آدم آغا - كيف جنى المال وهو نائم في سريره؟

نص الحلقة :

آدم أغا اتبعت tactic لا تحط البيضات كلهم بسلة واحده يا تراحب بك تراحيب المطر أنا هذا الشاب السوري اللي بيلبس توب وبيلبس شماغ و عايش مع البدو في مواضيع ما بحسن أحكيها لأن إذا بدي أحكي بهذا الموضوع ما فيني قوله هيك قصة وصولي على بريطانيا مضحكة جداً و ماشي دائماً بمبدأ تهادوا تحابوا أنا يمكن الشخص الوحيد بالعالم اللي ما عمره عمل CV لمّا درسنا السوق اصطدمنا بحيط حاول تشتغل شي أنت ونايم بالبيت يدخلك مصاري سميته قصة قلم

نسرين طرابلسي اللاجئ المدير بحلقة اليوم هو السيد آدم آغا من أشهر البائعين العرب على ebay في المملكة المتحدة مؤسس brand Made in Syria من أول ما تقعد مع آدم خمس دقايق بس بتكتشف أنه تاجر قادر على تقييم الأشياء والناس وبيعرف الفرق بين الأصلي والتقليد والantique حكايته درس لكل الراغبين بعمل business online بهالزمان زمن الحروب و اللجوء والتضخم والركود الاقتصادي بالأول تعالوا نتعرف مين هوي آدم آغا 

آدم أغا آدم أغا نجدي المولد والمنشأ شامي الهوى بريطاني الإقامة خلينا نقول والدي الله يرحمه كان من أهم مصنعين الصوتيات بسوريا طلع عالخليج أسس هنيك أجينا نحنا بضمن هالعجقة ولدت بالرياض تربيت بالمدارس الحكومية بالرياض أنا هذا الشاب السوري اللي بيلبس توب وبيلبس شماغ وعايش مع البدو الشي الوحيد اللي بميزني عن البدو شكلي بس لمّا بحكي معهم بفوت معهم بالنقاش بكون بدوي مثلاً لمّا تكوني عم تسلمي على واحد جاي من الجنوب من جيزان يا تراحب بك تراحيب المطر وجود هالعبارة بحياتك وتقدري تميزي أهل البلد بلكنتون أو بلهجتهم بتقربك أكثر لهدول الناس ما بدنا نطول عليكم عشنا بالرياض ثلاثين سنه سعودي بكل التفاصيل بلبسي بحياتي بأسلوب حياتي بعاداتي بهواياتي روح قلبي روح أقعد بالبر شغل حطب وأقعد كنت آخذ أمي الله يرحمها كتير نقعد بالبر شقشقة الضو بالبر مع الحطب شي ما ممكن تنسي ريحة الحطب اللي بتعلق بالأواعي لمّا كنا نرجع عالبيت غير شكل بس لمرحلة من المراحل حسينا حالنا موجودين بالسعودية سعرنا بسعر أي شخص إجا من يومين على هي البلد ما أن أي مميزات حسينا بهالمشكلة هي تحديداً لمّا بلشت بدي أشتغل أنا صاحب شركة بالسعودية عندي سواقين عندي موظفين عندي محل بس أنا ما بملك شي من هالشركة ما بمون طلع مصاري من حساب الشركة من البنك كل الوقت مضطر إني إلجأ للكفيل لحتى طلع مصرياتي من الشركة ماني مزعوج كثير كنت من الموضوع بس مقيدني لمّا بشوف قدامي قصص الناس اللي كفلاتها أخدت شغلها بليلة ما فيها ضوء قمر وطلعوا على المطار بالزنوبة و بالبيجامة تسفروا وهن أصحاب ملايين كان هذا الموضوع دائماً محل قلق لإلي اتبعت tactic لا تحط البيضات كلهم بسلة واحده فتحت أكثر من مشروع وكل مشروع كان باسم شخص مختلف كرمال أمن حالي قدر الإمكان بعرف أن أنا بكون عم خالف القوانين بهالموضوع هاد بس للأمانة يعني كل الناس اللي كانت عايشة بالخليج كانت شغالة بهي الطريقة لأن الحل الثاني أنك تكون موظف ومعلش أجير بكعكة عم تأخذ راتبك بأخر الشهر وصلى الله وبارك 

نسرين طرابلسي آدام عنده الجرأة يحكي اللي له واللي عليه حكالنا عن شغفه بالتجارة وكشفلنا السر اللي خلاه يكون دوماً بالمبيعات الرقم واحد 

آدم أغا من يوم يومي تاجر بشتغل بالتجارة لمّا كنت بالمرحلة المتوسطة عملت مشروع للمدرسة والمدرسة دفعتلي عليه مصاري يعني متخيلة كان عمري يمكن 15 سنة وهذا أول income إجاني اشتريت منه ساعة Casio بتشتغل remote control للتلفزيون لأني كنت حاببها إذا بدور بين كراكيبي عالأغلب لسعتا الساعة موجودة بطريق الصدفة فتت بمجال القرطاسية والمستلزمات المكتبية كان إلي صديق اسمه حسان كيكي الله يذكره بالخير بيشتغل بشركة مستلزمات مكتبية قلي أنه لازمينون مناديب بالشركة رحت تعرفت على مدير شؤون الموظفين بالشركة عملت معه interview بدون CV أنا يمكن الشخص الوحيد بالعالم يلي ما عمرو عمل CV نزلوني تاني يوم على السوق رحت شفت شوفي عندهم أخذت عينات ما برضى كنت روح على مكتبة صغيرة أو بقالية صغيرة بيعن رحت على الbig fish طوالي رحت عالsupermarket و الhyber عملتلن أوردرات كانوا ما حلمانين فيها هون أنا كان عمري 18 سنه شخص عم يفوت على hyber ما بيحط order شنتاية مدرسية أو دفتر بحط order طبلية palette طبلية ممكن يكون وزنها 500 600 كيلو من الدفاتر لمّا رجعت لعند مديري من بيت الحلبي الله يذكره بالخير هلق بأمريكا تفاجأ من الشغل صار يقلهم للشباب اللي تعبانين عليهم و جايبينن من برة السعودية ومدربينن هذا النموذج اللي بدي ياه عندي بالشركة هيك بدي الشباب يشتغلوا ما بدي هذا الorder اللي عم بيروح يبيعلي بـ100 ريال و200 ريال الحمد لله وهذا الشي يسجل لي بهذا الموضوع أني كنت دائماً رقم واحد بالمبيعات ما بصير رقم 2 رقم 2 كتير بعيد عني هذا الشخص يلي فايت لعند الزبون و حاطط بباله أنه فايت بدو يبيعه عشان بده ياخذ العمولة هذا بيفشل فوت لعند الزبون ناوي أطرق صحبة معه وماشي دائماً بمبدأ تهادوا تحابوا ما بفوت لعند حدا ما جايبله معي هدية وخاصةً إذا كانت هي الهدية بيستفيد منها هذا الشخص 100 واحد عم يجلبله agenda وتقويم لمسؤول المشتريات جبله شغلة يستفيد منها يحبها ينبسط فيها حتى لو كانت علاقة الID تبعه بس تكون بفكرة حلوة أو بترتيبة حلوة لاح يلاقيها منك قد الدنيا الحمد لله توفيقة من الله يمكن أنا بلاقي حالي مقبول عند كثير من الناس ما أطلع من عند الزبون إلّا و أخذ من order أو أخذ منه وعد أنه لاح يعطيني order 

نسرين طرابلسي سوق العمل فتح بابه أمام آدم آغا في السعودية كمندوب مبيعات استخدم مهارته بعقد الصداقات لكسب ثقة رجال الأعمال لكن ما في مندوب مبيعات بيجمع ثروة من وراء وظيفته بس بالفقرة الجاية راح يحكيلنا آدم قديش مهم كل تاجر يدرس السوق ويعرف حاجات الزباين

آدم أغا حسيت أنه في مشكلة بالأسواق الخليجية بالحقائب المدرسية وتحديداً مع طلاب المدارس الinternational صرت أنزل عالصين صمم و نفذ حقائب مدرسية خصوصي لطلاب المدارس الinternational لهم متطلبات معينة بالحجم منلبيلن هذه المتطلبات والحمد لله حققنا أرقام بيعية كتير ضخمة بهذا المجال فتحت أول محل لإلي بالرياض سميته قصة قلم Pencil Story واحدة من المشاكل كانت الكتب تبع المدارس international الضخمة يعني الولد يروح عالمدرسة حامل معه كتاب 200 و300 صفحة أنا صرت جزئلهم هذا الكتاب جبت ماكينة من الصين نفرط الكتاب ونعمله binding أو تغليف من أول وجديد نعمله ياه 3 أجزاء 4 أجزاء يصير الولد أول السنة ياخذ الجزء الأول لمّا يخلص يصير ياخذ معه الجزء التاني إذا اضطر ياخذ الجزء الأول والثاني معه الثالث بالبيت بهالترتيبة صارت الشنتاية تنحمل مع الولد اللي هي أصلاً أنا عم صنعها بطريقة كويسة وصار الولد عم ياخذ معه متطلباته حصراً بس عالمدرسة ماعم ياخذ فوق حاجته الحمد لله مع أنه كنت بوسط الرياض إلّا كانت الناس تجيني من أقصى الشمال ومن أقصى الجنوب لتشتري من عندي الشنتاية اللي أنا جايبها من الصين خصوصي لهالطلاب 

نسرين طرابلسي رغم كل هالنجاح كان في عوامل كتير ضيقت الخناق على آدم منها بداية تطبيق مشروع السعودة بالمملكة ومواجهة مواليد السعودية من جنسيات عربية خطر خسارة أعمالن وإقاماتن وفوق كل هاد محدودية السفر بالpassport  السوري اللي حسمت قرار الرحيل 

آدم أغا واحدة من الأشياء اللي تسعودت مجالات المكتبات والقرطاسية لأنه أنا بندرج كمان تحت بند خدمات الطلاب بهذا المجال وللأسف يعني كان موضوع السعودة جديد عالناس وكانوا مانن قبلانين يلاقوا شب سعودي واقف بالمكتبة عم يبيعهم وأغلب زبائننا نحن بالمحلات كانت سيدات وأغلبهم أجانب منن من أهل البلد لمّا يجو عالمحل يلاقوا شب سعودي واقف بالمحل يا ما يحكوا معه ما يفوتوا حتى عالمحل مع الوقت زاد ضغط علينا صرت لازم تخلي في 30% و 40% من الناس بالمحلات سعوديين وصلنا مرحلة بصراحة ندفعلن رواتبهن هني وقاعدين بالبيت مشان نخلي السجل التجاري تبعنا شغال تعقدت الأمور أكثر صار في حد أدنى للرواتب ولازم نسجله بالتأمينات الاجتماعية هذا الموضوع كثير كسرنا نحن وبالسعودية أنا ومجموعة من الشباب عملنا عريضة ووجهناها للملك فهد الله يرحمه وقتها سميناها مواليد السعودية لهم حقوقهم طلبنا منهم بس نحن مواليد السعودية لا تعطونا الجنسية بس أعطونا إقامة دائمة ريحونا أعطونا إمكانية أنه نشتغل الإمارات لقت حلة للمواليد تبع البلد حتى ولو ماعطتهم الجنسية الإماراتية أعطتهم جنسية بلد تانية بس يعاملوا معاملة الإماراتيين مازال هني حاملين لهي الجنسية بالسعودية ما كان في أي خيار لإلنا بهي الفترة كان شغلي لأنه مرتبط كتير مع الصين الpassport  السوري كان عقبه كنت أول آخد Multi entry visa متعددة الزيارات للصين صارت الحكومة الصينية ما تعطيني إلا 30 يوم إي أنا 30 يوم ما بكفوني بالصين كنت روح أقعد بالقرى بدي أقعد بالمصانع أقعد على خطوط الإنتاج هذا الموضوع قيدني كتير مع موضوع السعودة مع موضوع أنه الكفلاء بالسعودية كتير عم يعذبوني وكتير متطلباتن عم تزيد قررت أترك وأمشي 

نسرين طرابلسي على الرغم من أنه آدم بيحكي بالتفصيل لكن في مرحلة حسيت أنه بلش يركض ويختصر يمكن ليتفادى ألم ووجع الهرب من مكان لمكان من السعودية لسوريا لمصر ثم إلى المملكة المتحدة 

آدم أغا كنت مفكر بمرحلة من المراحل أني خلص أنتقل على سوريا حتى نزلت رحت عالحلبوني ورحت على الأماكن هديك اجتمعت مع تجار من سوء حظي كانت بداية الأزمة بسوريا كان دائماً عندي هداك الإحساس يلي إذا دبكت بسوريا لح تكون الدبكة طويلة رحت أسست شغل بمصر اشتريت بيت بالقاهرة ونزلت على الأسواق تبع القرطاسية الفجالة بمصر بعرف تجار بلشت أسس لأني بدي أنتقل على مصر وبالفعل نقلت زوجتي وبنتي يارا على مصر بعد ما أخدت بيت بلشت المظاهرات بمصر طبعاً أنا لسا شغلي شغال بالسعودية لسا ما نهيت شغلي بالسعودية بهديك المرحلة بس كنت خلص يعني أخدوا مني الشركة في مواضيع ما بحسن احكيها لأنه إذا بدي أحكي بهذا الموضوع ما فيني قوله هيك بدي أحكي كله وهذا الموضوع كتير كتير مزعج بصراحة كان لإلي قصة وصولي على بريطانيا مضحكة جداً كان إلي صديق بيشتغل بنفس مجالي بالقرطاسية وصارت معه نفس المشاكل بالظبط يلي أنا مريت فيها بمجال عملي كان معو visa لأمريكا بس هو ما بدو يروح على أمريكا أخد ولاده و إجا على لندن نزل بمطار Heathrow وقدم لجوء بمطار Heathrow وبعد شهرين ثلاثة انقبل لجوئه واستقر ببريطانيا حكالي شو اللي صاير عجبتني الفكرة أنا كمان كان معي فيز لأميركا حملت حالي أخذت رنيم والبنات وطلعنا عالمطار على أساس رايحين على أميركا transit Heathrow نزلت ب Heathrow وقدمت لجوء بمطار Heathrow ونفس الترتيبة اللي مر فيها صديقي أنا مريت فيها انقبل لجوئي واستقريت ببريطانيا الحمد لله لما كنت شوف ناس مقدمين لجوء إلهم سنين ولسا عم ينتظر بموضوعن أنا خاف بس خلال 3 شهور كنت آخذ الإقامة ببريطانيا 2013 

نسرين طرابلسي الناس اللي وصلت بالطرق نظامية على بريطانيا وقدموا لجوء كتار منهم آدم أغا وعائلته لكن مثل كل لاجئ في البداية كان لازم يمر بمضيق اسمه الJob center 

آدم أغا صدقاً ما كنت بعرف شو معنى الJob center أو شو بيعمل الJob center أنا بعرف أن هذا مكان بنروحه بساعد الناس ليلاقوا شغل كنت أجهل تماماً أن الحكومة البريطانية ممكن تعطيني أي نوع من أنواع المساعدات المادية رحت عالJob center بمدينة بريستول دخلت قابلت أحد الموظفين حكيتله أني أنا كنت بالصليب الأحمر وقالولي روح عن الJob center عشان أنت عاطل عن العمل لحتى يلاقولك شغل قال ok فتحت حساب بالبنك إي هي حسابي بالبنك قال ماشي نحن بس مر لعنا كل أسبوع منشوف بنبحث معك موضوع العمل تبعك شو ممكن تشتغل وخلال الفترة هي منصير مندفعلك بحسابك بالبنك مبلغ مادي ومندفعلك أجار البيت عن طريق البلدية وهيك أنا كنت جاهل بهذا الموضوع ما كان عندي فكرة أن الJob center لهيك فعل مصاري لحتى يساعدني بمصروفي بس بنفس الوقت كنت مصدوم ليش هدول عم يدفعولي هي المصاري تحت أي بند عم يدفعولي هي المصاري وبصراحة ما كنت مبسوط إنه في واحد عم يجبرني أجي كل أسبوع لعندو لحتى أمضي كرمال يدفعلي المصاري ولحتى أضحك عليه بطريقة أو بأخرى قوله أني أنا عم أقدم على شغل وأنا فعلياً ما عم قدم على شغل لأني أنا ماكنت الشخص يلي ممكن يقدم على الشغل خلال هالبحث الذي كان يعمل معي موظف في الJob center قدمنا على شركتين تلاته لما شافوا خبرتي بالأسواق الصينية عملوا معي interviewوعرضوا عليي وظائف بس عرضوا عليي وظائف من الصين انبسطت قلت أُخ تمام خلال هي الفترة قدمت على وثيقة سفر هون بسموها travel document رحت على مكتب السفارة الصينية لأخذ فيز على الصين قالوا لأ نحن ما منعترف بالtravel document ما منعطيك فيز عليه وبالمقابل أنا بحكم أنني لاجئ ممنوع استخدم وثيقة السفر السورية تبعي فشلت أي خطة لأني أتوظف عند هي الناس عم أحكي عن أسماء كتير ضخمة بالأسواق البريطانية بمجال عملي تراسلت مع المصانع اللي بعرفها بالصين لنشتغل جبنا شوية أفكار بلشنا نطبقها على أرض الواقع لما درسنا السوق اصطدمنا بحيط أن الطالب هون ببريطانيا ما بيشتري قرطاسيته ما بيشتري شنتايته المدرسة بتعطي كل شي وبالتالي أنا سوقي رح يكون كتير ضعيف 

نسرين طرابلسي صعب كتير يكون عندك خبرة كبيرة بمجال وتلاقي طريقه مسدود ببلد اللجوء لأن هذا بيعني أنك لازم تبدأ من الصفر بمجال تاني خاصةً أنه آدم كان ناوي يطبق نصيحة صديقه أنه يلاقي شغل يجبله مصاري وهو نايم بالبيت اسمعوا كتير منيح لأن رح تلاقوا نصائح ذهبية لكل شخص حابب يكون الeBay مصدر دخله 

آدم أغا بيوم من الأيام إجا أحد التجار الكبار بالسعودية هو صديق شخصي لإلي من أثرياء المملكة إجا ليزورني بلندن من سيرة لسيرة حكالي عبارة كانت هي المنحنى الضخم أثر بالفترة اللي بعد هي قلي حاول تشتغل شي أنت ونايم بالبيت يدخلك مصاري وطبعاً ما في شي بدخلي مصاري أنا و نايم إلا الonline لقيت الeBay وحدة من أهم المنصات لهذا المجال فتحنا على هالyoutube صرت أتفرج ما لقيت معلومات كافيه لقيت في coach عايش بمدينة ثانية ممكن يدربني كيف أشتغل eBay بمقابل مادي رحنا أخذ مني بالساعة الوحدة 100£ قعدت أنا وياه جلستين تلاته أخذت منه المعلومات اللي عنجد بتساعدني لحتى كون مو شخص عم يبيع ويشتري عادي عeBay شخص حابب يكون eBay مصدر دخله الeBay منصة ممكن تبيعي عليها أي شي بيخطر لبالك شي ممكن أنت مقررة تكبي أنا بنصحك قبل ما تكبي صوري وحطي عالeBay لأنه ممكن تلاقي شخص ما بمكان ما بهالمعمورة مهتم أنه يشتري منك هذا هو الeBay قالولي أنه في سوق اسمه سوق أحد سوق الكراكيب صرت روح على سوق ببريستول بمنطقة اسمها كليفتن عم بحكي هذه التفاصيل لأنه كليفتن منطقة راقية تعتبر ببريستول وبالتالي سوق الأحد التابع لمنطقة كليفتن لح يكون في كراكيب راقية بأول زيارة لإلي لهالسوق لقيت وحدة ختيارة جايبة الكتب تبعها كليتها مكتبتها كليتها بدها تبيعها عندها استعداد توزع هدول الكتب ببلاش عالعالم بس ما بدها ترجع فيون مرة ثانية عالبيت عملت معها deal أخذت الكتب تبعاتها كلياتهم كان معي سيارة 7ركاب طبقتن بهالسيارة ورحت فيهن عالبيت مرتي كانت قاعدة جنبي مانها عرفانة شو بدها تقلي أنه أنت شو بدك فيهن هدول الكتب أنت إنكليزيتك يالله مشي حالك فيها وهدول الكتب كلهم بالإنكليزي شو بدك تعمل فيهن وصلت عالبيت عملت حساب عالـ eBay التقييم تبعه صفر لأني أنا لا شاري ولا بايع من عليه الشخص هداك نصحني أني أنا أول أشتري على هذا من هذا الحساب أي شي محتاجه بالبيت كرمال يصير عليه تقييم للحساب حتى لو كان كمشتري وهذا اللي صار اشتريت كم شغل شاحن جوال غلاف جوال ما بعرف شو هيك قصص بسيطة منه لحتى أنا شوف كيف الآلية حتى كيف التغليف كيف القصة لح تجي لعندي ومنه لحتى يصير عندي تقييم عالحساب جبت الكتب كل صنف على الeBay له آلية مختلفة لعرضه الكتب دار النشر بالأصل لما بيكون بلش يبيعها عالـ eBay هي وجديدة بإستخدام الbarcode تبعها والـ isbn تبعها بيفتحولها code يعني فيك تستخدم الصورة اللي حاطتها دار النشر بالأصل أنت مجرد ما تعمل scan أو تدخل الbarcode الeBay بجيب بيانات الكتاب كاملة بيحطلك بس أنت بتحدد حالة الكتاب جديد قديم مثل الجديد تعبان acceptable وبتحط السعر اللي بدك ياه وبتعرضه لقيت ناس عارضة هي الكتب عم تبيعها بـ 2.49 2£ 49pence أكيد هني عم يربحوا فيها 2.49 بس شو صرت أعمل أنزل تحت الـ2.49 يعني حط 2.47 أو حط 2.46 صحيت تاني يوم الصبح لقيت الـ20 كتاب اللي حطيتون كلياتن كلن منباعين ومو لشخص واحد يعني فيه 20 شخص اشترى من عندي 20 كتاب بس النقطة أني أنا لما أخذت الكتاب رحت على مكتب البريد مغلفن تفاجأت أنه الكتاب بيكلفني لا أبعته لعند الزبون 2.49 طبعاً الأخ تبع eBay دربني كيف أشتغل عالـ eBay بس ما دربني كيف أحسب تكلفتي أنا تكلفتي خليني قول صفر حق الكتاب بس عندي عمولة eBayو paypal وعندي bakigingعندي شحن اللي هو شريكك المضارب الرئيسي بالبلد الroyal mail لما عملت الحسبة تبع paypal مع الeBay ومع الroyal mail لقيت حالي الكتاب بده يطلع كتير غالي ما لح ينباع ممكن يكون سعره مثل سعر الكتاب الجديد اللي عم يبيعه دار النشر مباشرة هون كان عندي خيارين يا أما بضل عم بخسر بهدول الكتب كرمال أبني حساب عالـeBay ويجيني تقييمات as a seller كبائع تساعدني بعدين لما بدي حط أي product ثاني يا أما بدي وقف لحتى لاقي  product تاني أنا اشتريت خسارتي وصرت بيع الكتب بخسارة لغاية ما وصل لحسابي عالـ eBay feedback كتير مرتب في نقطة كثير مهمة فوق هذه الخسارة كان أحياناً الكتاب يضيع ما يوصل للزبون ولأنه أنا عندي نسخة واحدة بس من كل كتاب ما فيني أبعتله غيره بالتالي رجعله أعمله refund رجعله المصريات بالتالي هون بتكون خسارتي خسارتين وأحياناً يوصل الكتاب لعند الشخص يكون مثلاً بقلب الكتاب من جوا محطوط خط مثلاً أو highlight معلمة عالكتاب أو كذا و كون أنا حاطط أنه  like new بهي الحالة لما يكون في أي scratch بقلب الكتاب لازم يكون acceptable الـcondition تبعه وبالتالي الزبون مجرد ما يقلي هيك ما ناقشه طوالي رجعله المصاري بس لأني أنا مهتم إني كون عم ببني تقييم على هذه المنصة لأن ببريطانيا business معتمد على review بلا review أنت nothing 

نسرين طرابلسي صار عند آدم حساب خسران مادياً بتقييمات عالية على eBay لكنه أثناء البحث في سوق الكتب وجد أنه بعضها بيحقق مبالغ عالية بيوصل فيه سعر الكتاب إلى 200 أو 300 £ وخصوصاً الكتب القديمة والنادرة اللي بتدخل المزادات 

آدم أغا عجبتني الفكرة بس سوق الأحد ما بلبيني بهذا الموضوع لقيت أنه بالجمعيات الخيرية في من هذه الكتب القديمة معروضة وبأرقام كثير زهيده دورت على الinternet طلعت ليستا بالجمعيات الخيرية اللي الموجودة على مستوى بريطاني كلها باسكتلندا بأيرلندا بويلز وبإنكلترا أركب سيارتي وروح لف عليهم واحد واحد دور على الكتب القديمة اللي جلدتها تعبانة ما أهتم شو الـSubject  تبعها أو شو الموضوع تبعه مجرد ما لاقي كتاب من هذا اللي مجلد تجليد القديم بني أسود عنابي أشتري بباوندين و بـ3 و بـ4 ما في مشكله جيبن معي عالبيت صورهم eBay بيسمحلي حط 12 صورة دور شوف إذا في حدا عارض مثل هذا الكتاب عشان آخذ الestimated price تبعه وأعرضه عالـeBay هون اختلفت معي الأمور هون صرت تعمل profit  بالـeBay في options في مزادات أشتري كتب قديمة من المزادات اللي عالـeBay وجيبا عالبيت ظبطها ورتبها وأعرضها أحياناً الكتب هي تكون مجموعة سلسلة تكون ناقصة كتاب دور على هذا الكتاب جيبه أشتري من الـeBay لأنه في ناس عم تبيع أجزاء لحالها كمل المجموعة تبعي ورد أعرضها عالـeBay وخاصة الموسوعيات الضخمة اللي تكون أحياناً مكونة من 30 مجلد و40 مجلد هي أصلاً شحنها للعميل صعب جداً أنا اخترعت آلية لشحنها ونجحت جزءها على أكثر من طرد وأبعتهم كلهم مرة واحدة للزبون صار عندي مكتبة ضخمة بالبيت فيها أكثر من 2000 مجلد كلن كتب قديمة وبطريق الصدفة أحياناً تطلع معي الكتب موقعة من الكتاب تبعها ومترخة كان في عندي كتب عمرها 200 سنة أناجيل للعائلات عمرها أكثر من 300 سنة مورثة من عيلة لعيلة لعيلة بس وصلت لجيل مانو مهتم عطاها للجمعيات الخيرية وأنا إشتريتها من الجمعيات الخيرية وبعتها عالـeBay بأرقام كتير ضخمة  

نسرين طرابلسي  رغم مربح الكتب القديمة لكن الحصول عليها ماكان سهل ومع توافد المزيد من اللاجئين السوريين وتوسع الجالية ومتطلباتها بدأ طموح آدم يرجع يلح عليه ليعمل موقع وبضاعة خاصة فيه كيف صار الأول عالمياً اللي بسمي منتجاته باللغة العربية على eBay وكيف فتحت له أسواق العالم خلونا نسمع سوا 

آدم أغا بلشنا نتعرف أكثر على الجالية السورية اللي كانت عم تجي بهديك الأيام على بريطانيا من خلال حديثهم على Facebook وعالقروبات لقيت كلهم عندهم مشكلة أنه إذا بدن يشتروا أي شغلة بتخصهم وهم موجودين خارج مانشستر ولندن تحديداً مضطرين ينزلوا سواءً على لندن أو مانشستر ليشتروها صرت أنا أشتري من هي الشغلات من الأسواق المحلية وأعرضها عالـeBay لنشوف شو ردة الفعل كانت المشكلة أنه العالم ما عم تعرف أنه نحنا عم نعرض هذه المنتجات عالـeBay مانن متوقعين أنه مصاصة المتة ولا قالب المعمول ولا قالب الفلافل يكونوا معروضين عالـeBay صرت أعلن لمنتجاتي على جروبات السوريين اللي الموجودة ببريطانيا وطبعاً الـeBay بحكم أنه هي منظومة متكاملة بتحمي البائع وبتحمي المشتري ما كنت محتاج أقنع الشخص بمصداقيتي ليشتري من عندي هذا الصنف طبعاً وحدة من المعضلات التي كانت عم تواجهني المسميات كيف بدي سمي هالبضاعة هي عالـeBay لأنه لازم نلاقيلها legal name نسميها ولازم نختار القسم يلي تابعة لإله لنحطها فيه الحمد لله كنت السباق لأني أستخدم اللغة العربية بوصف المنتجات على منصة الـeBay أنا أول شخص عرض منتجات على الـeBay الوصف تبعها كان باللغة العربية بصراحة ما عاد عندي وقت لموضوع الكتب موضوع الكتب كان مرهقني جداً ياما نايم بالسيارة على الطرقات السريعة لأني أنا مسافر 300 400 mile بعيد عن بيتي وبصراحة كنت أستخسر أدفع 100 £ أني أقعد بفندق نام بالسيارة عملت مزاد على مجموعة الكتب اللي كانت عندي بالـeBay على الeBay وبعتن كلهم بيعة وحده وتفرغت لأني أستورد بضايع من سوريا ردينا وسعنا صرنا نجيب من مصر من لبنان من العراق من تركيا كل هذا وأنا ما قربت عالصين صرت أستعين بyoutuber مشهورين بأوروبا أمثال شام الأصيل الله يذكره بالخير صرت بعت الproduct تبعي متل تقالة اليبرق دولات القهوة النحاس حفارات الكوسا يستخدمها بشغله وبنفس الوقت يسوق لإلها ونحط الروابط بالفيديوهات تبعه ونعرضها صرت بيع لكل أوروبا لأميركا لكندا لاستراليا من مستودعي من بريطانيا تعرفت بهذه الفترة على مازن أوطاباشي حبيت لكنته الشامية أسلوبه حديثه اقترحت عليه أنه يعملي دعاية كانت الفكرة كيس حاطط بقلبه صابونة غار وكيس حمام وحجر حمام وميدالية مفاتيح سورية ونلبس مازن طقم العراضة الشامية والقبقاب وننزله بسنتر أمستردام يلفلف بهالسنتر ونحن عم نصوره وهو عم يوزع هالأكياس هدايا ونشرحلهم شو هي صابونة الغار وشو هي كيس الحمام الناس تحديداً اللي استلمت الهدايا شيرت عالsocial media تبعون الاسم تبعنا صرنا نبيع من صابونة الغار بأرقام ضخمة في ناس كتير ما ما متخيلة أنه من الزيت ومن الغار يعملوا صابونة مناسبة للناس اللي معن أكزيما صحية chemical free natural وبقدي عم تحكي الصابونة بـ2 € أو بـ2 £ واصلة لعندك رقم زهيد 

نسرين طرابلسي التاجر الشاطر بضل يدور على أسواق جديدة آدم ما اكتفى بزبائنه السوريين وفكر كيف يجذب المشتري المحلي الغربي لمتجره على eBay بس المصنعين الصينيين كانوا واقفينله بالمرصاد 

آدم أغا انتبهت لقصة كتير مهمة الأوروبيين كتير مهتمين بموضوع الطبيعة و إنهم يرجعوا للطبيعة وهن بيقبلوا أي فكرة جديدة ما زال عرفنا نوصلن ياها بطريقة لطيفة وأهم شي ما تكون مملة تعرفت على شاب عايش بلبنان اتفقت أنا وياه يعملي فيديوهات قصيرة مدتها بين الـ10 والـ20 ثانية نشرح فيها عن منتجاتنا بلشنا بمصاصة المته قدمناها للمجتمع المحلي بأنه هي straw بتستعملوها لتشربوا الherbal tea وبنفس الوقت للي عامل Hollywood smilemile وشريب قهوة يستخدم مصاصة متة عشان ما يتعب أسنانه مصاصة متة starting from 2.99£ ممكن تشتريها مع free delivery توصل لعندك تستخدمها لكل هالشغلات حققنا رقم كتير ضخم فاتوا علينا الأشقاء الأفاضل الصينيين صاروا يصنعوا مصاصة المتة أنا عم بيع المصاصة الوحدة 2.99 هم يبيعوا الأربعة خمس مصاصات متة بـ2.99 فكرنا بمنتج تاني نقدمه للجالية المحلية ما لقيت أحلى من القالب المعمول بيوم من الأيام قاعد أنا وزوجتي بالمستودع قلتلها تعي لنشوف نصور أنا وياك فيديو نورجي فيه الناس كيف بيعملوا فيه المعمول حطيته على الsocial media جاب مشاهدات ما كنت متوقعها قلت لأ بدي أعمله على نمط مصاصة المتة بطريقة إحترافية لو كلفني مصاري بلشت صنع قوالب معمول خشبية تناسب المناسبات المحلية مثل الChristmas الEaster صرت أعملهم قوالب معمول على شكل Christmas tree أشياء مكتوب عليها merry Christmasصرت أعملن ياها على شكل البيضة تبع Easter جبنالون قوالب فلافل يعملوا فيها Biggie Burgers على نفس مبدأ الفلافل العادية بس قطر القالب الفلافل يكون أكبر طورنا لقينا قوالب فلافل شكلها متل شكل الhotdog قدمنالون قالب الفلافل بنفس الطريقة اللي قدمنا فيه مصاصة المتة وقوالب المعمول والحمد لله كمان حقق أرقام مبيعات كتير ضخمة 

نسرين طرابلسي بعام 2017 إنهالت الاستشارات من تجار الجالية السورية على آدم إنه كيف قدرت تخترق الأسواق المحلية بهذا الشكل وتسوق منتجات سورية كتير خاصة فقرر آدم يعمل ورشات عملية ومحاضرات مجانية لتقديم خبرته بهذا المجال وبمجرد ما حط الإعلان إنهالت عليه الطلبات حتى وصل الخبر لا الـeBay 

آدم أغا لقيت مئات الأشخاص المهتمين بصراحة انبسطت كتير خاصة أنه كل الناس اللي بعثت أو خبرتني أنه هي مهتمة تحضر هاي هذا كانوا سوريين وعملت أول ورشة عمل للناس المهتمة بأنه تبيع عالـeBay بس بصراحة ما ما قدرتي ضل عم أدفع أجار صالات تواصلت مع مكتب الجالية السورية بمانشستر وافقوا أني أنا أستخدم المكتب تبعن المقر تبعن لأعمل ورشة العمل دعينا الناس من مانشستر وأطرافها لحتى يجيوا يحضروا ورشة العمل بعدين تواصلت مع الجالية السورية بليدز بعدين تواصلوا معي مكتب الrefugee council بوترفورد وصل خبر للـeBay أنه في حدا عم يعمل ورشات عمل للناس يدربهم بلا مقابل تواصلوا معي من الـeBay حابين يتعرفوا عليي كانت بأيامها عم يعملوا برنامج جديد بدن يقدموا فيه البائعين المميزين على منصة الـeBay عالمياً والحمد لله أنا كنت واحد من الأشخاص اللي لقوهم مميزين دعوني لحفلة تكريم كتير مرتبة بمكتبن بـeBay كان فيه إداريين من eBay من أميركا حاضرين بالحفلة عملوا عني وثائقي جابوا شخص من المصورين الوثائقيين تبع National Geographic قعد معي تقريباً أسبوع ببرنغهام يصورني بكل الأوضاع وبكل الأماكن ووين ما رحت ووين ما إجيت عرضت عالـeBay أن أعمل ورشة عمل عندهم بمكتبن بلندن وافقوا وفتحولي السقف وقالولي قد ما بدك ادعي أشخاص ليحضروا الدورة منه ورشة عمل كتير ضخمة بمكتبن بالـeBay حضرها أشخاص اكتشفوا الـeBay الناس اللي عم تجي لتشتري منتجاتي من على الـeBay هن ناس جداد أسسوا حساباتن عالـeBay خصوصي ليشتروا منتجاتي هذا الموضوع كان عم يعمل معادلة جديدة وعم يفتح أسواق جديدة للـeBay 

نسرين طرابلسي بيوم من الأيام إجى إتصال لآدم من مدير العمليات في eBay وطلب منه موعد وزاره بمستودعه الضخم بمدينة ولفرهامبتون لدراسة تطوير العمل الخاص بالمستهلك العربي والمسلم 

آدم أغا تناقشنا كيف ممكن نفتح أسواق جديدة للمنتجات العربية والإسلامية تحديداً على الـeBay بطريقة منظمة لأنه كنا لما نعرض منتجات رمضان ما كان في أقسام على الـeBay مختصة بهذا الموضوع كنا نعرضها تحت أقسام أحياناً مثلاً party decorations celebration decoration اشتغلت أنا والoperation manager تبع الـeBay أنه عملنا أقسام على الـeBay إسلاميات إحتفالات إسلامية وبالتالي أي شخص بالمستقبل فايت يعرض مستلزمات لزينة رمضان بيعرضها بالمكان الصحيح واللائق لإلها كبر الstoreتبعنا صار عنا آلاف الأصناف معروضة كلها محصورة بالمنتجات الشرقية والإسلامية عشنا العصر الذهبي

نسرين طرابلسي وبعد العصر الذهبي قلبت جائحة كورونا حياة كثير من أصحاب الأعمال فوقاني تحتاني شركات ضخمة تسكرت فما بالكم بتاجر بتندرج بضاعته تحت بند الكماليات يعني أول شي بيستغني عنه الإنسان بزمن الركود الإقتصادي حول العالم بس الحقيقة لما نحط الربح والخسارة قدام بعضن بيطلع عنا قصة حياة نتعلم منه درس كبير فرح أترككم مع آدم آغا ليختم بالعبرة حكاية اليوم من podcast The Refugee Boss

آدم أغا بتذكر الفترة التي كنت عايش فيها بالخليج ما أقبل إلا أشتري بصراحة أتقل ماركات أواعي أحلى ساعة أحلى نظارة أحدث موبايل عم ينزل بالسوق كل سنة روح أنا وزوجتي ناخد holiday بأرقى فنادق بس لما عم شوف بناتي هلق عم يكبروا قدامي وعم شوف كيف الأمور عن تصير أصعب وأصعب عم تتغير إهتماماتي حالياً أولويتي أني شوف بناتي دارسين أحسن دراسة ومتعلمين أحسن تعليم أحياناً بتراودني هديك الفكرة بأني خلص بكفي تتعب على هالمشاريع اللي عم تشتغل فيها وروح شفلك شي وظيفة تناسب خبرتك العملية بأي مكان بالعالم وإقبض راتبك بآخر الشهر وحط راسك بين هالروس وقول يا قطاع الروس بصحى من النوم بقول لأ لما فوت على مستودعي بحس حالي قاعد بمملكتي يللي داق لذة العمل الحر ما في يكون تحت مرؤوس يا ترى وأنا هلق أربعيني كم مرة فيني أسس لشغل مرة ثانية قدي البني آدم عنده طاقة تأسيس الشغل من الصفر مثل تربية الطفل قدي الواحد بضل قادر مع مرور هالأيام عنده إمكانية أنه يربي طفل من أول بس لساتني مؤمن أنه هذه المرحلة لح تعدي إن شاء الله عم بشتغل شغل إضافي بعيد عن مجالي كرمال أترك هذا المستودع و أترك هذا الاسم إلي عم يشتغل عليه قرابة الـ10 سنين قائم حتى لو كان عم بسجل خسائر وأملي بالله كبير إنه هالأزمة اللي عم تمر فيها المعمورة تعدي