنه الشعب السوري ما بينذل كنت حسّها موسيقى بإذني يالطيف شو كنت فرحان فيها والله العظيم حس رئتيني عبّت طن هوا بتصدقي هيك الفخر طلع ما في طرف تاني عم يسمع أنا بتذكّر كنت طالع من صلاة الجمعة طبعاً بحكم إنه يعني شغلي غالباً بمنطقة السيدة زينب فكنت ساكن ب أخذت طلعت من شارع بغداد وسكنت بمنطقة عقربا منطقة قريبة لمنطقة السيدة زينب بس يعني منطقة هيك شعبية وحلوة ولطيفة وجيراني حبّابين والناس فيها طيبين بمشي بالسيارة عشر دقايق بجيب بيض بلدي بياخد العقل من تحت الجاجه مثل ما بيقولوا جيب حليب أبداً هلق هلق محلوبين روح لعند الله يذكرها بالخير في خيمة كانت ناس هيك يعني عندهم غنم اشتري منها الحليب الغنم وأعطيها فوق منهم شوي تعملي جبنة غنم بتاخد ضبنات العقل عايشين وشغلي ماشي والحمد لله رب العالمين أموري بخير وكل شي هلق مو معناتها أنا مرتاح معناها الباقيين يعانوا ورح احكيلك على معاناة الآخرين اللي كنت شوفها بعيني مثلاً بحكم شغلي بمنطقة السيدة زينب كنت قريب من مناطق في كثير من السوريين ما بيعرفوا بمعاناتها ما بيعرفوا معاناة البويضة أو يمكن مو سامعنين فيها أو ما بيعرفوا أنه فيه ناس عايشة ببيوت من صفيح في منطقة إسمها الباردة تخيلي إسمها الباردة لمّا أنا موظف بمطعمي مضطر يشتغل مع إنه هو شغفه يكون رسّام لمّا بكون أنا في عندي بمطعم بالسيدة زينب شاب جاي يشتغل من أشطر الشباب اللي أنا شفتن بحياتي بلش معنا بمكان صار مدير بالمكان الثاني يعني شخص موهوب بس ظروفه المادية ما بتسمح بيقولولك التعليم ببلاش أني ببلاش طب الأكل و الشرب هذا اللي يا ستي الشخص بياكل بخمسين دولار بالشهر بس هاي الخمسين دولار حلم بالنسبة لإله لحتى تقدر تتأمن طب معقولة أنتِ برأيك إنه الأشخاص كانوا مرتاحين ومبسوطين وكل يوم الصبح عم يسمعوا زقزقة العصافير وأمورهم بخير بس هنن قرروا إنه خلص نحنا ضاق خلقنا من هاي الديمقراطية اللي نحن عايشين فيها وتعوا نعمل ثورة كنت عم بحكيلك قصة كنت طالع من الجامع بعقربا بعد صلاة الجمعة متلي متل باقي المصلين وللأمانة رايح متشجع زيادة لأنه عرفان إنه حيصير مظاهرة بعد صلاة الجمعة طلعت المظاهرة وطلعنا وبلشت المظاهرة واحد واحد واحد الشعب السوري واحد ومدري شو كذا بعدين شفنا سيارات عم تقرب بإتجاه المظاهرة من بيناتها في هاي السورين بيعرفوها اللي هي سيارة دوشكا يلي ماسك هاد السلاح ياللي من ورا اللي هو الدوشكا حاطط الرصاصة بتمه منظره لوحده ممكن إنه يخمد ثورات تانية بالعالم وكان في ناس جايين على أساس إنه جايبين أغصان الزيتون بس الرمزية كانت إنه شوفوا إنتوا شلون جايين و نحن شوفوا شو بإيدينا فجأة من قلب الدنيا بيطلعوا ناس وبيبلشوا بقى إسقاط النظام طبعاً هذا الحديث بالنسبة إلهم كان خط أحمر بس أنا لمّا قالوا إسقاط النظام بتذكر قلبي رجف والله العظيم قلبي رجف لأنه حسيت إنه حيصير شي لا يُحمد عُقباه ولمّا شفت الرصاص وشفت في طفل عمره 13 سنه 14 سنه انقتل واستشهد قدام مني وأنا ماطلع بإيدي مد إيدي لإستناوله عرفت أنا قديشني جبان الله يرحمنا برحمته بس يعني في ناس صارت تساعد وتعمل وأنا ما قدرت أنا هون بوقتها للأمانه فقدت الأمل

نسرين طرابلسي ثورة ضد الذل تحولت لكابوس ومع هيك عماد ما كان مفكر يترك البلد بس اللي صار يوم تفجير مستشفى الحياة بدمشق كان بيكسر الروح وبهداك اليوم كان هو ومرته وبناته نازلين بسيارة أجرة عالشام

عماد أرنب وصّلنا لعند جسر الثورة نزلت أنا مشان روح عالحميدية زوجتي والبنات رايحين بدهم يكملوا على ركن الدين هون بيصير إنفجار تبع مشفى الحياة والعالم صارت تركض أنا عم بركض بإتجاه الإنفجار لأنه مرتي و بناتي بالإنفجار وأنا بعقلي إنه راحوا ما بعرف شو صار مع الشوفير بوقتها ما فاتوا بالنفق يعني هنن بأول النفق عرفتي فوقت اللي صار الإنفجار هنن بس البلّور كان مكسور بس هنن بخير أنا لمّا شفتن قعدت على ركبي عالأرض وصرت إبكي المهم هون الشوفير بده يطلع قلها خليكي حمل حاله و هرب فيهن بعد ما استوعبت الموضوع كان في هونيك بوقتها حواجز إسمنتية مرسوم عليها العلم كانوا بيحطوها وين ما كان فصرنا ندفش هدلون الحواجز ونتجمع كل أربعة خمسة ندفشهم مشان نمرّق السيارات إنفجار الله مولاه راح ضحاياه راح في ضحايا خير الله بدنا نمرّق سيارات الإسعاف بدنا نمرّق السيارات اللي عم تطلّع العالم اللي هونيك حملت حالي بس لحتى خلّصنا ومدري شو و كذا وأنا راجع والله العظيم لحد هلق بتذكرها سمعت واحد عم يقوله للتاني "هذا هو سيدي" أكلت قتل شي بتذكره وشي بنساه مو أنا ركضت باتجاه الإنفجار أنا اللي عملت الإنفجار أنا كان بدّي كف تاني وبعترف هنن ما في داعي يعذبوا حالن بس ليش هذا الإصرار على الضرب الضرب الضرب ما في داعي هو يقلّي إعترف بعترف لقيت واحد عم ببعّد العالم عني إفتكرتو أنه لاح يقيمني أكلت رفسه من بسطاره العسكري على وشي بعرف إنه في شي صار حطولي هايدول البلاستيكات اللي على الإيد هيك لورا وطبوني وشي لتحت وخلص لقوا الفاعل هنن الله يعطيهم العافية لقوا الفاعل واللي فجّر عن بعد وبعدين راح يطمّن علي الضحايا ما بعرف ليش

عماد أرنب الحمد لله رب العالمين لأنه الله بدو يطول بعمري يمكن بحسنة بناتي الله ما بده يتّمهن على بكّير في ناس مهمين أصحاب نفوذ كانوا ساكنين جنب مننا بالضبط وأنا محلّي مو كتير بعيد يعني كاستيلو مو كتير بعيد عن المنطقة وهنن عندن حرس من أول من أول باب القلعة لعند المسكية هادلون الحرس أنقذوني من هنيك قالولن لك هادول قرايب المعلم أنا ما بقربه بس جيراني بيشوفوني دائماً معهم ومدري شو كذا قالو والله هادول إذا بيعرف المعلم بيخربلكم بيتكم هذا قرايبه للمعلم مدري شو كذا حملوني وأخذوني الله يشهد قبل ما أطلع من هونيك ما نزلتلي دمعة بس وقت اللي أخذوني من هونيك حسيت حالي أنه أنا انكسرت

نسرين طرابلسي الشيف عماد بعده لليوم عم يتعالج من آثار الكسور بالفك و الأضراس من الضرب الوحشي ورغم إنه وهو عم يحكي الحكاية حاول يبلع دموعه لكن كلماته عن دمشق كانت نزيف حب ورثاء

عماد أرنب أنا هون اتيتمت من دمشق ماتت دمشق بالنسبة لإلي أنا كنت أعتبر إنه دمشق هي إلي كل شيء عم يصير حواليّ مشان أنا كون مبسوط بيقولولك الحيطان مثلاً إنه والله روح دمشق القديمة ومدري شو وكذا ما حدا بيشوف الشبّاك الخشب مثل ما أنا بشوفه ما حدا بيشوف الياسمين اللي هارر على الأرض مثل ما أنا بشوفه الكتابات اللي عالحيطان مع إنه أنا برأيي هي موضوع مو حضاري بس أنا كنت حبها كنت حب عشوائية وفوضوية دمشق كنت حب وقت اللي سيارة سوزوكي تفوت من قلب الحارة وتكون عالقد يطير عقلي بهالمنظر حس إنه اللي عم يسوقها فنان كنت حس باب الأموي هو باب الجنة النومة نص ساعة بصحن جامع الأموي بتسوى الدنيا واللي فيها حس إنه ساحة باب توما هي مدخل للعالم الحضاري أنا كنت يطير عقلي بالنهر يللي بالشيخ رسلان حبه من قلبي حبه حب لمّا أمرق من من منطقة الشيخ رسلان و شوف الحبّيبة عم ياخدوا زوايا يطير عقلي ومشفى الرازي بباب توما يا الله شو حبها ساحة جورج خوري سندويشة السجق التمرية وكعك كعكة بالزعتر أنا بعشقها وبموت عليها بكل تفاصيلها ماتت وبوقتها ماتت صارت سندويشة الشاورما طعمها دم

نسرين طرابلسي رحلة الشيف عماد من سوريا للبنان لتركيا والتهريب بقارب الموت لليونان وعبور مقدونيا وصربيا والمجر والنمسا وألمانيا كانت سهلة وميسرة حتى وصل لكاليه وعلق شهرين  تقريباً شو سبب التأخير وشو عمل عماد بوقت الإنتظار الطويل شو هي الدروس اللي تعلمها وكيف استعادت الإنسانية عافيتها بين الناس

عماد أرنب هلق هي نسبياً كانت الرحلة كتير سريعة من سوريا لفرنسا خياليّة طاير 9 أيام بس بفرنسا علقت 64 يوم بكاليه المرات اللي كنت أسمع عن كاليه كان في عندنا شيء اسمه دانتيل دو كاليه كان يجيبو الدانتيل لما كنا صغار أقمشة الأعراس الأفراح الكذا كان يجيبوه من كاليه فأنا كانت برأيي أنه رح روح شوف المدينة الفن رحت مو شفت شميت ريحه بتقتل يعني مدينة ريحتها بتقتل والعالم بالطرقات وكلوا مهاجرين عم يحاولوا يقطعوا على بريطانيا أول شي أنا يعني دائماً طول حياتي الحمد لله بس كنت أوفر ويت (وزن زائد) دائماً كان في عندي نقطة السمنة شوي مع أنه والله كنت حاول يعني تخبيت تحت الشاحنه تخبيت بقلب الشاحنه حاول ما تزبط معي أول 10 أيام حاولت 13 مره المشكلة اللي صارت أنه لمّا أنت بدك تروح تقعد بعيد بأوتيل تعزل نفسك عن الآخرين أنت صرت خارج دائرة الأحداث هذا الهدف الأساسي كان للأمانة شغلة تانية اللي صارت أنه أنا هادلوني 30 يورو اللي بقدراللي بدي  أسكن فيهم بليله بأوتيل رخيص أو كذا فيني جيب فيهم شوية خضرة وأطبخ  لهالعالم الموجوده هنيك ومو ضروري للكل لمجموعة صغيرة منه بكون عم بعمل شي منيح ومنه بكون محمي ضمن القطيع بلشت الفكرة أنه نجيب مثلاً ساوي سلطة العالم تحب تنبسط اللي حوالي في هيك شوية لاجئين كنت نايم على درج كنيسة معهم حتى الفولانتيرز(المتطوعين) اللي يجوا الأجانب وللأمانة للأمانة أنا من هون كثير استهوتني من هادلون الأشخاص كثير استهوتني فكرة أنه أطبخ لناس ما بيحكوا عربي ما بيعرفوا الأكل السوري مو سامعنين فيه بعدين فجأة من قلب الدنيا إجاني واحد ختيار فرنسي وجابلي سكين طارعقلي بعد منها والله العظيم يمكن ثاني يوم إجاني واحد بريطاني من أصل باكستاني كان عنا قبل بيوم طعميته فتوش جابلي الغازالصغير تبع البكنك(النزهة) وهون حسيت حالي يعني يا سلام إجانا الفرج ونفسه هاد الفرنسي اللي جابلي السكين صار يروح والله العظيم مابتصدقي صار يروح بالليل على كارفور يجيبلي شو في بضاعه بدهن يكبوها شوفي خضار بدن  يرموها والله العظيم الكوسا البيتنجان السلطات ومدري شو وكذا هون صار ماعاد تكفيني السكين صار في عندي غاز صار بدي طناجر صار بدي أطبخ للمجموعة اللي هنن معي السوريين وشوي من الفولانتيرز (المتطوعين) اللي  بيكونوا جايين بدن يتطوعوا مشان يساعدوا اللاجئين بلش تسلم إيدك يا سلام الأكل شو طيب والله كثير إنبسطنا عربي وإنجليزي وفرنسي تكون جاي واحده أصلها جزائري رايحة من باريس طالعة على بريطانيا وقفوا بكاليه تعطيني شوية بهارات والله العظيم هيك يصير معي كان في واحدة فريدريك واللي كانوا عايشين معي على الكنيسه راح يسمعوا وبيعرفوا كانت فريدريك تيجي كل يوم الصبح مطرح مابنام جنب راسي تحطلي ترمسة الشاي وتحط ورقة مرسوم عليها اسمايلي فيس (وجه باسم) في واحد بريطاني لبناني إجى لعنا خصوصي مشان شو لازمكم شو بدكن لحتى جبلكم قلتله جاي علي بالي قهوة إفتكرني يمكن مخلد هونيك جابلي قهوة بالصناديق جابلي الخبز أبو نبيل الله يذكرك بالخير إذا عم تسمعني جابلنا خبز بيكفينا أشهر الله يشهد جابلنا فول معلب توم معلب مدري شو فاصوليا معلبة وصرنا نطبخ ونوزع ونطبخ ونوزع وهونيك بلش عماد سيرين كيتشن للأمانة فكرة التطوع بلشت باليونان أول شي لمّا وصلت عاليونان كنت بالقارب في واحدة ختياره من النرويج منظر وشها وهي سعيده لأنه نحن كنا على قيد الحياة أكثر منا وبعدين وقت اللي سألت عنها أنه مين هي قال هاي  كانت رايحة على المطار كانت جاي عامله تطوع مشان تساعد اللاجئين وهي رايحة عالمطار وقامت شافت القارب تبعنا وقامت قالت هذا آخر قارب بدي ساعده قبل ما إطلع بلحق ساعده فصارت تتصل أنه تعو في قارب جاي على غير قرنه من القوارب بيجوا عليها لأنه نحن ضاع القارب تبعنا بالبحر فصارت تعمل إتصالاتها أنه تعالوا لهاي المنطقة وصار بعتت إحداثيات ومدري شو أنا بتذكر منظر وشها كانت فرحانة والله تقولي عم تشوف أولادها اللي جايين أنا هون مثل اللي راحت مثل مابيقولوا راحت السكرة وإجت الفكرة انه هاي ليش كل هالقد ليش شو هالإنجاز اللي عاملته شو بنعنيلها نحن رجع إيماني بالإنسانية شوي وطول الطريق صارت يتعزز هذا الموضوع  وصلت على بريطانيا بجواز مضروب فرست كلاس(درجة أولى) من جاردنورد لكينج سروس ما لقيت تيكت من الإكونمي (إقتصادي) فأخذت فيرست كلاس

نسرين طرابلسي بالقطار ؟

عماد أرنب بالقطار جواز مضروب والله لو كان معي جواز قطة كنت نفدت الحمد لله الله آتاني بالحظ بس بعد 64 يوم بس أنا ماكنت متخيل إنه هادلون 64 يوم هنن البداية تبع عماد سيرين كيتشن يعني أنا كنت عم بتذمر بوقتها إنه يا رب دخيلك كل العالم عم تجي وتفوت عم بيفوتوا وعم بيفوتوا عم يتعلقوا بالقطارات وعم بس أنا ما عم بيطلع بإيدي يعني ما عم بيطلع بإيدي أنه أنا تزبط معي حاولت بالمطار انمسكت حاولت حاولت حاولت بس ماكنت عرفان إنه إنه رب العالمين إختار لي أنه لأ خليك هنيك مشان الصحافة تكتب عن هذا الطبّاخ السوري اللي عم يطبخ على درج الكنيسة وبعدين تبلش يصير في معارف يصير في ناس الناس تحكي للناس وهيك بلشت القصة

نسرين طرابلسي الشيف عماد بيعرف يدبر راسو بيجمع مهارة التاجر الشامي ولسانه الحلو إيدو بركة بيعرف يطلع القرش وبيخلي كل مين قعد على سفرته يصير صديق بس بلندن بالبداية ما كانت القصة سهلة على الإطلاق لحتى بلش يشتغل مع جماعة كوك فور سيريا

عماد أرنب أنا حاولت أشتغل بالمطاعم بالبدايه مثلاً رحت على واحد من المطاعم وأكيد مارح أذكر أسماء أول ما فتت على أساس رايح تراير شيف (طباخ تحت التجريب) وقالوا أنه فايف باوندز بأور (خمس جنيهات بالساعة) قلت إيه لأنه لساتني ما عندي وراق أنه أشتغل فبدي أي شي ما سألني شو بتعرف تشتغل قالي نزلي هذا الفان ونضفه كانوا عاملين قبل منها حفلة أو كذا نزلت كل شئ البضاعة اللي بقلب منه الأغراض نظفته وجهزته على 24 قيراط قالي بتعرف شو والله أنت شكلك ما عندك خبرة الشيف قلتله طب أنت ما جربتني قال بتحب طعميك على حسابي ولّا بتروح قلتله لأ بروح اللي بدك تطعميني فيهن على حسابك ردن على جوعتك رحت حاولت بمطعم ثاني أنا فايت عم أشوف مو تخبيص قمة بالتخبيص يعني لأول مرة بحياتي بفوت على مطعم بشوف السيخ الشاورما جاي مجلد ما له علاقة بالشاورما هو أي شي تاني غير الشاورما وعم يسميها شاورما لمّا بلشت بشغل السيارات بلشت بدي أعمل شي للأمانة كاش إن هاند (نقود حاضرة)  حضر حالي مشان أنا أعمل شي لإلي بالمطاعم بس شو هو هذا الشي أنا ما بعرف بلشت أعزم ناس مو عرب على بيتي بدي أعرف شو رأيهم بالمطبخ السوري لاقي في شغلات يحبوها شغلات ما يحبوها شغلات يتقبلوها شغلات ما كتير موضوع الشاكرية ما طاقوها بوقتها رحت على أساس أنه عم بعمل شغلة هيك من مزوزقة و مدري شو رحت عملت الموزات مثل ما هي بعضمها باللبن ومدري شو و كذا أبداً ما إنطربوا عليها الملوخية مثلاً ما كتير لاقت الإستحسان اللي أنا مثلاً كنت متمنيه مثلاً من الكبة اللبنية كبة لبنية لأربعين شخص والله القرص هل قد قده قد نص الإصبع و بياخد العقل و تعبان فين وكل حبة مثل أختها ومدري شو و كذا هي بأول بوب آب (ظهور) والله العظيم أنا سمعتا بأذني واحد عم يقله لرفيقه "يك" أنا سمعتها يك أنا عم تقول على الكبة اللبنيه تبعي يك بتعرفي اللي أكل كف على وشه أنا تعبان فين اللي عم كبكن فيهن و إشتغل فين والله بينهدوا لملوك فكرة اللبن هنن ما حبوها اللبن المطبوخ ماحبوها حكولي قال في ناس عم تعمل مشروع اسمه كوك فور سيريا وطالبين متطوعين إلك مصلحة أووف أنا اللي إلي مصلحة أنا روح قلبي العمل التطوعي ورحت وهون تعرفت على أشخاص وعلى ناس وصار في وسائل إعلام إن كان سوشال ميديا أو تلفزيونات أو كذا كانوا عم يواكبوا موضوع كوك فور سيريا اللي أنا كنت متطوع في وهادلون الأشخاص صرنا أنا وياهم اصدقاء ومدري شو وكذا وكنت عم بحكيلهم عن أحلامي وعن أنه شلون أنا بدي أرجع أطبخ وعرضوا أنه يساعدوني والحمدلله رب العالمين حلمي صار أسرع ما أنا تخيلت هلق ما بقلك أنه أنا هيك كنت متخيله لأ هو أحلى بكثير مما أنا كنت متخيله

نسرين طرابلسي العمل الخيري كان بمثابة إعلان أو ترويج عن وجود شيف بيعرف يطعمي أعداد كبيرة بلقمة طيبية وبمطاعم مؤقته بتفتح لفترة محدودة أو أكشاك الفلافل الخيرية التطوعية بسوهو مطرح ما صار الحلم كتير قريب

عماد أرنب أول بوب آب (ظهور) لإلي بكولومبيا رود اللي هو الفلور ماركت هي صالة بس وسع فيها طاولتين وبالزور بالزور 24 شخص بلشنا على أساس بدي أعمل بوب آب ريستورينت (مطعم يظهر فجأة) لمدة 14 يوم كل يوم عشا بتذكر كنت عم بشتغل هونيك قبل بيوم لمّا إجت وحدة رفيقتي قالتلي  من ورا ظهري همست قالتلي نحنا وي سولد أوت (قمنا ببيعها) قلتلها بعرف أنا كنت مفكر أنه وي سولد أوت لأول عشاء يعني 24 مقعد لأول عشا راحوا قالتلي نونو يو دونت نو يو دونت أندر ستاند وي سولد أوت ( لا لا أنت لا تعرف لم تفهم نحن بعناهم) هون قلبي رجف من الخوف بتصدقي يعني مثل كأنه ماعدت أعرف أشتغل إنه شو عم تحكي أنتِ الحمد لله رب العالمين الله أكرمني من وسعه وإنباع كل التيكتات من أول يوم بما أنه الموضوع إجالي من قصه خيرية يعني أنا حسيت رب العالمين كافأني لأنه أنا اشتغلت بمشروع اللي هو كوك فور سيريا ( أطبخ من أجل سوريا ) حبيت أدمج الشغلتين ببعضن يكون الشخصي مع العام صار يجني ناس تقلي أنا بدي عرس أنا بدي حفلة عيد ميلاد أنا بدي كذا عجبتني الفكرة واستمريت فيها وصرت أشتغل بالكيترينج فقررت أنه أيّ شي بيجني مثل هيك هو لإلي ولإلي حصراً بس البوب آب ريستورنت اللي بعملون دائماً بيكون معي شريك اللي هو المؤسسة الخيرية أو من الأرباح أو بتكون كلها لإلهون وأنا بعمل فولانتير(تطوع) بوقتي نفس المكان اللي بكولومبيا رود يلي بسوق الورود رجعنا أخدناه بدل الإسبوعين 6 شهور وجمعنا فيه الحمدلله رب العالمين مبلغ كتير محترم لمنظمة أطباء بلا حدود بالشمال السوري  بما أنا المتطوعين اللي معي ماعندن الفكرة ما عندن خبرة فصرت أعمل محل صغير بنعمل فيه فلافل بار اللي هو ببعتلن الحمص جاهز السلطات كله متبل جاهز والفلافل مقلية خالصة بس أنا بدي واحد يحط رغيف الخبز يحط فوق منه هالمكونات ويعطيه لهالزباين أول محل قدرت حصله كان بسوهو و أنا من هون علقت بسوهو صار حلم أنه أنا افتح محل بسوهو بس كان هذا الحلم كتير بعيد لأنه سنترال لندن كتير غاليه وأنا إمكانياتي كتير ضعيفة وحتى لمّا إجاني ناس تقلي تعال نحن بنشاركك و بنفتح سوى ومدري شو كان الموضوع فيه نوع من أنواع الإستغلال و و وأنا ما بدي بيع هذا الجهد اللي أنا إشتغلت عليه وهذا الإسم اللي تعبت عليه هيك ببلاش

نسرين طرابلسي عماد مثله مثل كل الناس كورونا كانت بالنسبة إله خربان بيت بس روح المغامرة خلته يتجاوز كل المخاوف والمحاذير وما يعمل إلّا اللي براسه

عماد أرنب مع خربان البيت إجى ضو أنه العالم صارت ما تصبر بدها تسلم مطاعمها ومدري شو كذا وإجتني فرصة المحل بي سنترل لندن الحمد لله كانت مغامرة حطيت كل مدخراتي يلي تعبت فيهن ومدري شو وكذا بهذا المحل وفي ناس تقلي مجنون حدا بيأخذ محل بشهر حزيران 2020 لندن عم تعوّي مدينة مهجورة بنتي بتقولي بابا شوي تاني هيطلعولنا الزومبيز إنه يعني وين أخذنا شو وطالع تأخذ محل بالطابق التاني ومدري شو وكذا بس أنا حسيت إنه هاي فرصة ياهلق يا أمّا أبداً ماحتصير وضليت من شهر حزيران 2020 ل17 أيار 2021 لحتى عملنا فرندز أند فاميلي(الأصدقاء والعائلة) أول يومين إتدربنا فيهم وطلعنا المنيو(قائمة الطعام) تبعنا ومدري شو بعدين لحد ما الله أكرمنا وفتحنا محلنا ب19 أيار ولليوم الحمد لله رب العالمين إقبال حلو كتير والناس عم تشكر منه الحمد لله رب العالمين طاير عقلي ومبسوط خير الله على فكرة أنا صرت زارع خمسين ياسمينه بالمحل ما عم تطلع هون لاح يهلكوني ما عم تطلع بس الياسمين هو دمشق البلاطات الزرق اللي بالمطعم هنن دمشق الصور هنن دمشق أنا شلون بشوفها كله كان يقلي أنه يلله هلق صار الوقت تسمي سيرين ريستورنت لأ هو ما نو ريستورنت أنا عم بعمل شي هو سيرين كيتشن هو مطبخ هو القهوة أنا ما عندي كافيه ما عندي لاتيه ما عندي اسبريسو أنا عندي فنجان القهوة اللي نحن بنشرب بيوتنا مطبخ عماد السوري هو ما بيمثل كل سوريا ما بيمثل كل دمشق هذا شغله شعبية متواضعة بتمثل عماد فقط أيّ أخطاء بتكون منه بتكون نتيجة خطأي أنا أيّ شي منيح بكون هو من الموروث الثقافي لدمشق حاولت أنقل في رسالة حب من دمشق إلى العالم وإلى لندن تحديداً

نسرين طرابلسي من مطبخه  بيبعت عماد رسالة حب من دمشق للعالم عن طريق لمسات وبصمة دمشقية من رؤيته الخاصة ويبدو الرسالة وصلت لإحدى أشهر دور النشر

عماد أرنب دار نشر هاربر كولينز تنشر لأسماء كبيرة بعالم الطبخ وحتى عالم السياسة والفن و كذا بس المطبخ السوري هو بوك أوف ذا يير(كتاب السنة) لشركة الإنتاج اللي شوي مميز بكتاب الطبخ أنا ما عم بعمل وصفات مثل أن 9 جرام ملح 2 جرام فلفل أسود أنا ما بحبها هاي القصص نحن مثل ما منطبخ مثل ما أمي الله يرحمها علمتنا رشة فلفل رشة ملح دوق يا أخي

نسرين طرابلسي الشيف عماد حكّاء من الطراز الرفيع واللي سمعتوه اليوم مونتاج لساعتين كنت مضطره أختصر منن كتير بالختام سألته شو بتحط عنوان لقصة حياتك فحطلي كوشه عناوين وقدم نصيحة لكل مين حابب يفتح مطعم ببلاد الإغتراب ويتحول من لاجئ لمدير بترككم  بالختام مع الشيف عماد أرنب ( اللاجئ المدير)

عماد أرنب عنوان قصتي حب عنوان قصتي نجاح عنوان قصتي إيجابية عنوان قصتي توفيق من رب العالمين مرضي كلن هادلون أنا عنوان قصتي دائماً في تبرعات من مطعمي قبل وهلق ولبعد مليون سنة هذا الموضوع ما بياخد من البزنس على فكرة مشان تكوني بالصوره هذا بيضيف لإله المصاري اللي بتتبرع فيها ممكن توفر عليك بالتاكس (الضرائب) وأحسن ما تدفعها لبي آر كامبينيي(شركة بي آر) فيك تدفعها للي فعلاً هنن بحاجة هذا التبرع إحساسك بالفخر لمّا أنت بتشارك مؤسسة خيرية بعمل بزنس إحساسك بالفخر و إحساسك بالرضى عن النفس أبداً لا يقدر بثمن