كيف نتحرر من القوالب الضيقة التي وضعونا بها؟

نص الحلقة :

مها لو حدا حبسك ضمن إطار خانق ومنعك تعبر عن نفسك وشخصيتك الحقيقية، كيف رح تكون ردة فعلك؟ 

غالية تركي أنا كنت شخص كثير انطوائي ما يحب اطلع مع ناس وحتى لما بطلع مع أهلي غالباً بنذوي لحالي ولما أطلع معهم وفي حدا غريب ما بطلع برفض الطلعة نهائياً 

مها غالية تركي صبية سورية فلسطينية مواليد 1991، مقيمة في الإمارات من عامين، وتعمل بمجال إدارة المشاريع التسويقية والخدمات الإلكترونية 

غالية تركي كنت دائماً أسمع حكي بهذا الموضوع بالشارع، بالطريق بالبيت، بالمدرسة بأي مكان حرفياً بأي مكان ممكن يخطرلك 

مها بتشاركنا في بودكاست صارت معي تفاصيل تجربة قاسية وصلت فيها للموت بسبب التنمر وعدم تقبل الذات 

غالية تركي وبلحظة معينة شخص ما كسرني بسبب هاد الموضوع، فقررت إنه لأ خلص لهون وبس خلينا نقول ببداية ما بلشت أنا أعمل كتير شغلات كنت أنا عم بثبت لغيري أنه أنا أكثر من هيك 

مها وبتخبرنا أيضاً تفاصيل عن حياة الشباب في سوريا وطبيعة بيئة العمل فيها، بالإضافة لوضعها الحالي في الإمارات وأسباب اختيارها لمجال عملها 

غالية تركي هلق أنا صراحة بلشت شغل بعد البكالوريا فوراً، فما كان عندي اتجاه أساساً يعني بتعرفي إنتِ كيف؟ الطالب بالمدرسة غالباً ما عرفان وين بده يروح أو غالباً يلقن هو وين لازم يروح، فبلشت فوراً بعد الثانوي واشتغلت بمحل مفروشات بلشت انتقل من شغل لشغل كان عندي هي العقلية تبع أنا بدي اعتمد على حالي ما بينفع إني أنا هيك ضل بالبيت طبعاً بتعرفي الموضوع مو سهل عالبنت يعني خاصةً يعني الأهل هيك بخافوا وبحسوا إنه عم تطلع تحت جناحهم رغم إنه أهلي كان كتير داعمين بس كانوا عم يحسوا أنه طب نحنا شو منقصين عليكِ وهيك بتعرفي أنتِ هي العقلية إنه أنتِ بنت ليش لتطلعي تشتغلي وهيك، وأنا كنت بطلع من هذا الشي وعم جرب ووين كان يصحلي كنت زت حالي بشغل يعني فاشتغلت اشتغلت photoshop design اشتغلت بمحل تصوير اشتغلت بشركة أدوية سكرتاريا وهيك مع الوقت بعد ما تخرجت أنا دارسي IT بعد ما تخرجت قلت أنه Ok أنا بهذا المجال بعد التغييرات اللي طرأت على شخصيتي من 2012 خلينا نقول لـ2013 2014 قلت أنه أنا مجال الـIT ما حيناسبني لأنه أنا شخص ما بدي ضل ورا الـlaptop بدي اتفاعل مع الناس فقررت هيك أنه ضل عم جرب مرة من المرات في حدا قلي أنه تعالي في حدا بده حدا يشتغل Digital Marketing وأنا كنت كثير عندي شغف خلينا نقول إني دور بالـinternet شوف شوفي جديد وهيك ما كنت أخدي الـinternet تسلاية قبلشت اشتغل وبنفس الوقت أتعلم إدارة وحبيت كثير المجال بقى قعدت فكر كيف بدي أجمع بيناتهم فصرت اشتغل إدارة مشاريع وإدارة تسويق بنفس الوقت والتسويق كمان هو التسويق أساساً يتضمن activities أو خلينا نقول مشاريع بحاول أجمع المجالين مع بعض بعدين اشتغلت بهذا الشيء لحالي بلشت شركة وكالة Marketing صغيرة أنا واثنين شركائي وكنا عم نشتغل Marketing وكنت يشتغل Marketing حتى مع خلينا نقول الفرق التطوعية المبادرات والـEducational startup اللي أنا بلشتها فضل المجال معي يعني وكنت حب وأقرأ وشوف الو بالـbrands كيف عم يشتغلوا Marketing دائماً هذا السؤال منطرحه على حالنا إنه Ok Apple يا جماعة كل الدنيا بتعرفها ليش عم تعمل Marketing فكنت حب حس المجال أنه كثير كثير حلو للأسف بسوريا في إله Limitations كونه السؤق مانه منفتح كتير على السوق العالمي، بعدين اشتغلت بـUN اشتغلت إدارة مشاريع 

مها بعالم مليان بالتنوع والتحول السريع، العمل أثناء الدراسة يعتبر ركيزة أساسية بتثبت القدرة على التكيف وتوسع آفاق المعرفة، خلال هذه الفترة المهمة بين الدراسة والعمل بنفس الوقت بتشكل عند الإنسان تجربة غنية ومثمرة وبتمهدله الطريق لتنمو شخصيته ويحترف بشكل مستمر 

غالية تركي أحسن قرار عملته بحياتي الصراحة يعني أنا أول أول شغل قدمت عليه أو كنت بدي قدم عليه أهلي شوي وقفوا بوجهي إنه بكير هلق ركزي على دراستك فأنا بس راح هذا الشغل لأني أنا كنت قاعدة هيك وعم بصفن وقول ياريت يجيني هيك شغل وبمحل تصوير انا كان بدي أتعلم تصوير وتعديل صور فلما راح هذا الشغل قام أنا هون قلت خلص خلينا نبلش تمرد يا جماعة فقلتلهم خلص أنا بدي اشتغل يعني بدي أشتغل وصرت دور على شغل وانتقل من شغل لشغل وهذا الشيء كثير ساعدني بالتغيرات خلينا نقول النوعية اللي صارت بشخصيتي يعني أنا كنت شخص كثير انطوائي وما بحب أطلع مع ناس وحتى لما بطلع مع أهلي غالباً بنذوي لحالي ولما أطلع معهم وفي حدا غريب ما بطلع يعني برفض الطلعة نهائياً فهذا الشي كثير طلعني من هي الشخصية الانطوائية المنذوية اللي ما بدها تحكي مع حدا الخجلاني كان في تجربة سابقة يعني فخايفة من نظرة الناس وهيك فطلعت من هي التجربة بهذه الطريقة إنه أنا غصبت صرت أغصب حالي إني أنا أطلع وأغصب حالي اشتغل وإنه خاصةً بدي اعتمد على حالي يعني هي تجربة أني أنا كنت عم بعمل كل اللي عم بعمله من 2013 خلينا نقول ولبعدها كلها يعني شي 7 سنين وأنا كل الهدف منها إنه أنا أثبت أنه غالية أكثر من مجرد شكل عم تطلعوا فيه وتشوفوه وقدامكم وبس وبنفس الوقت كنت الطاقة اللي عندي من الشغلات اللي زاعجتني من التجارب السيئة عم فرغها بهي الطريقة ظليت سنين ما بعرف شو هذا الوقت الفاضي ما بعرف شو هي إني أنا أطلع وأتسلى وما بعرف إني أقعد هيك اتصفن يعني نسيت شو يعني أنه الواحد يتصفن فكنت كل الوقت مشغولة يعني الصبح بالمعهد أو بالجامعة أنا متخرجة مرتين دارسة معهد بعدين كملت افتراضية فيعني الصبح كون عم بدرس المسا عم بشتغل أو العكس وبس أخلص كمان سجل كورسات فأنا أطلع 7 الصبح أرجع 10 المسا كون خلص يعني الإنسان بيرجع بهذا الوقت خلص أساساً ما عاد في مجال يعني وبـ2015 بلشت Educational Startup خلينا نقول هيك على قدي طلعت من فكرة أنه كان عندي صفحة Facebook بنشر عليها شغلات هيك تحفيزية بتذكر أنه أنا بلشت أدرس على Coursera وأتعلم على Duolingo وأعرف وأعمل Profile LinkedIn كانت لسا الناس ما سمعانة بهذه الأشياء فكانت توصلني مسجات أنه من وين عم تعرفي هذه الأشياء وهيك بنفس الوقت أنا كنت عم شوف تجربتي وتجربة الأشخاص اللي حوليي إنه في ثغرة كتير كبيرة بي الشيء اللي عم نتعلمه بالجامعة وبين سوق العمل كان هدف الـstartup إنه نحن تعالوا يا جماعة نعمل Courses انسد الثغرة بين التعليم الأكاديمي والحياة العملية، بال2019 كنت أنا طالعة من تجربة صحية كتير صعبة فقررت أنه بدي أعمل شي فتطوعت مع Duolingo كنت Global Ambassador وصرت أعمل Events Duolingo هدفها أنه الناس تتعلم English Conversation بس بطريقة مرحة ما تقعد هيك وحدا وتحس حالها أنه هي قدرانة تعبر وقدراني تحكي بدون ما حدا يتنمر عليها أو يقلها إنه نحن غالباً عنا كان اللي بيحكي English يعني يلاقى بردتين فعل يا إما ياي فهمنا بتعرف انجليزي خلص فلقتنا يا أما شو هالـAccent هي ما بتعرف تحكي خليك ساكت فلهيك الناس بتلاقييا ما بتسترجي تحكي English لأنه دائماً بتلاقي ردات فعل هيك مانها مريحة فعملت تقريباً 12 Event وإجى عليهم تقريباً 66 شخص كان في منهم أشخاص هم دائمين بكل الـEvents ولقيت أنه الـInteractive Learning هو شغلة كتير حلوة صرت اقرأ عن الموضوع وشوف أنه عنجد هو بلش يطبق مو بس هي فكرة قررت أسقط هذا الشيء على الشي اللي كنت أعمله أنا بالـstartup ورجعت بلشت من أول وجديد 2020 بلشنا كانت لسا الدنيا هلق كورونا بلشنا online عملت عملت نفس الـEvents تبع Duolingo وبعدين بلشنا شوي شوي نعمل online بلشت تفتح الحياة نرجع نعمل هيك بأعداد صغيرة، Workshops فصرت أعمل يعني صرت أنا والفريق نعمل Materials ونعمل الورشات كلها from scratch وأنا يعني من قلبي هيك كل ما بتذكرهم بحس أنه يا ريت ترجع هديك الأيام كنا نشتغل نعمل Material من الصفر بالإضافة للـactivities تبعهم ولا شيء، كنا ناخده جاهز من الـInternet، كانت تجي الناس تلعب وتتعلم وتجوهرت الفكرة من سد الثغرة بين الحياة الأكاديمية والحياة العملية، لخلق مساحات آمنة للتعلم وقتها كمان يعني بنفس الفترة تطوعت مع TED في عندهم project إسمه TED Circles أنا أساساً بـcommunity TED Talks أكيد بتعرفيهم من 2013 كنت ترجم معهم بعدين صرت Arabic Language Coordinator وهذا الـcommunity بيعنيلي كمان تعرفت على رفقات من كل الدنيا يعني فيه فتطوعت معهم بنفس الفترة بـTED Circles فكنت أعمل Hosting لجلسات حوارية بمواضيع مختلفة كمان كان الهدف منها أن الناس تقعد تتحاور بوقت نحن كنا عنجد فاقدين فيه هذا الشيء بعد الحرب اللي صارت بسوريا والأمور اللي مرينا فيها الناس ما كانت قدرانة تقعد تحكي مع بعضها كتير ناس بطلت تعبر عن حالها لإنه حست حالها هي مختلفة فهي الأشخاص كانت تجي بتذكر في جلسات يعني عنجد بكينا فيها كنا نبكي ونضحك ونغني وكانت الناس تقوم، يعني كان في أشخاص من الحضور تقوم تضمني بلحظات معينة تحس حالها إنه هي قدرت تحكي أنا عندي social anxiety، أنا كنت عم فكر بالإنتحار، أنا ماني منيح وكل هذه الأشياء فهي الفكرة خلتني إنه Ok نحن كل مساحات التعلم لازم تكون أمنة لأنه اليوم المعلومة النظرية ما عادت حكر على حدا، يعني أي انسان صار بيقدر يأخذ معلومة نظرية من الـInternet أيمتى ما بده بس التجربة الإنسانية اليوم عم تنعدم، يعني أنا هيك هذا رأيي الشخصي أنه التجربة الإنسانية تتجه إلى الإنعدام أصلاً هلق بلشنا نفوت بالـAI وهيك فالناس اليوم بحاجة إنه تقعد تحكي مع بعضها تفهم بعضها تشوف أنه عنجد أنا في أخر ما بيشبهني عايش معي وبقدر أنا وياه نكون عايشين مع بعض ونحب بعض بدون لا هوي يغيرني ولا أنا غيره 

مها بظروف سوريا من بعد 2011 كثير مهم نعرف كيف قدروا بعض الأشخاص يستمروا بحركتهم ونشاطهم المهني والعملي وتطوير أنفسهم مع انعدام المحفزات والدوافع وانغلاق البلد اقتصادياً وحرمان الشباب والصبايا فيه من التنقل والسفر بحرية شو المعنى اللي خلقوه لأنفسهم ليستمروا؟ 

غالية تركي هلق أنا بالبداية أول شي أول أول ما بلشت ليش عم قلك أنا TED Community بيعنيلي TED هنن conference عالمي بصير كل سنة مرة بكندا وفي إله مجموعة communities مختلفة عحسب المشاريع  فأنا لما تطوعت معهم هنن عادةً كل سنة بياخدوا 10 مترجمين على حسابهم عالـconference فأنا وصلتني دعوة وانرفضت انرفضت الـVisa طبعاً وكان هذا الشي كتير أثر فيني لأنه أنا كان في كتير أشخاص مهمة هنيك مثل Simon Sinek مثل Bill Gates Jason Silva أنا هدول الأشخاص كثير بحبهم بحب أسمعهم فأثرت فيني التجربة فقررت أنه Ok أنا ما فيني سافر رح استخدم الـInternet وجيب الدنيا كلها لعندي يعني خلص ما في مجال أن ما رح ضل قاعدة ويعني لما صفنت بيني وبين حالي أنه نحن عنا خيارين دائماً أنه خلص نضل نستسلم ونقول هاد الواقع ما فينا نغيره أو نضل عم نحاول نعمل شي يمكن شي مرة تزبط يعني هلق أكيد مو حتزبط دائماً بس في مرة رح تزبط قكنت كنت حب يعني كنت حب حس أنه أنا عم بعمل شي لحدا تاني ودائماً بحس أنه أنا مرات دائماً اللي بحبط فيها يمكن بكون حاسة فيها إنه أنا ما عم قدم شي لشخص أخر أنا عايشة لحالي بس أنا أساساً من أيام صفحة الـFacebook لما كانت الناس تبعتلي وتقلي نحنا منتفاءل فيكِ وعم ناخد منك طاقة كان الموضوع كثير بيعنيلي حسيت إنه أنا لازم كبر هي الدائرة ولما عملت الفريق وشفت أنه أنا يعني أنا أساساً بتبنى عقلية leadership خلينا نقول مو الـboss أو الشخص اللي هوي بس بيعطي orders وتعلوا يا جماعة اشتغلوا فلما حاولت لإني أنا أتعمق بالموضوع أكثر وأقرأ عنه أكثر وطبقه أكثر حاول شوف استثمر يعني بمهارة خلينا نقول هي شيء يعني موجود فيني وبنفس الوقت أنا حاولت إني طوره هوي الذكاء العاطفي هوي هوي شيء كتير مهم عند الـLeader حاول إي استثمر بهذا الشيء بالفريق تبعي يعني نحن كنا تقريباً 25 شخص بتذكر يوم يوم ودعوني قبل ما سافر في صبية من الـteam قالتلي غالية أنتِ كنتِ تديري بالك على كل حدا فينا كأنه أنتِ ما عندك غيره ولا حدا فينا كان يحس أنه في 24 تانيات فأنا كثير كان يعني هذا الشي دائماً لما حس يعني كثير كنت أتعب وعنجد أنا حياتي الاجتماعية بمرحلة ما انعدمت إنه أنا حتى يوم الجمعة والسبت يلي أنا بعطل فيهم كنت أطلع أشتغل وأرجع أقعد بالcafe، اشتغل حتى بعد دوامي أرجع اشتغل كل الوقت عم بشتغل، حتى كنت أحكي بنومي اجتماعات وهيك فبيعنيلي كثير أنه أنا حس عم أثر بأشخاص تانين وأنا أؤمن أنه الأثر يلي أنا بتركه بشخص رح يتركه هو بأشخاص تانين فهي الدائرة هيك بتتوسع 

مها ذكرت غالية خلال حديثها السابق أنه سبب أساسي من أسباب إقبالها على أجواء العمل المختلفة بهالشراهة إذا صح التعبير كان تجربة شخصية سيئة مرت فيها 

غالية تركي ما عندي مشكلة أحكي فيها يعني خلينا نقول هي أول مرة رح أحكي بهي الصراحة عن التجربة، أنا تقريباً بالبكالوريا قدمت البكالوريا مرتين بالبكالوريا بالسنة الأولى اللي قدمت فيها بكالوريا زاد وزني كثير وأنا بالأصل يعني أنا من أنا وتقريباً خلينا نقول بلشت بمرحلة المراهقة ما كنت نحيفة كنت ممتلئة خلينا نقول كنت دائماً اسمع حكي بهذا الموضوع بالشارع، بالطريق، بالبيت، بالمدرسة بأي مكان حرفياً بأي مكان ممكن يخطرلك حتى بصالون الشعر يعني أنا رايحة ساوي شعري مثلاً أسمع حكي فكان الموضوع بالنسبة إلي إنه الناس عم تشوف غالية كشكل هنن عم يمحوا كل شي تاني بشخصيتي، إنه أنا مثلاً أنا كائن متكامل في عندي روح في عندي فكر في عندي عقل في عندي قلب في عندي مشاعر فكان الموضوع كتير مزعج بالنسبة إلي، فأنا كنت فرغ هذا هي طاقة من هذا خلينا نقول بعضها تنمر بعضها هيك بس تلطيش حكي بهذا الموضوع وأنا كنت أساساً انطوائية بسبب هذا الشي فراحت عليي كتير فرص كثير شغلات ما كنت أحضرها كثير أماكن ما كنت روح عليها لأنه كنت قول Ok هلق الناس تطلع فيني وبدها تعلق بتعرفيها هي هي خلينا نقول الـloop يلي بفوت فيها الشخص ما برد بيطلع فبلحظة معينة شخص ما كسرني بسبب هاد الموضوع فقررت أن لأ خلص لهون وبس يعني خلينا نقول ببداية ما بلشت أنا أعمل كتير شغلات كنت أنا عم بثبت لغيري أنه أنا أكثر من هيك أنا عندي كثير وأنتم يعني عندك أكثر بكثير مما ممكن تتصوروا، بس بعدين مع الوقت صرت يعني خلينا نقول من 2019 وطالع بلشت أوعى بذاتي أكثر، بلشت فكر أنه لأ أنا بدي Ok في شي بدي أثبته للناس بس كمان في شي بدي أثبته لحالي كرمال حالي مو بس كرمال الناس فهيك شوي شوي بلشت أعمل خلينا نقول توازن أنه Ok هلق أنا الشغلات اللي بدي أثبتها للناس هي القيم اللي أنا بآمن فيها بس، بس ما بد أثبتلهم أنه أنتم تعالوا اعتبروني أنا شخص قيّم رأيكم فيني ما بيهمني مو لأنه أنا بعتبر الناس هم ولا شيء بالعكس أنا كتير بحب اسمع نقد الناس وبحب اسمع النصيحة بس عرفت كيف حط حدود إنه Ok أنت نصيحتك هون وقف هون عند هذا الحد بعد هذا الحد أنت عم تتجاوز حدود أنا ما بسمحلك تتجاوزها عند هذا الحد Ok أنا بتقبل نصيحتك وبالعكس كتير بيعنيلي إنه في أشخاص حريصة أنها تعطيني هالنصيحة، إذا أنا بفكر بالتجربة هلق من زاوية ثانية بفكر بأثر هذا الشي عليي إنه أنا كنت عم بسمح لحالي بطلت قول هنن عم يخلوني أخسر لأنه أنا اللي كنت عم بسمح لحالي أخسر فرص وأخسر لحظات من حياتي بسبب أنه هدول الأشخاص رأيهم فيني هيك أو هنن عم يطلعوا فيني هالنظرة، وصرت أنا يعني بعد هذه التجربة اللي عشتها 2019 مريت بظرف صحي بسبب هذا الموضوع قررت إني أخسر هذا الوزن الزائد لأنه خلص عملت عملية بس صار معي مضاعفات لقطت جرثومة بغرفة العمليات فصار معي مضاعفات وضليت على أثرها عم طيب تقريباً 6 شهور 3 شهور منهم أنا كنت بس متسطحة بالتخت 

مها عملية خلينا نفسرها عملية 

غالية تركي قص معدة 

مها عملية قص معدة Ok 

غالية تركي صحيح 

مها والشخص اللي قلتي عنه أنه كسرك هي كانت عاطفية أساء المعاملة بما يخص هذا الموضوع 

غالية تركي كان في يعني هي بالنهاية الأشخاص دائماً بتنظرلك بهي الطريقة الشخص يلي عنجد بيطلع عليكِ ككيان هو شخص متصالح مع ذاته دائماً بتشوفي الأشخاص اللي عم تتنمر عالناس التانية هي عندها شيء بشخصيتها هي ناقص ممكن بهذا الـtrend اللي طلع علاوي أخوي حبيب قلبي أنت عندك نقص بشخصيتك فعلاً هيك إنه الشخص لما على الناس بتطلع على عيوب الناس وبيؤذيهم فيها هو شخص عنده شيء جواته مو تصالح هلق أنا من زمان يمكن يمكن تجربتي ساعدتني أنه أنا أكون هذا الشخص من زمان بس أطلع بشخص بتطلع عالشغلات الحلوة فيه ويستحيل إني اتطلع بشخص وأقول عنه بشع دائماً الناس بالنسبة إلي حلوة لأنه كل إنسان حلو ما في خدا بشع يعني لا يعقل في إنسان بشع بس نحن كيف منشوفه وهو كيف بيصدر حاله إلنا بشخصيته بتصرفاته فالإنسان الإنسان السيء قد ما كان حلو كشكل هوي بشع والإنسان اللي منيح دائماً بتطلعيله بنظرة حب فبتشوفي كل شي حلو فيه بتبطلي تركزي على أي شيء حتى كمان يعني بشكل سحري جداً لما تكوني بتحبي شخص وهو منيح العيوب اللي هوي بيكرهها بحاله أنتِ بتشوفيها شغلة حلوة يعني هذا الشي أنا بقول أنه Ok يمكن التجربة كانت كتير قاسية بس تعلمت منها كثير وهي يعني خلقت مني هذا الشخص ما رح قلك إنه Ok يلا تعالوا نصفق للتجارب السيئة وتعالوا ننجرح لحتى نتعلم بس هي تجربة مريت فيها يعني خلص أنا ما بقى فيني أمحي هذا الشي 

مها بعدين قررت غالية تسافر على الإمارات لتجرب شو ممكن ينفتح لها من أبواب الفرص، صار لها سنتين تقريباً قدرت خلالهم تقطع شوط كبير 

غالية تركي بس التجربة ما كانت سهلة صراحة يعني هي البلد رائعة كثيرة تطورها سريع جداً يعني تطور الإمارات فيه بده لإنسان يضل مصوريخ لحتى يلحقه مستحيل أنتِ تضلي ماشية بسرعة طبيعية وتقدري تواكبي هي البلد وهاد الشي كتير منيح يعني إذا منتطلع فيه من ناحية أنه أنا هذا الشي ممكن ممكن يكون سيف ذو حدين ممكن يحبط أشخاص كثير ويخليهم خلص يرجعوا ممكن أشخاص ثانية يخليهم أنه لأ أنا بدي ضل أركض لحتى لحق إنه نحن راح علينا كثير أشياء بالوقت اللي كنا فيه عم نخاف على الأمان تبعنا وأساسيات حياتنا وإلى آخره لهلق التجربة مانها سهلة صراحةً بس بالنسبة إلي كانت نقلة نوعية لأنه أنا أول مرة بستقل وبعيش لحالي وأول مرة بسافر برات البلد وكتير كانت تجربة غنية أنا من زمان أساساً بحب إني استقل عندي هي الشخصية المستقلة يعني أنا بدي تكون إلي مساحتي الخاصة مكاني وبيتي والتفاصيل تبعي فكتير كان الموضوع مانه سهل بالبداية كنت بسكن مشترك أكيد وقعدت بـpartition بعدين أنتقلت لسكن مشترك قعدت بغرفة عادية وقعدت بلا شغل شهر ونص والعالم بتفكر إنه رح إجي لاقي فرص العمل شو رح تتطمرني طمر، بس هذا الشي مانه صح اليوم صار في كثير منافسة بالسوق صار في كثير ناس عم تطلع وخلينا نقول صار في كثير ناس هي أساساً على قدر من من المنافسة والعلاقات كثير مهمة وهذا الشي نحن ما تعلمناه طبعاً للأسف بسوق العمل بسوريا بالنسبة إلنا كانت فكرة العلاقات هي فكرة الواسطة فقط، نحن ما قدرنا نفرق بين المصطلحين والناس صارت خلص تفهم أنه أنا من طرف أبو فلان معناتها خلص أنا واسطة وفتت وخلص بس هون الوضع مختلف هون الإنسان بده يكون كثير يبني علاقة يتعرف على الناس بده يختلط بالجو ويفهم ثقافة البلد، كان موضوع كثير بالنسبة إلي صعب خاصةً أنا كمان كنت متعلقة عاطفياً بأهلي فالتجربة كانت من كل الأصعدة جديدة كنت أنا بس هيك عم حاول استوعب نفسياً أنه يا الله شو عم يصير أنا صرت لحالي ببلد لحالي وعم دور على شغل ولساتني يعني أنا هلق حالياً برابع شغل إلي هون خلال سنتين هلق بعد 3 أيام أنا بصرلي سنتين بس بالإمارات هذا رابع شغل إلي وكان في شهر ونص أنا قعدت فيهم بلا شغل تماماً لما شفت هذا الشيء أنا من زمان أساساً كان حسابي الـFacebook كان عليه كتير عالم كان عليه حوالي 10 ألاف شخص بين friends ومتابعين غير الصفحة تبعي كنت دائماً ساعد الناس وبحب ما أبخل بمعلومة عحدا يعني أي معلومة عندي ياها بعطيها بسخاء يعني بعطي المعلومة وبعطي فوقها كمان وإذا أنا ما بعرف المعلومة بدلهم على حدا بيعرف المعلومة لأنه أنا بوقت معين كنت تعلمت كل شي من كيسي متل ما بيقولوا فصارت رسالتي إنه Ok خليني أنا ساعد وأساساً بقولوا زكاة العلم مشاركته صرت شوف إنه الناس عم تتلبك بالطلعة وهيك فصرت الأشياء اللي أنا اتعلمها هون تجربتي كيف الواحد بيتنقل بالإمارات؟ كيف بيطلع كيف بلاقي شغل شو المواقع اللي بيبحث فيها؟ يعني هيك معلومات كثير أساسية لأي حدا جديد جاي لهون صرت أنشرها وطلعت بث مباشر مدته تقريباً ساعة حكيت فيها عن كل الأشياء وحطيت ببوست مثبت عملت هيك متل دليل صغير أنه هي التطبيقات اللي بتحتاجوها هذه الطريقة بتلاقوا فيها سكن إلى آخره بنفس الوقت عملت group WhatsApp هذا الـgroup حالياً فيه 380 شخص طبعاً هو group مفتوح ماله مغلق يعني ماله بس الـadmins اللي بيكتبوا فيه هوي مفتوح لكل الناس أي حدا عنده سؤال بحاجة مساعدة الناس بتفوت بتساعد بعضها الهدف منه كان أنه بتذكر مرة اجتمعنا أول ما كان الـgroup صغير الناس صارت تشبك مع بعضها هذا الشي كان كثير منيح كان في ناس مثلاً صرلهم سنتين في ناس جديدة من اختصاصات مختلفة صارت الناس تتعرف عبعضها والناس تساعد بعضها أنه Ok خليني أنا مثلاً آه في عنا شاغر بهذا المجال تعال مثلاً إلى أخره أو أنا بعرف حدا مثلاً عم يشتغل عنده مثلاً شقق بسكن إلى أخره، فصارت الناس تشبك مع بعضها بلش يزيد هذا الـgroup لحتى صار هلق 380 أو أكثر شوي كمان، فالهدف منه كان أنه Ok دائماً بيقولوا أنه السوريين ما بيساعدوا بعضهم برا لأ نحن منساعد بعض برا وفي ناس ما بتساعد بعضها وفي ناس فعلاً بتعمل ببعضها فصول ناقصة خلينا نقول بس مو كلياتنا هيك ولسا فينا نقدر نحافظ على هذه الصورة يعني كثير للأسف بالسنين الماضية تصدرتلنا صور كتير بشعة لبرا بسبب بعض الأشخاص السيئين، يلي هم صدروا هذه الصور أنا لأ خلينا نحن نرجع نحاول يعني كل واحد ببلش من حاله، أنا لما بفتح بشوف مثلاً 10 أشخاص عم يساعدوا بعض هذا الشيء كمان بيعطيني دافع أنه Ok خلي الـgroup وخليني مثلاً في معلومة هون نسأل عنها خليني أسأل عنه وساعد فيها وإلى أخره 

مها غالية حالياً عم تعمل تحويل في مسارها المهني وعم تختص وتتوغل أكثر بمجال إدارة المشاريع التسويقية والخدمات الإلكترونية 

غالية تركي بطبيعتي بحب الإدارة كثير أنا شخص كثير منظم وكثير عندي قدرة على الـplanning بأدق التفاصيل، فحابة أستثمر بهذا الموضوع وبنفس الوقت كمان عندي Team Leadership فبحس حالي أكتر بمجال إدارة المشاريع بلشت حضر للـBNB كمان وإن شاء الله قريباً بقدم الفحص فبدي أعمل career shift وأنقل على أو خلينا نقول إدارة المشاريع شغلي الحالي إدارة مشاريع، بس لساتني ضمن خلينا نقول ضمن المجال اللي هي إنه أنا هلق بشركة Marketing Agency، بس عم بشتغل إدارة مشاريع فلساتني بنفس الفضاء خلينا نقول بس عم وظف مهاراتي بطريقة مختلفة وStill نفس الشيء بالنسبة إلي لما بشوف أي شي Marketing wise إنه أنا ممكن أنصح فيه الشركة الـclient الـteam فأنا دائماً بعطي المعلومة بقدر شوف الـproject من أكثر من زاوية هذا الشي ماله سهل طبعاً أنك أنتِ تشوفي الـproject ناحية مثلاً إنه أنا كيف بدي أعمل leadership صح للـteam بنفس الوقت كيف بدي أعمل communications صح مع الـclient وكيف بدي أنا أتواصل مع إدارتي اللي هم أنتِ بتعرفي أنه دائماً مدير المشاريع هو متل ما بيقولوا بيجي عليه الضغط من كل الجهات، لأنه هو بده يلحق ينسق مع الـteam وبنفس الوقت مع الإدارة ومع الـclients ويفكر بالمشروع وشلون ممكن نحسنه وكل هي القصص قبقدر شوف المشروع من كذا زاوية 

مها لكل الأشخاص الموجودين بظروف عم بتحد من إمكانياتهم وعم تخليهم بقوالب غير مناسبة إلهم غالية حبت بالختام تقول شي من القلب عسى يكون ملهم للبعض وفيه أمل محتاجينه 

غالية تركي بدي أقول لهم أنه الشيء اللي أنتم فيه مو سهل بس أنتم ما لحالكم، نحن دائماً وقت منكون بهذا القالب بنفكر حالنا لحالنا وكل الناس حولينا هي مبسوطة اليوم حتى الـsocial media للأسف عززت هذا الموضوع وهذا الشيء كمان هو كان دافع إلي أنه أنا بالـsocial media عندي بشارك كل شيء وقت كون متضايقة بشارك وقت بكون معصبة بشارك وقت بكون فرحانة بشارك لأنه نحن بشر بالنهاية الناس تعبت من الـfake people اللي هم ناس بتورجيكي إنه نحن مثاليين كل الوقت مرتبين وشعرنا زابط وأحلى الماركات وأحلى شيء والناس قاعدة مكتئبة هي ما عم تقدر تطلع من هذا الشيء لا عرفاني هي وين بدها تروح بالـcareer تبعها ولا عرفانة توظف مهاراتها ولا عرفانة كيف بدها تأمن أساسيات حياتها، وأنا كتير متفهم اليوم قديش صار صعب الوضع بسوريا على الشباب والصبايا وبتفهم قديش محبط بالنسبة إلهم لأني أنا خلال عملي المجتمعي بالمبادرات وبالمشاريع شفت طاقات هائلة كتير بتزعل بتزعل إنها ما حدا عم يستثمرها بتخيل أنه أنا يوم ما رح أرجع أعمل شيء هنيك، لأن الناس هنيك عنجد بحاجة وبيستاهلوا والظروف السيئة اللي مرينا فيها علمتنا كتير خلتنا نطلع أشخاص مو هشين ما خلينا نقول هشين خلتنا نطلع أشخاص شايفين الحياة بطريقة مختلفة عنجد يمكن الناس تغيروا اليوم أكثر صاروا قاسيين أكتر من هذا الشي مفهوم بس بس تشوفي لهفة شخص متعذب ومعاني بحياته على شخص تاني بتقدري تفهمي هذا التغيير اللي نحن صار فينا واللي هو عنجد ما حدا شايفه لأ الناس دائماً ناس بتركز على الشيء السلبي والسيئ والناس اللي جوا حقها تركز علي بدها ياه، بس الناس اللي برا أنتم ما بحقكم أبداً أبداً تقولوا عن الناس اللي جوا سلبيين أو ليش أنت ما عم تتعلم أو ليش أنت ما عم تستثمر اليوم شب أو صبية عمرهم 20 سنة عم يعانوا لحتى يشوفوا نص ساعة كهرباء فالبعض للأسف بعض الأشخاص اللي طلعت وصارت واعتبرت حالها صارت وتصورت صارت تشوف حالها عهدول الناس بتعتبرهم ناس أقل لأن هم مالهم مثلها وهم مثلاً ما بيقدروا يفهموا لغة الخطاب تبعهم هذا الشي أنا كتير بيزعجني بالـsocial media اليوم في أشخاص عم يصدروا كتير صورة بشعة، يعني حتى أنا كنت عم عم خطط أني أعمل محتوى، بس لما شفت الناس اللي هيك صارت صرت خاف إنه مثلاً بهذا بهذا الشي هدول السوريين يلي الناس بتعرفهم هم شايفين حالهم فوقيين معتبرين حالهم فوق الناس، بتقدري تفهمي ليش أنه في كمان نماذج تانية، بالمقابل أحد هي النماذج أنا اسمحيلي أذكر اسم هو الدكتور فادي الشلبي هو شخص أنا بعتبره mentor بالنسبة إلي شخص رائع متواضع مرّ بتجربة جداً غنية وعم يعمل كتير إنجازات حلوة ورغم هيك إنسان متواضع جداً، يعني ما بتذكر مرة حاكيته فيها إلا ورد بكل لطف وما بخل بمعلومة حتى عالناس يعني على الـsocial media ما بيبخل بمعلومة ولا مرة شفتله اسلوب فوقي، فنحن عنجد بحاجة نصدر هي هي الأشخاص لأنه نحن عم نصدر الناس الغلط عم نشهر الناس الغلط والليعم  تتعامل معنا بطريقة سيئة، ومثل ما بيقولون يعني صاحب الحاجة دائماً بيكسر على حاله في ناس بتكسر على حالها لما عم تطلع لهون بس كرمال تزبط أمورها الناس عم تطلع من حاجة ملحة في ناس ما عم تطلع مثلي مثلاً أنا طلعت Ok أنا طلعت ما حقلك حاجة ملحة حاجة أنا جواتي إنه أنا بدي أعمل شيء أكثر لأفدر قدم لغيري، بس في ناس عم تطلع لأنه ما عاد عندها خيار، وفي ناس تانية عم تستغل إنه هذه الناس طلعت لأنه ما عندها خيار، فتعال أنا أستغلها فبدي قول لهدول الأشخاص إنه مانكم لحالكم ورح تطلعوا من من هذا الشيء، يوماً ما دائماً في شخص عنده لحظة بتصير بالطلب، إذا هو كان خلينا نقول عنده عن جد الإرادة والرغبة من جوا إنه يطلع بلحظة ما حيصير معه شي حيخليه يطلع بجوز تكون شغلة قاسية بجوز تكون شغلة لطيفة كثير تأثر فيه 

مها طيب بما إنه الحديث للأسف يعني الوقت ما عاد يسعفنا نحكي تفاصيل يعني أكثر بما يخص القدوم للإمارات والسفر للإمارات ونصائح للحياة هون، رح نطلب من المستمعين والمشاهدين اللي حضروا لقاء غالية إنه هذه الأشياء بلاقوها عندك يعني يلحقوا غالية هيك خلينا نقول يلحقوا غالية وين بتنشر على صفحاتها بمنصات التواصل الاجتماعي، ورح شوفوا كل شيء يخص العمل في الإمارات والسفر إلى الإمارات، رح تساعدكم كتير بهذا الخصوص، بدي أشكرك كثير كثير على وقتك وعلى شفافيتك وعلى كل الأفكار اللي محتاجين نسمعها الحقيقة دائماً الناس بتتجنب تحكي بهالقصص كنا محتاجين نسمعها بهالوضوح هيك ولو كانت ببعض المطارح فجة شوي لكن أحياناً بدنا نسمع بهالفجاجة هي 

غالية تركي شكراً كتير مها أنا كتير استمتعت وما حأقول أسفة، إني كنت فجة ببعض الأماكن، وكنت كتير صريحة زيادة عن اللزوم أنا هذه طبيعتي حتى عالـsocial media عندي إنه نحنا لازم نسمع هذا الحكي يعني إذا ما سمعناه ما رح نقدر نصلحه 

مها وأنا بدوري بدي أشكركم على استماعكم واهتمامكم، وأذكركم بأنه بالإضافة لجميع المنصات الصوتية للبودكاست فيكم تحضرونا على يوتيوب بقناة بودكاست أخبار الآن رح نفرح جداً لما تعلموا اشتراك وتفعيل لزر الجرس في الـYouTube وعلى Apple Podcast أيضاً، استمعتوا لحلقة الإخراج الصوتي فيها تصميم شركة Feedz Pro هويتها البصرية تصميم فريق سرد والإشراف العام لمحمد علي، أما بالإعداد والتقديم برافقكم دائماً في بودكاست صارت معي أنا مها فطوم، إلى اللقاء.