نور موقع: حمّال الحقائب في فندق الذي أصبح مديراً تنفيذياً

نص الحلقة :

نور كنت بدي صير زبال بالمدرسة كنت كتير مشاغب بالصف كنت كتير أتقلع من الصف قلت لحالي ما حدا بحك جلدك غير ظفرك ما عندي أبداً سلبية بحياتي وما وما بحب حتى كون أتعامل مع ناس سلبيين سبحان الله يعني طبعي هيك يعني إذا حدا سلبي أو هيك ببعد عنه كانت عبارة عن صدمة كتير كتير بشعة 

نسرين اللاجئ المدير اليوم هو الشاب الحلبي نور موقع المدير التنفيذي الCEO لشركة Wizme وهي اختصار لWizard For Meeting And Events هالمنصة اللي ابتكرها نور شخصياً لتكون متخصصة بحجوزات الشركات والأفراد لمستلزمات أي حدث من أي نوع من الطيارة للأوتيل حتى صالة الاجتماعات جهد كبير وغير مسبوق ورح تعرفوا ليش خلال اللقاء لكن هالشب لوصل لتحقيق حلمه وإنشاء شركته الخاصة خاض بأمواج من التيه والضياع لأسباب عديدة بين قدراته وأحلامه الشخصية وبين سيناريو التوقعات المسبقة يللي رسمته العيلة لمستقبل نور وحكايته مثل أي حكاية أولها بيبدى من حلب بلد المنشأ 

نور أنا خلقت بحلب بمنطقة اسمها السيد علي كنا ساكنين فوق بيت جدي أهل بابا بذكر كتير كنت على علاقة قوية مع مع ستي وجدي لهلق بتذكر كيف ستي كانت أحياناً تفيقني من النوم تنزلني حتى آخد باص المدرسة أنا لما كنت صغير كان عندي طموح غريب عقد ما كنت أحب ستي عم نحكي يعني طفولة كتير 3 4 سنين كنت بدي صير زبال لأنه كان يجي كل يوم يأخذ الوسخ من عند بيت ستي عقد ما كنت حبها أنه قال بدي بس صير زبال حتى أجي أخذ من عند ستي الزبالة شوفها أنا لهلق عيلتي بسمعوني بهالقصة تتذكر لما كان طموحك تصير زبال كنت كتير شقي كانت أمي صغيرة يعني كان عمرها يمكن 23 وكانت بتدرس بالمدرسة كنت كثير مشاغب يعني تكون نائمة تفيق تلاقي البيت عبارة عن بحيرة روح عبي البانيو ماء وجيب الأفلام أفلام الفيديو حطون فيها وأمي تفيق والماء بكل البيت لما كنا صغار كنا نسبح بالمسبح البلدي رفقاتي هلق كلن سباحين يعني صاروا سباحين وأبطال جمهورية وأبطال عرب تدربنا فترة بتذكر لهلق أنا وأخوي ناخذ الميكرو من الحمدانية مع بعض نجي على المسبح وكيف هيك نلف بعض ونمشي مع بعض هيك أنا وياه ماشيين نفس الخطوة كنت كثير حب كل weekend روح نام عند جدي وستي كنت كتير قريب منهن أكبر صبي بالعيلة فيه لايك وبابا هو الأكبر كان كانوا عمامي بهداك الوقت مانن متزوجين عمي دكتور تقويم ولما كنت كثير صغير كان يدرس بالجامعة كانت يطلع يدرس عنا بالبيت وعمي التاني كمان كان مهندس ميكانيك سافروا تنيناتهن عملوا دكتوراه بفرنسا فكمان أنا كنت المدلل يلعبوا معي كتير وهيك يعني هلق نزلت من فترة على البلد يعني قعدت بغرفة الغرفة اللي كنت نام فيها عند ستي يعني والله قعدت بكيت هيك تذكرت إجاني فلاش باك 

نسرين  هالصورة السريعة اللي رسمها نور لطفولته بتحطنا أمام شخصية عاطفية وشقية والعائلة بكل أفرادها بتعنيلها كثير لكن هالعائلة اللي بيحبها نور ضغطت عليه بتوقعاتها التقليدية ومقارناتها المستمرة بينه وبين رفقاته وبين عمومه وهو ضغط على حاله كتير وبذل مجهود ليقدر يحقق آمال العيلة فيه لكن بدون جدوى 

نور بالمدرسة كانوا يعتبروني ذكي بالعيلة بتعرفي يعني هلق كل كل عيلة بسوريا بتريد ابنها أو بنتها يصيروا دكتور فكانت توقعات كتير عالية وخصوصي عمامي دكاترة أنا كان عندي مشكلة بصغري أنه ما أقعد أدرس أبداً ولما كنت بالابتدائي أمي كانت معاونة مديرة المدرسة تمشي معي لهلق بتذكر بعد المدرسة أسمعلها كل الدروس ضليت هيك لحتى يعني وصلت يمكن عالصف السابع بتذكر وقتها كان ناقصني علامتين على العلامة الكاملة كنت الأول عالمدرسة هلق المهم بالتاسع جمعت 271 من 290 وأهلي ما عجبن المجموع أبداً لهلق بتذكر بابا حتى كان كاتب على ورقة كل الناس رفقاتي اللي مجمعين أكثر مني وأنا كنت بمعسكر رجعت عالبيت ما كانوا مبسوطين منا يعني من المجموع طبعاً في عنا عادات شوي من المقارنة وليه ما جمعت وجمعت ويمكن بتجي أكتر شي براس الكبير يعني البقية بتخف شوي بظن الحدة هلق لما نقلنا على حلب الجديدة بدي غير مدرستي فنقلت على مدرسة المأمون كان فيه شعبة الأوائل فرحت وصرت جزء من هالشعبة عاشر حادي عشر كان تمام بس يعني بالمدرسة كنت كثير من المشاغب بالصف كنت كثير أتقلع من الصف حتى لهلق بتذكر في رفقاتي هلق جراحين قلبية وكثير شاطرين يعني وهيك خليتن يقلبوا معي من فوق المدرسة لنروح ناكل صندويش فلافل مثلاً وحتى الأساتذة كانوا يقولوا للطلاب أنه ليك هدا نور نيرد لا تطلعوا عليه عم يتقلع كتير من الصف وأنه هيك بس بكرا بجيب أحسن مجموع بس الحقيقة ما كانت هيك بصراحة ما كنت عم أدرس وما كنت أعرف ليه ما كنت ركز يعني بالدراسة بالبكالوريا جمعت 165 لهلق بتذكر نزلت عالجميلية شفت رفيقي رفيقي جاب طب عم بيقلي أنه أنا جبت طب أنه شقد جمعت أنا أنا كنت مبسوط أنه أنا جمعت 165 وأنا ماني كذاب قلتلكم ما كنت عم أدرس فوقتا طلعلي أدب إنجليزي يعني كان أغلب علامتي رياضيات وإنجليزي يعني بتذكر أخدت بالرياضيات 54 أو 55 من 60 وإنجليزي كان 29 من 30 أهلي طبعاً ما عجبن الوضع أبداً أن شو أدب إنجليزي تحت الضغط لهلق بتذكر قبل راس السنة قررت عيد البكالوريا وجمعت 166 عدت كل البكالوريا على علامة وحده 

نسرين على الرغم من أنه كان عنده مشكلة بالتركيز لكن يبدو كان في قدرة تانية عند هالشاب وشغف متخبي اكتشفه بالصدفة لما انعرض عليه يسجل بمعهد سياحة تابع لمعهد بباريس بعلم اللغة الفرنسية والإسبانية والسياحة والضيافة 

نور فقلت why not ودخلت عهالمعهد درست سنتين فرنسي وصرنا نعمل فترات تدريب بمكاتب السياحة مكاتب الطيران بالأوتيلات هلق هون حبيت كثير الhospitality طبعاً كنت كتير محظوظ تعلمت على تاريخ سوريا العريق زرت الأماكن السياحية بكل سوريا يعني للأسف مناهجنا بسوريا ماكنا مندرس ما منعرف إيش دورا أوربوس كنا بعيدين عن تاريخ سوريا الخرافي يعني بصراحة أنه أنه بزعل أنه كتير ناس ما بيعرفوا هالمناطق عنا بسوريا فكتير كنت محظوظ برأيي أنه أنا كان عندي هالفرصة هلق أنا كتير أنه اجتماعي وعندي علاقات فكنت networker فكنت أنزل عالعزيزية وشوف يعني الناس الbands الmusicians بيلعبوا guitar drummers وأشوف العالم تعملوا إيفينتات وهيك فأم أنا بلشت بدي نظم إيفينتات كان كثير فترة ممتعة يعني كنا نستمتع أنه وقت كنا نحط الأغاني منحبها ننزل على استديو وهني عم يتمرنوا أنا بقى شغلتي كنت جيب جهاز للصوت للإضاءة حجز الصالة الدعاية يعني كل شي كامل من الألف إلى الياء كنت نظمه وعملت كتير حفلات بسوريا يعني عملت حفلات rock حتى لهلق عندي بروشورين بفرجيكي ياهون عندي عملت مع نسكافيه festival 2 days يومين أخذت منهم الرعاية 3000$ كان عمري 24 سنة أو 23 جبت بbands من الشام من حمص عملتها يومين بحلب حتى عملت حفلة بالصلنفة يعني عملت بكذا محافظة صرت أعمل إيفينتات يعني كنت حب to get people together يعني كان في هدا entrepreneurs side فيني اللي هو الجانب الريادي خلينا نقول شو بالعربي بحب أتحوتك يعني بحب ما بحب ضل ثابت بحب أعمل شي 

نسرين مشكلة في قلة التركيز وما بحب يضل ثابت مو كأن نور عم يحكي على متلازمة فرط الحركة والنشاط الADHD هالمشكلة اللي عانوا منها كتير شباب وأطفال بوقت ما كانوا أهالينا سامعين بهالمتلازمة ويعتبروا كل هالتصرفات شغب وشقاوة وبيستاهل الطفل يتعاقب عليهن 

نور أنا تشخصت بالADHD من 3 أشهر من جديد يعني فصار حديث حكيت مع صديقي من الابتدائي من شي أربع خمس سنين هو يعني مختص طب نفسي للأطفال بألمانيا يعني حديث بجر حديث حكالي أنه الADHD أو متلازمة فرط الحركة والنشاط وعدم التركيز أنه هاد عم يحكيلي عن الناس اللي بيكون عندها ياه ما بيقعدوا يدرسوا وكذا قام هو لما قلي هيك أنا صفنت يعني أنا هيك سكنت لدقيقة قلتله مهيار يعني إنه حكيلي شوي عنه كمان فلما حكالي أكتر قلت لك يا الله أنا معي هي القصة أكيد لأنه أنا ما بتذكر يوم بحياتي درست ما بتذكر يوم بحياتي قدرت أقرأ كتاب مالي خلق أقعد بمل بسرعة فطبعاً تم تشخيصي هلق من 3 شهور بالقصة طبعاً يعني ما بدأت علاج لسا لأنه كنت مسافر بس حابب جرب أبدى يعني لشوف أنه إذا بيكون له مفعول إيجابي على حياتي يعني بصراحة 

نسرين بيقولوا أنه كل إنسان عنده 24 قيراط من النعم يمكن نور كان عنده طوشة وقلة تركيز لكن الله وهبه ملكة التواصل مع الآخرين وهي أساس العمل في قطاع السياحة وأول مهارة من مهارات الضيافة وهيك بدأ القدر يدل نور عالطريق 

نور يعني موضوع السياحة كثير وجدت نفسي بهالمصلحة بحب أحتك مع الناس بحب أتواصل مع الناس كثير هيك طبعي وطبعاً يعني شغل الحفلات كمان كمان فيه احتكاك مع ناس كثير جيبي ناس أنا كثير بنبسط لما أجيبن ويكون الحفلة حلوة ويكون الكل يعني يكون سعيد يعني هي نوع شخصية خلينا نقول اللي أنا تماماً يعني بحس أنه أنا كثير شخصيتي مناسبة لهالقصص أكيد لأ ما كنت يعني لو جبت طب ما رح أقعد أدرس طب لأنه ما حأستمتع كون طبيب متأكد ما كنت بنجح فيها لما كنت بالجامعة آخر سنة كان عم يفتح أوتيل شيراتون بحلب فهون أنا فتت فيه بposition كنت مسؤول عن الناس اللي بيسموه الchief concierge أو bell captainهو بيكون مسؤول عن الفريق اللي بيشيل الشنط وبرحب بالزباين وبيعطيون قهوة هلق أنا ما بقلك يعني طبعاً بسبب تفكيرنا العربي أنه ييي أنا عيلتي معروفة ييي هلق بدن يجو الناس على الأوتيل بيعرفوني أنا بس معلم بس بشيل الشنط أول شي كثير أنه استصغرت القصة اللي بدي أعملها يعني أنه أنا كان لازم أكون front office بس طبعاً يعني بعد ما تعلمت المصلحة وهيك يعني هذا الposition اللي أخذته كثير مهم تماماً وactually وحتى فيه كان مردود مادي كثير حلو يعني وفيه احتكاك مع الزباين يعني هو بالحقيقة لما المدير حطني chief concierge أنا ماكنت مستوعب وقتها أنه ييي أنا بدي كون هي القصة بس أنا كان عندي team يعني عندي كان team وكنت أنا اللي بالوجه أنا أنا اللي عم رحب بالزبون يعني أنا هو أول شخص برحب بالزبون بالأوتيل هو أنا فكان هدا الrole يعني اللي كتير مناسب لشخصيتي تعلمت كثير هونيك اشتغلت 3 شهور كان بري أوبننيغ team أول ما يفتح الأوتيل صار تدريب عكل الأقسام فكان كثير عندي اكتسبت معرفة حلوة كتير عملية على أرض الواقع بالأوتيل اشتغلت هونيك سنة ونص طبعاً نقلت على غير قسم اشتغلت في قسم الحجوزات كوني كمان بغرغر وبحكي بالتلفون فحطوني بقسم الحجوزات يعني وصلت لمستوى بعلاقات مع الناس عالتلفون يجي مدير مكتب سياحي عالreception عالإستقبال يقلن وينه نور بدنا نتعرف على نور شخصياً عقد ما بنيت علاقة مع الناس حلوة عبر التلفون طبعاً هون أنا طموحي كبير يعني بدي يعني بدي وصل لمحل فما حسيت الأوتيل قدرت وصل أكبر بالسرعة طبعاً ما عندي خليني قلك الصبر فأنا هون يعني تنقلت في كذا أوتيل رحت على أوتيل 4 نجوم واشتغلت بشهبا الشام واشتغلت بشركة كان وقتها Europe Car وكان Budget كمان استلمت مديرهم بحلب مدير التسويق 

نسرين يبدو حتى طلعة نور من سوريا كانت مرتبطة بتحقيق الأحلام القدر كان عم ياخده من إيده دادي دادي ليجيبه لهون على بريطانيا مو بس هيك حطله قدام عيونه أشخاص ليحفزوه ويشجعوه 

نور هلق لما كنت عم بشتغل بالشيراتون لهلق بذكر هون أفكار السفرة برا البلد بلشت تجي على راسي إجانا واحد سوري هولندي كان عم يدرس بجامعة هولندية معروفة لإدارة الفنادق وكان عم يعمل فترة تدريب عنا بمختلف الأقسام هلق أنا هون طبعاً عندي طموح فطموحي عالي وأنا شفته هذا الشخص كيف إجى وعم يقعد مع المدير العام وأنه ممكن يوصل يصير مدير عام وهيك وحكالي على الcourse أو على المنهاج أنا كتير حبيت قلت العمى أنا لازم أعمل إدارة فنادق وبلشت أدرس لما بيكون عندي ضغط وبدي لحق مخي بقى وينك يعني بيكون طيارة فهون قدم أعبي أعبي تطبيقات أعبي applications أعبي applications وكنت يعني أنه بوقتها كمان مركز بدي أدرس إدارة فنادق فرحت قدمت عجامعة Oxford Brookes طبعاً مع العلم هي جامعة كتير ضعيفة بإنجلترا ما قوية بس أنه قلت فيها اسم Oxford وقدمت من بين الجامعات اللي قدمت عليها هي جامعة Durham Durham University واللي كنت أنا أقراها درهم قلت يللا شو جامعة اسمها باسم العملة الإماراتية وافقوا علي وطلعت طبعاً كله آخر لحظة أنا معروف بالعائلة يعني كان بابا يقلي أنت ملك اللحظات الأخيرة 

نسرين هون خبرني نور أنه بأثناء عمله بالشيراتون قبل ما يسافر تعرضت العائلة لهزة قوية جداً وصرتوا بتعرفوا طبيعة نور العاطفية والأثر العميق اللي ممكن يكون تركوا فيه فقدان والدته 

نور اكتشفنا أنه معها سرطان بالدماغ هي كانت كثير فترة صعبة علينا بالبيت يعني أنا كان عمري وقتها 24 يعني أخوي الصغير كان 9 أصغر واحد كانت عبارة عن صدمة كثير كثير بشعة وكثير صعب أنه الواحد يستوعبها بصراحة الدكاترة قال ما في داعي نعمل عملية لأنه أنه كان وقتها عندها 4 كتل أفضل تضل معنا في البيت طبعاً أنا ضليت عم بشتغل بالشيراتون في هذا الوقت بابا ما عمل شي قضاها معها أخوي الصغير طبعاً لسا ما كان ما كان مستوعب إيش اللي عم بصير يعني 9 سنين لسا كان ولد كانت كتير كتير كتير صعبة يعني بدون ما أدخل بالتفاصيل لهلق بتذكر كنت concierge بالشيراتون وإجاني عم أحكي معها تلفون كانت عند بيت خالتي بكيت قام الشباب قالولي أنه فوت على الغرفة اللي جوا عالمستودع تبعنا بكيت لأني قعدت أتذكر لهلق بتذكر أنه أنه قعدت فكر أنه بده يجي يوم ما أرجع أسمع صوت أمي أي الله يرحمها 100 يوم ماتت مروا هيك بسرعة كتير كبيرة يعني هي كانت بالنسبة لإلنا نقطة تحول بالعائلة يعني كثير صعبة وطبعاً يعني أنا طلعتي لإنجلترا بعد وفاتها كمان صعبة أنه أترك أخوتي بس طبعاً يعني بدي ألحق طموحي وأنا حسيت أنه بالسفر والدراسة فيني أعمل شي 

نسرين وفاة والدة نور المأساوي كان دفعة معنوية قوية له ليغادر البلد بأسرع وقت وتغيير المكان بكون سلوى كبيرة للقلب الحزين وبيلهي الإنسان بمحاولات التكيف مع بيئة وناس جداد وتحدي النفس لالدراسة والإنجاز 

نور لهلق بتذكر كيف أول يوم مشيت على البرج الصبح رحت عTesco شفت مرة كثير من الناس هنيك حبابين بالشمال الشرقي بإنجلترا كثير حبابين طبعاً هنيك اللهجة فوق كثير غريبة الJordy accent لهجتهم ما بتنفهم لهلق بتذكر هي المرة حكت معي وأنا أهزلها براسي وأبتسملها يعني ما ما كان عندي غير هالاسلوب لرد عليها مع أنه إنجليزيتي كويسة صرت أحكي معها بس ما فهمت يعني بسبب اللهجة طبعاً كان أفضل أدرس ماجستير عام ما أكون بس مختص بالhotel management لأنه هو بيفتح مخك أكثر بقى بتفهمي غير صناعات غير مجالات وانقبلت عماجستير بالتسويق هو ماجستير تسويق وإدارة الجامعة كتير حلوة جوها التعليمي كتير حلو أسلوبهم خيلة الطلاب من كل الدنيا يمكن كنت وقتها السوري الوحيد بالجامعة لا والله كان في واحد سوري بس ولدان بالكويت الحلو فيه يعني أنا حسيت هذا ملعبي لأنه رحت لهونيك أنه في كتير ناس ومن كل الدنيا فكتير انبسطت وعملت علاقات حلوة بالجامعة تعلمت بس كمان ماكنت أدرس يعني وجامعة Durham كتير صعبين لهلق بتذكر لما يكون عندي مثلاً assignment بدي أعملها يعني روح بالليل وأسهر بالمكتبة وغسل راسي تحت الماء الباردة بس حتى ظل صحيان وأنا ماسك بالمراجع وبقلب بس مشان أكتب الassignment ولحقها بهالأثناء الدراسة كنت وأنا عم بشتغل على مشروع التخرج بالصيف فضت الجامعة الناس راحوا عند أهاليهن أنا ضليت قلت بدي أشتغل شي بس هيك جرب الجو 

نسرين أحلى شي بشخصية نور أنه ما بيتكبر عالشغل وبدأ يوزع بروشورات للمطاعم وبعدين اشتغل مندوب مبيعات لشركة اتصالات ومرت أيام الجامعة وبقي 3 شهور عالتخرج فسافر نور للبحث عن عمل بأجمل منطقة في إنجلترا المعروفة باسم Lake District

نور بهذا الوقت اشتغلت بأوتيل كانت فترة Christmas قلتلن بشتغل أي شي اشتغلت kitchen porter غسل صحون يعني هون بتذكر كان وقتها إنجلترا بتعطي سنتين فيزا عمل فأنا كنت راكض لحق أنه لاقي شغل مع فيزا العمل فيزا العمل بتبدى 01-02 فقلت لازم لاقي شغل قبل 01-02 أو 01-02 يبلش حتى أقدر هالسنتين أثبت حالي لحتى يعملوني high skill immediate أو هني يعني يعملولي يصيروا كلالة يعملولي sponsorship طبعاً كنت عم قدم أوتيلات هنيك كلوا يقلي over qualified over qualified قدم على مدير استقبال يشوفوني متخرج من Durham ومشتغل بأوتيلات وكنت مدير وهيك بس في أوتيل اشتغلت عنده قلتلك كان معتازين ناس يشتغلوا كwaiter وهيك فاشتغلت أي للأسبوعين كفيت بس بعدين صاحب أوتيل قلي نور أنت كتير over qualified يعني كتير انبسطنا معك بس أنه بقول الشغل لإلي فقدمت قدمت يعني ما بتذكر كم شغل قدمت لبالأخير بيجيني في شركة هيك كانوا يوظفوا ناس بيحكوا لغات في كان شركة الInterContinental للفنادق كان بالhead بمقر الشركة الرئيسي اللي هو مقر الشركة وليس على أوتيل أنت عم تحكي بالمقر الأساسي فيه مدير الشركة التنفيذي والإدارة هنيك في فريق مبيعات مركزي وكان بدن حدا بيحكي العربي وعملت المقابلة ونجحت فيها وعقدي بلش بـ01-02 اللي هو مع بداية الفيزا تبع السنتين عطتني ياها الحكومة 

نسرين عمل نور بشركة الInterContinental في لندن كان منعطف كبير بهالشركة نور مو بس تشرب كل الخبرة المطلوبة بمجال حجوزات الفنادق لكن بدأ يتفتح ذهنه على حلول للمشاكل يللي بعاني منها هالقطاع ويفكر بbusiness تكنولوجي جديد يجمع كل ما سبق الخبرة والحلول 

نور الrole تبعي كان key account manager اللي هو مدير علاقات لشركات كبيرة فبالعادة لهالشركات الكبيرة في عندن حدا بقسم المشتريات كلما كبر المصروف عالأوتيلات وعالطيران وهيك بصير في شخص هو مدير السفر خلينا نقول بالشركة فهذا شغلته يطلع وين الموظفين اللي بيحجزوا وكذا بطلع وين عم يصرفوا وكل سنة بيتفاوضوا مع الأوتيلات اللي بيحجزوا معهم أكثر شيء بصير اتفاق افترضي مثال والله الInterContinental بدبي بجي بقلن لApple مثلاً أنه والله بيقعدوا بدبي 5 آلاف ليلة باريس عندها 10 آلاف فأنا بحاول نخليهن يضيفوا بعض من أوتيلاتنا من البرنامج تبعن وأعطين أسعار خاصة متضمنة مثلاً access GYM فطور كذا وهني بصير لما الموظف أو موظفة بدن يسافروا بشوفوا عندن ليستا بأوتيلات إذا كان بدن يحجزوا فيها هلق أنا الrole تبعي أو دوري كان بس إدارة العلاقة ما بين الأوتيلات بهالدنيا كلها وهالشركات طبعاً أنا اشتغلت كتير يعني هلق أنا كتير وعت بضمن يعني ضمن شخصيتي كمان لأنه علاقات مع الشركة علاقات مع كل الأوتيلات من الصين للبرازيل بنيت علاقات كثيرة يصير كذا سنة عنا مثلاً ورشات عمل يجيبوا المدراء المبيعات من كل الأوتيلات بأوروبا نجتمع طبعاً أنا روح بس أعمل networkingأبني علاقات بحب يعني يكون في ورشات عمل الصبح والغدا يكون فيه فرصة تتقابلي مع الناس بالليل يكون فيه حفلة فتعرفت عكثير ناس صار عندي خبرة صرت أعرف شركة إيش بتعمل توجهاتها هلق الفكرة الأساسية اللي خطرت ببالي من خبرتي بهالعمل في الInterContinental صرت شوف أنا المشاكل على مستوى شركة كبيرة بتدير أوتيلات بكل الدنيا يعني كان عندن 5 آلاف أوتيل كنت شوف مشاكل الأوتيلات بمجال الاجتماعات والأعراس مشاكلن بإدارة الزبائن يعني مشكلتهم كانت كبيرة بإدارة الاجتماعات والأعراس لأنه لهلق هي عملية تعتمد على إيميلات عالتلفونات بتعتمد على ناس ليديروها فبشكل عام اكتشفت أنه لا شركة الأوتيلات بتعرف قديش أوتيلاتها عم بصير عندها اجتماعات وإيفينتات خصوصي من الشركات الكبيرة اللي كنا عم نديرن ولا حتى الشركات الكبيرة اللي عم نديرن عندن فكرة أو مين اللي بيحجز إيفينتات بالشركة لأنه متبعثرة بكل الشركة والسبب هو عدم وجود الوجود التكنولوجي 

نسرين كل إنسان لما يلاقي فكرة business بتستحق المغامرة لازم يكون عنده أساسيات غير الخبرة والمعرفة على الأقل لازم يكون معه التمويل وراس مال ونور عول بهالموضوع على بعض الأصدقاء لكن الدنيا كانت كلها مكركبة وما تركتله غير خيار وحيد 

نور قلت لحالي ما حدا بحك جلدك غير ظفرك ما كان عندي غير حل واحد قلت أنا لازم كرس حالي لهالفكرة وحتى كرس حالي لهالفكرة فأنا لازم أتحرر من فيزا العمل وكمان حبيت يكون عندي ملجأ آمن خليني قول إنه صار ما صار بالشركة وين بدي روح فتخليت عن فيزا العمل وصرت لاجئ بإنجلترا تركت شركتي كنت top former بالsales بكل أوروبا كان أول واحد بالsalesربحت جائزة كمان حسيت أنه في شي ما عم بقدر حققوا عرفتي يعني حسيت أنه شغلي عند الشركات أنه أنا عندي طموح أكبر عندي أفكار عندي شي بس بتحسي حالك قاعدة بصندوق محدودة الإمكانيات ما فيك تعملي شي بهالأثناء كان في صديقي بالجامعة كتير هو بلغاري شاطر بالتسويق وبيشتغل بشركة تطوير ببلغاريا قلي تعا منشتغلك ياه ببلغاريا وطلعت عصوفيا صرفت كل مدخراتي وقتها من شغلي صرفتن على الشركة وبلشت أشتغل مع مهندسين هنيك واشتغلنا عالبراندينغ وعملنا أسست شركة بإنجلترا محدودة اسمها Wizme اختصار لWizard For Meeting And Events يعني اليوم أنا بدي أعمل training وبدي أحجز مكان للtraining وبدي أجيب فيه projector وبدي أجيب coffee break وبدي أجيب dinner وبدي أحجز غرف بجوز منامة هالعملية لهلق بتعتمد عإيميلات وتليفونات وبدها خبرة وكتير صعبة ومعقدة فأنا كان يعني أساس الفكرة أنه أنا بدي أعمل شي سهل مثل booking.com مثل Airbnb أسهل عملية الحجز وأعملها متاحة لأي حدا يحب ينظم أو يعمل event شو ما كان حجمه أو نوعه

نسرين وهيك آمن نور بفكرته وأسس Wizme Wizard For Meeting And Events بس يا ترى هالشي بكفيه شو عمل حديدان لما نزل على الميدان 

نور طبعاً تخبطت أول فترة يعني ما قدرت أعمل شي لأنه جبت مبلغ قليل وقتا 30 ألف وأنا بدي عيش منا وبدي عيش مهندس فبي 2017 صرت هومليس بهذا الوقت رفقاتي حتى نفسن خلص خيو إيش بدك بهالشغلة خلص روح ارجاع اشتغل فما حبيت أترك القصة مع أنه كلهم كانوا ما في أي تشجيع إنه كفي انعزمت عevent أحكي فيه كان بشهر أيار هلق رفيقي اللي كان ينيمني عنده قال أنت نور أنت مجنون يا أخي لا عندك منتج لا في مصاري ما في فريق شو بدك تلحق تعمل بشهرين تعذبت كتير بنيت اللي بدن ياه مني بهذا الشهرين بسبب هذا الevent اللي فيه تعرفت على ناس كتير مهمة بالمصلحة ناس كنت بعرفها من قبل قويت علاقتي معها قدرت بعد هذا التاريخ بكم شهر منن ومن ناس تانيين جبت تمويل وقتا 130 ألف جنيه استرليني عالتمويل اللي أنا بريحني وهدول ناس كانوا ولاد المصلحة مدراء بشركات كبيرة مسؤولين عن السفر والevents أو الاجتماعات بالشركات فإجاني ناس خليني قول استراتيجيين كتير حطوا مصاري وكانت نقطة البداية من جديد خلينا نقول اللي صارت بآخر 2017 

نسرين لما تكون حاطط بين عيونك هدف وبدك توصله لازم تتوفر فيك صفتين الصبر والعناد بس في أسباب تانية للتوفيق مثلاً أنك تكون طول الوقت عم تفكر بغيرك 

نور كنا عم نتابع الأحداث بالبلد واللي عم بصير يعني كان كتير فترة صعبة ماي شي قدام اللي مروا فيه الناس بس نفسياً كتير موضوع صعب أنه أنت قاعدة وعندك خضار وعايشة حياة يعني في عندك كل شي وأهلك ما عم تعرفي تتصلي معهن بتحكي معن ما عندهم أكل ما في شي ياكلوه ما في أمان أختك عم تبعتلك مسج على الواتساب عم تسمعي صوت خبط وضرب وهيك وعم تبكي يعني موضوع إنه الإحساس بالعجز وأنت بعيد وأنت مالك قادر تعمل شي طبعاً أنا عندي ميزة بسبب أني كوني شخص متفائل وإيجابي أنه ما بتطلع عالناحية السلبية أو كيف فيني كفي شغلي وحياتي وأعمل شي وأنا لساتني مشدود من ورا يعني بالوضع عنا بالبلد فأنا كنت يعني حاول ما فكر أتجنب فكر شو بدك قولي حط مشاعيري شوي بالfreezer لحتى أقدر ركز عالشغل لأنه أنا بعرف ضمن شغلي أنا فيني ساعد أنا فيني أعمل شي نحنا اليوم المنتج اللي بين إيدينا ما في منو بSilicon Valley شو هي المشكلة اللي عم نحلها نحن بWizme اليوم مثل ما قلتلك حجز الاجتماعات هو عملية يدوية تعتمد عالإيميلات عالتلفونات بتعتمد على ناس فبالتالي ما فيها data من كل الأطراف سواءً الناس اللي بتحجز أو الناس اللي بتستقبل حجز الإيفينتات اللي هي أصحاب الvenuse أو مقرات عقد الاجتماعات فأنا حبيت أعمل طريقة حجز جديدة تسهل وتتيح لأي حدا يقدر يحجز تنظيم عملية الحجز بحيث تكون قمة بالكفاءة من البداية إلى النهاية فهلق اليوم عاملين منتج عم نبيعوا لأصحاب مقرات عقد الاجتماعات اللي هني ممكن يكونوا الأوتيلات ممكن يكونوا مطاعم ممكن يكون الجامعة ممكن يكون الملعب gallery أو متحف يعني أي مكان ممكن يكون فيه عقد الاجتماع اليوم هدول الأماكن أو المقرات عندهم مشاكل بعد Covid عندهم مشاكل بالتوظيف الناس تركت المصلحة لأنه ما عاد في اجتماعات وما عاد في رواتب للموظفين فكرت أنه لازم أعمل تطبيق يسهل إدارة الحجوزات كاملة من الأول للأخير كيف فيني أعمل عروضات الفواتير العقود وكيف فيني سهل حياة الموظف فاليوم قلت بدي أعمل منتج يسهل عمل الكتير يكون مطور بالذكاء الإصطناعي عم بساعدن بعملهم بروح كل شي له علاقة بالstress عم يؤتمت عمل الأمور الأدمن كاملةً ويخليهم بس يركزوا عالزبون وكيف الزبون فيه يعمل event ناجح 

نسرين شقيق نور فتح شركة مساندة بمصر وتعاونوا سوى لوظفوا عدد من مهندسي البرمجة بسوريا يللي بفضلن نهض المشروع ونجح واستمر مشروع كان وراءه شخص بيتمتع بروح إيجابية لا تعرف الاستسلام 

نور ماعندي أبداً سلبية بحياتي وما بحب حتى أكون أتعامل مع ناس سلبيين سبحان الله يعني طبعي هيك يعني إذا حدا سلبي أو هيك ببعد عنه يعني هلق حلو يكون في جنبك حدا شوي واقعي خليني قول بس حلوة الإيجابية يعني اليوم أنت إذا ما كان عندك هالروح اللي دائماً عم تبحث عن شي مهما كان في صعوبات لأنه بالأخير هي الحياة مليئة بالصعوبات يعني شو ما في شي أبداً إجا بالسهل أكيد نحن لما منكون ببلاد غريبة عنا دافع أكبر بكثير من الناس اللي قاعدة هون بدنا لأنه بدنا نعمل شي بدنا نبني شي بحياتنا فطبيعي يكون في تحديات 

نسرين بتمنى كون قدرت بهالحلقة أعطي نموذج إنسان يحتذى به نموذج كان طول الوقت حاسس أنه خذل عائلته اللي كان بدن ياه يطلع دكتور لكنه الحقيقة نجح لما ما خذل حاله ولأن عرف أنه يقدر بمجال غير تقليدي يبتكر فكرة غير مسبوقة بترككم مع ضيفي لالختام بنصيحة لكل مين حابب يعمل business ويصير متل اللاجئ المدير نور موقع The Refugee Boss

نور أول شي يطلع على خبراته اللي جاي فيها لهون يعني عنجد بقترح فكرة العمل بشركة هون لو فترة بسيطة بحيث الواحد يطلع أول شي على جو العمل بجوز أنا رحت اشتغلت ضمن مجالي اللي أنا بحبه رحت اشتغلت بشركة أنا ممكن أشوف فيها مشاكل أقدر أنا حلها فأنا أول شي صار عندي خبرة كيف بصير الشغل هون 2 بنيت علاقات بهذا المجال فأنا فيني إذا بدي شغلي الخاص فيني أبدى لأنه صار عندي خبرة كيف بهالقصص هاي يعني أهم شي يعني أنه ما نضل واقيفن محلنا أنا يعني لازم نضل عم نفكر كيف فينا نغير فيه من واقعنا ويحسن حياة الناس طبعاً هذا الحكي بمجال التقنية بس طبعاً في مجالات أخرى يعني هلق اليوم أنا بعرف كتير لاجئين ما شاء الله شاطرين بموضوع الأكل بعرف الصبية الآنسة ما بعرف شو اسمها بالMidlands بتعمل جبنة مثلاً هلق فعندها خبرة شوي طبعاً بهالمجال إجت وفتحت business شافت في ثغرة بهالمجال شافت أنه في سوق بيتقبل هيك قصة عملتها هلق ممكن واحد يعمل مثلاً متجر إلكتروني بأمازون ويجيب شغلات يجيبها من سوريا بيعرف أنه بتلقى إقبال فالفكرة في فرص بس بدنا دائماً نفكر خارج الصندوق ونلحق شغفنا