أحمد حمامي: هجر المحاماة وافتتح سلسلة مطاعم فاخرة في لندن

نص الحلقة :

أحمد يعني أنا إذا بحكي كلمة كان ما منيحة كانت أمي تحطلي فليفلة بتمي و تحطني بالحمام مثلاً أنا انحطيت بغرفة التعذيب 7 أيام يعني أنا عم بتفرج عالتعذيب 7 أيام 24 ساعة يعني أنا بالنهاية حلبي وبظن هي الكلمة بتكفي هلق بيزعلوا منا الشوام بس يعني أنت اليوم جاي مانك جاي زيارة أنت جاي صار وطن بديل إلك ورح يصير وطن أولادك عنا المثل إنه إيديكِ ورجليكِ بمي باردة ما في شي دائم قليل يعني اللي بينزل ممكن يشتهي على أرجيلة هلق صارت الأرجيلة عم تروح لعندن 

نسرين سبق وقلت إني اكتفيت ما عاد بدي أستضيف ناس عاملة business مطاعم بس لما سمعت أنه ضيفي ترك المحاماة والتجارة وفتح واحد من أشهر المطاعم العربية في جنوب لندن أكلني الفضول وقررت أتعرف عليه وأسمع منه سر هالتحول الكبير وإذ بيطلع ضيف The Refugee Boss السيد أحمد حمامي من حلب حلب أم المحاشي والكبب والمامونية والطرب ومع أنه أحمد ما بيعرف شي بالطبخ بس بيعتقد إنه الإدارة هي أساس كل business ومن البداية فتحلنا البواب العميقة وسمحلنا ندخل على طفولته وظروفها الأساس اللي انبنت عليه شخصية المدير اليوم 

أحمد أحمد حمامي سوري من حلب نقول المواليد ولا مافي داعي مواليد ال82 طفولة كانت طفولة عادية ربيت بين والدي ووالدتي لأنه كانوا منفصلين كانوا هنن بس كان في يعني نوع من الانفصال الصحي خلينا نقول إنه ما في هالمشاكل بيناتهم بيحكوا مع بعضهم يعني كانت الأمور شوي طبيعية إي طبعاً طفل شقي كثير هلق أنا الوحيد بس ما كنت أنه هالمدلل يعني بقلن وحيد ما بصدقوا أنه أنا كنت وحيد كان في تربية وصارمة من شوي بس بنفس الوقت أنا كنت كتير مشاغب يعني هلق ما بدنا نحكيها هلق نحن بإنجلترا هون كانوا سحبوني من والدتي يعني يعني أنا إذا بحكي كلمة كان ما منيحة كانت أمي تحطلي فليفلة بتمي وتحطني بالحمام مثلاً أي أي يعني مو أنه الطفل الوحيد المدلل اللي مسموحله كل شي وبيعمل كل شي يعني مثلاً أنا أوقع عالأرض مثلاً يركضوا العالم تقلن مثلاً أمي لا معلش الولد بيوقع كذا أنه عادي ينزل دم عادي مثلاً ما إنه تربية الولد الوحيد المدلل عرفتي لأ ما هيك بس ما ربيت إنه طفولة أنه والله ولد وحيد مدلل ومسموحله كل شي ومعلي لا لا ماني مجلوق أبداً يعني بس إي يعني أنا لو كان عندي أخوة ولو كنت لحالي شخصيتي هي 

نسرين كتير متناقضات شكلت شخصية أحمد طفل وحيد ما عرف مميزات الطفل الوحيد أب وأم منفصلين لكن متفقين على ضبط شغبه وتربيته بشكل صارم طيب مين فيهم أثر فيه أكتر وكيف ساهمت العوامل السابقة بتشكيل شخصيته 

أحمد هلق أنا أبوي مثلاً كان يكتب شاعر وكاتب سياسي كان كان شيوعي هو بتعرفي أنت الشيوعيين مثقفين أكتر من الباقيين يعني أنا من عمري 5 سنين يقعدني جنبه عالطاولة شوكتي سكينتي يعلمني شلون أقعد شلون مثلاً بدي أكل بيحكي معي بطريقة كأن عم يحكي مع شخص كبير هلق يمكن لأنه هو اتجوز كبير وجابني كبير يمكن صارت العلاقة هيك ما بعرف بس هيك ربيت معه يعني أصدقائي أغلبهم كلهم أكبر مني يعني مثلاً أنا عندي أصدقاء حتى لما أنا كنت بالابتدائي مثلاً عندي بالرابع خامس مثلاً أصدقائي سادس سابع ثامن يعني اللي من قدي مو نفس التفكير مو نفس العقلية يعني دائماً كانوا الأكبر مني حتى هلق بالشغل بالكذا يعني أنا عندي أصدقاء أبهات رفقاتي يعني أنا بطلع بروح مثلاً أبهات رفقاتي بقولولي نحن أبونا مأمنيين هو معك مثلاً نحن مأمنيين أنه هو معك يعني 

نسرين حكالي أحمد أن بصغره كان يحب كرة القدم والبلياردو وعلق فيهم لفترة وبعدين تركهم وكانت النداهة رح تسحبوا لطريق السياسة اللي ما منه رجعة لولا أنه الحياة العملية في مجال الحقوق والمحاماة خيبت آماله وآراء والده النابعة عن خبرة سياسي عتيق أقنعته وخلته ينعطف انعطافة كبيرة نحو التجارة وتحديداً مجال الصرافة 

أحمد إبتدائي إعدادي ثانوي كله كان بسوريا بس فترة الجامعة انتقلت لمصر درست في مصر وأحياناً ببيروت لأنه جامعتي كان إلها فرعين فرع بمصر وفرع في بيروت فبس الأغلبية كانت ال3 سنين أول سنة ببيروت و3 بالإسكندرية بمصر وبعدين رجعت عملت أستذة عدلت شهادة وعملت أستذة سنتين ودخلنا على موضوع العمل يعني ما كملت بالمحاماة لأنه ما حسيتها أنه ببلادنا يعني إلها هل خلينا نقول مانها مهنة علمية يعني هي مهنة علمية بس بالنهاية يعني صارت مهنة للي بيعرف عالم أكتر للي بيدفع أكتر للي بيعرف طرق للرشوة أكتر فما حسيتها بتشبهني كتير فما دام هي business وbusiness لأ بروح عالbusiness واشتغلنا عنا كان شركة صرافة وحوالات حوالات مالية وأمور بنكية وهيك واشتغلنا لبين ما صارت الأزمة كنت أنا بفترة خلينا نقول مراهقة وبعد كنت أكتب أكتب شوية شعر كتبت شوية مقالات منهم انتشروا بلبنان مقالات شوي سياسية أنا بعمر 22 23 وبعدين وقت دخلت عالجامعة وبعدين على موضوع الشغل ما ضل في هالوقت يعني أنا كنت أقعد أنا ووالدي يعني هو كسياسي وكقديم وهيك هو من فترة خلينا نقول العصر الذهبي تبع سوريا يعني هو مواليد ال35 كان هو أصغر قيادي بالحزب الشيوعي بحلب بعمر كان 16 سنة مسؤول منطقة فنتيجة خبرته خلينا نقول واللي شافه بالبلد قلي ابني أنت خليك بالتجارة طلاع من هذا الموضوع لأنه هون عنا ماله مستقبل بدك تضيع حالك وبالنهاية لولا شي لا في أحزاب لا في حرية رأي لا في تعددية حزبية لا في شي فمالك فيها خليك أنت بتجارتك وبالشغل وأنا تجارتي كانت مع أخوالي لأنه أخوالي بالأساس هنن كانوا بعيدين عن هذا الجو كانوا يشتغلوا بالحبوب الزراعية باستيراد من برة يعني مثل السمسم ومثل حبة البركة متل هيك يعني بالرز بالسكر وبالمواد البناء وبالصرافة يعني أنا مع أخوالي وقتها طلعت هيك يعني كان عندي شوية قلتلك هوايات كتابة وبعدين بالشغل ما بقى في وقت يعني وخاصة شغلي كان أرقام وحولات وصرافة وهيك فبتجي آخر الليل بس بدك شوي تريحي مخك يعني عرفتي 

نسرين قبل ما يريح راسه حاول أحمد يحقق حلمه بدراسة الحقوق وسعى من أجل هالحلم لحتى وصل في الطريق لمدينة الإسكندرية لكن هالشاب اللي حلم يكون دبلوماسي مثل عمه وسياسي مثل أبوه اصطدم بالواقع اللي ما بيشبه أبداً فكرته عن الحق والعدالة 

أحمد أنا سافرت مشان أدرس حقوق لأنه ما جبت علامات الحقوق أنا عندي مشكلة خطي يعني أنا خطي والعجلة تبعيتي أنا أحياناً بس خلصت ما بعرف براجع ورقتي يعني لما بجاوب بالإمتحانات بس خلصت بدي أروح أسلم ورقتي وإذا ما كان الوقت صاير بدي أعمل مشكلة مشان أعطيهم الورقة وأطلع فما ما بقدر أنا كتير عجول فكان كثير علامات أنا تضيع عندي من وراء خطي ومن وراء العجلة ما أراجع ورقتي يعني لو أنا على قد العلامات أنا طلعت يعني أنا رحت على مصر لأدرس حقوق لأنه ما قبلت بسوريا فأنا اخترتها لأنه أول شي هي كلية تعتبر كلية الحياة يعني القانون بيعلمك نحن ما مندرس بس حقوق قانون يعني نحن عنا شريعة عنا مندرس الأحوال الشخصية لغير المسلمين مندرس مواضيع الميراث مندرس قانون تجاري وقانون مدني وقانون دولي وقانون جنائي يعني هي تعتبر خلينا نقول كلية الحياة لو ما اشتغلت فيها بتعطيك ثقافة عامة غنية الحقوق بس أنا اخترتها كمان زيادة أنه كنت مفكر بموضوع الخارجية هلق أنا عمي كان سكرتير أول سفارة السفارة السورية في باريس واستشهد هنيك يعني حتى حطولوا قنبلة فجروه بالسفارة بسنة 79 هي كانت أول عملية بتصير خلينا نقول برات سورية بتستهدف أنه القنصليات أو السفارات السورية ما في أحلى منها كلية الحقوق حقوق كتير منيحة كتير كتير حلوة الولد بيتأثر بأبوه بيتأثر فيه وكذا وهيك ويقعد هو يحكيلي وأنا أيام أطلع أهرب من المدرسه وأروح لعند أبوي على البيت يقلي مثلاً أنت ليش أنت ما عندك أقله ما في اليوم الأستاذ غايب بس أقعد احكيلي شلون فترة الخمسينات شلون كنتوا فترة الستينات لما أنت مثلاً أعتقلت بفلان مرحلة أعتقلت بفلان مرحلة احكيلي هيك يعني عرفتي وبس لما أخذت أخذت الصراحة بنصيحته لأني فعلاً فعلاً ما إلها مستقبل يعني اليوم السياسة إذا ما اشتغلت بمناخ خلينا نقول سياسي فيه انفتاح ومرونة وتعددية وحرية ما صفت هذا يعني صفيتي أنت انتهازية متملقة هيك يعني بدك تكوني ونحن هذا الموضوع يعني ما بيضبط معنا سنتين فترة الأستذة تبعيتي وكنت عم أشتغل هاه واشتغلت وإجاني دعاوي يعني إجاني دعاوي منيحة هلق هي هي لأنه بالنهاية المحاماة هي نجاحك فيها بيعتمد على حجم علاقاتك الاجتماعية فلأ أنا إجاني إجاني دعاوي منيح يعني وكنت أعطيهم لأستاذي ونشتغل فين سوى وهيك عرفتي وأستذت وبعدين مثل ما قلتلك ما 

نسرين لما طلبت من أحمد يحكيلي عن حلب وجه نور والحلبية عموماً بس يحكوا عن مدينتهم بينطربوا في كتير أسباب لعشق هالمدينة والشعور بأصالتها وفرادتها مو من وجهة نظر السائح طبعاً بل من وجهة نظر ابن حلب بذاته ورغم هيك كان في غمامة حزن على ما آل إليه حال المدينة 

أحمد حلب من وين بدك نحكي عن حلب من الأكل ولا من الطرب ولا من سهرات حلب ولا من شوارع حلب ولا من بناء حلب ولا من ثقافة حلب يعني حلب مدينة مدينة الحضارة مدينة 10 12 ألف سنة مدينة اللي كانت على طريق الحرير اللي فيها ملتقى ثقافات حتى إذا بتطلعي نحن مثلاً أكلنا أو لهجتنا بتلاقيها مختلفة عن الباقي باقي المحافظات في عنا كلمات فارسية وكلمات تركية وكلمات عربية وحتى في كلمات إيطالية نتيجة التجارة خلينا نقول الخط الواصل بين الشرق وبين الغرب كانت حلب يعني للأسف بقي منها الذكريات هلق حالياً يعني هلق أنا بقولولي مثلاً بتصل فين أنه ننزل أنزل على حلب والله مشتاق كذا بقلولي لا تنزل لأنه اللي بدك تشوفه اللي بتعرفه راح يعني بتنزل على حلب القديمة نصها مدمر الناس اللي هي روح المدينة هي ناسها مانهم موجودين يعني ناسها مانهم موجودة وهي المدينة بناسها كلمة ثقافة شو يعني مو أنه بس حجرة الحجرة مين عملها الحجرة شي امتداد وهذا الشي للأسف هلق ما بدك تنزلي ما بتلاقي ما في عنا خلط كتير يعني هلق الشام الشوام مثلاً إذا بتطلعي بالباص خلينا نقول مثال بيطلع فيهم واحد شامي وواحد ديري 2 من الحسكة واحد من الساحل حلب لأ ما فيها حلب حافظت بعدين نحن مدينة عدد سكانها 4 مليون بس نحن منعرف كل عيلة وأصلها ومدينة شوي ماهي منغلقة بس الناس بتعرف بعضها لأنه ما صار هالاختلاط الكبير مع باقي المحافظات أول ما بيتعرف مثلاً على خلينا نقول خطبة أو جازة أو أي شي أو أي علاقة يعني من وين حضرتك من فلان أه أنتوا من الحارة الفلانية وبيكون هداك مو شايفها للحارة الفلانية بس أصل عيلته من هنيك دائماً في ربط دائماً أنه من شخص لشخص إلا يطلعوا بيعرفوا بعض يعني هي حلب سبب الريف للمدينة هذا مو سبب أهل الريف أو أهل المدينة هذا سبب حكومات متعاقبة على بلدنا لأنه أنت الريف إذا مو منمى ما فيه ماء ما فيه كهرباء وما فيه تعليم متل العادة إجباري الريفي بده ينزل بده يروح يدرس بالجامعة نزل على الجامعة شاف الحياة المدنية ما بقى يقدر يرجع جاب عيلته جاب أهله قعدوا بالمدينة اشتغلوا نحن كان في عنا مثلاً خلينا نقول حكم العمال والفلاحين عم بيجوا موظفين وعم بيجوا من الريف قعدوا خلص ما بقى يطلعوا 

نسرين فكرة السفر لبريطانيا ما كانت بعيدة المنال أبداً بالنسبة لأحمد ومع هيك ما طلع منها لمر بكامل الحزمة السورية من المعاناة والألم اعتقال وهروب واضطراب ما بعد الصدمة ثم التهريب بالبحر 

أحمد نحن في عن الارتباط ببريطانيا من قبل يعني أنا والدتي تجوزت هون كان عرسها صار هون بال79 أو بال80 يمكن كنا نروح ونجي بحكم مثلاً في إلنا خالتي كانت عايشة هون وأنا بال90 لل2009 جاي 3 مرات وبلد شوي بعرفها يعني بعرف خلينا نقول أقل شغلة بعرف طرقاتها وبعرف شلون مواصلاتها وبعرف شوارعها بعض مناطقها لغتها إلى حدٍ ما فأنا اخترت يعني أجي لهون من بين خلينا نقول كانت أوروبا فاتحة كلها يعني كان فينا نروح على أي بلد بس أنا اخترت هون وما كانت سهلة يعني أنا طلعت كمان مثل ما طلع مثل ما طلعت كل السوريين يعني من البلم من تركيا لليونان ومن اليونان بجواز مزور لوصلت لهون شوفي أنا تعلمت من من مو بس من رحلة اللجوء خلينا نقول من الشي اللي صار فينا أنه مافي شي فعلاً ما في شي دايم ودائماً ما تحطي مثل ما بقولوا عنا المثل إيديكِ ورجليكِ بمي بارده ما ما في شي دايم مين كان يخطرله أنه نحنا سوريا يصير فيها هيك دائماً نشوف حوالينا نقول يي نحنا ممكن نصير عجب هيك مثل العراقيين مثلاً أنه أحلام فما في شي دايم وما في شي ثابت ودائماً لازم واحد يكون محضر حاله للمفاجآت دائماً يحضر حاله خلينا نقول دائماً يكون في plan B لأي شي هذا اللي أنا بيني وبينك اللي تعلمته مو بس من شغلة أنه هي هي هي نتيجة يعني اللي صار من رحلة اللجوء وكذا وهيك بس بقى السبب الأساسي هو أنه ماكان شي ثابت ما اللي صار فينا نحن بلادنا خربت فوق هيك شغلة تانية أنا أعتقلت أسبوع بسوريا قبل ما أطلع يعني هون أنا أنا الصراحة عدت علي فترة بسوريا أنا ما طلعت لل2014 بس أنا من لل2013 بال2013 صرت أحس حالي أنا بسوريا بغربه أنا كنت رافض أني أطلع برات البلد ومع أنه شفتي حلب اللي صار فيها بس أنا آخر تقريباً 6 شهور صرت أحس أنا قاعد بغربة يعني لا يعني أمشي بشوارع حلب أنا مالي مالي كأنه ماي بلدي فطلعنا ورجعت على سوريا أنا عشام اعتقلت هنيك قعدت أسبوع بفرع ال2015 أنا طبعاً طلعت عامل الاكتئاب after shock يعني depression after shock لأنه أنا الجثث قدامي والأموات قدامي يعني اللي شفتيهم بصور قيصر أنا هدول شفتهم بعيني أنا انحطيت بغرفة التعذيب 7 أيام يعني أنا عم بتفرج عالتعذيب 7 أيام 24 ساعة عرفتي فهون كانت زيادة أنا علي أساساً أنا مالي داخل يعني هيك دخلات قبل ما بعرفها وهالشوفات هي لأ هيك كتير طبعاً طلعت بنتيجة أنه دفعنا وحكينا وضل في عنا كان شوية علاقات لسا موجودة اللي تنصل من أنه يحكي واللي ما بقى يرد عتليفونه تقولي أنا يعني عامل يا لطيف يعني وأنا لحد الآن ما بعرف أنه شو السبب كان يعني وبعد ما طلعت بهالأسبوع أنا مباشرة لبين ما انشال اسمي عن الحدود على بيروت وصلت من بعد ما قطعت الحدود أنا طبيت ل10 أيام ما أقدر أكل لا أقدر أشرب لا أقدر أعمل شي لرحت عالدكتور ورحت عدكتور نفسي بعدها لأنه صرت منامات وقصص وهيك لأخدت علاج يعني عملت علاج سلوكي لأنه أنا ما يعني يعني الشي اللي صار طبيعي نتيجة ظرف غير طبيعي تعالجت وبعدين ما عندي بقى أمل يعني الشي اللي شفته تحت هي سوريا صغيره بالمعتقل بتشوفي سوريا الصغيره فأنا بعد ما طلعت قلت ما بقى في أمل مستحيل 

نسرين وعلى الرغم من كل ما سبق بيعتبر أحمد حاله محظوظ فوصوله ولجوءه لمكان مألوف سهل عليه مرحلة انتظار الإقامه وبدأ بعملية البحث عن بيت وشغل ويبدو أنه القدر كان مخبيله حصته من النجاح والتيسير ووقفله بطريقه أشخاص قدموله المساعدة والدعم 

أحمد شوفي هي بالنهاية أنا بعتبر حالي محظوظ صارت معي صدف بلجوئي هون فيكي تسميها حظ فيكي تسميها مكافأة بعد العناء أنه مكافأة من رب العالمين أو أنه أنا أعطيك مثال مثلاً أنا عم بدور على بيت ما كان حدا يأجرنا لسا ما معي وراق فأنا بالصدفة قاعد مع شب بالقهوة عم نشرب قهوة بيدخل شخص مصري دكتور هو بيقول أنا عندي بيت حدا بتعرفوا حدا لازمه بيت للأجار مثلاً هي وحدة بعد شهرين عم بدور على شغل دقلي شب قلي في واحد بده يبيع محله بتريد تروح تشوفه قلتله شو هو المحل قلي مطعم أنا هذا الdomain مالي داخل فيه يعني ما بعرف أنا مالي شغال بمطعم قبل بس كإدارة ok أنا فيني أدير يعني فرحت شفته طلع مطعم وكذا وهيك وأخدته يعني ليش عم بقلك أنا بعتبر حالي شوي محظوظ كان معي مصاري أنه أنا اللي الشي اللي ضل عندي ليش أنا يمكن يمكن أكون شوي أحسن من غيري لأنه بما أنه نحن شغلنا كان بالصرافة فأغلب شغلنا سيوله طبعاً اللي راح منه كتير بس ضل في سيولة شوي إنك أنت تكوني عاملة فيهم شوية selling مو أرض أو بناي أو كذا راحت خلص فهي كانت كمان زيادة تخلينا نقول أنه عطتني دفع أكتر والحظ اللي مثل ما عم بحكيلك عالشي اللي صار يعني شقد ماكان ما حدا بأجرك أنت ما عندك إقامة أنا بالصدفة يعني قاعد قلتله أنا عم بدور عبيت أنه أنت وين قلي هون بويمبلدون قلتله أخذته قلي طب ما بدك تشوفه قلتله لأ خلص أخدته من دون ما أشوفه لأنه بتعرفي عذاب البيوت هون بدينا بقى بس شغل وبتعرفي هالبلد هي history يعني على قد بتقعدي في البلد على قد ما بصير عندك ورق أكتر على قد ما بتقدري تاخدي قصص أكتر على قد ما هلق أنت ما فيكي مثلاً هي البلد هون مرسومة على الوقت الصراحة أنا بسميها مثل مثل العسكرية يعني أول ما بتجي ما فيكي في شغلات ما بتقدري تاخذيها بعد شهر بعد سنة بعد سنتين بعد ثلاثة بعد أربعة نتيجة بلد history يعني في ناس كمان وقفت معي ما بنكر في ناس كتير وقفت معي وساعدتني وبنفس الوقت أنا في شغلات كتير تعلمتها من تجاربي نتيجة فشل ونجاح شوية خسارات عم نحكي بمجال نفس العمل يعني 

نسرين سمعة اللاجئين السوريين بأوروبا حلوة كتير خصوصاً أنه معظمهن أثبت أنه مقبل على العمل وقادر على إدارة عمله الخاص وأحمد حمامي المحامي آخر شخص بتتوقع يفتح مطعم ومع هيك أقبل على هالمغامرة وكله ثقة بقدرته على الإدارة وبهالمقطع رح يشرحلي بالتفصيل وجهة نظره بالموضوع 

أحمد هلق هي شوفي لقلك أنا ما بتوقع أنه chef يفتح مطعم هنن شغلتين مترابطات المطبخ والإدارة لا الإداري فيه يطبخ ويكون يعمل control عالمطبخ وعالطبخ ولا الchef فيه يدير مطعم أغلب الناس اللي فتحت مطاعم وفشلت هو chef فكر حاله أنه هو ممكن يدير مطعم ok أنت الchef شاطر بمطبخك بطبخك بأكلك بس الإدارة إلها غير في هي مسألة وقت أغلب وقتك وين بيكون إذا وقتك بالمطبخ أنت ما فيك تكون فوق والمطعم مو بس أكل أنت عم تبيعي خدمة بالنهاية يعني المطعم أنت عم تبيعي خدمة فالخدمة شو هي service منيح تقديم منيح سعر منيح تعامل منيح هي كلها package كامل بتجي هلق أنا بعترف أنا ما بعرف بالطبخ بس أنا فيني أقول حكم أني حلبي ذواق شاطر ماهر في عندي يعني خلينا نقول خلفية عن موضوع الmanagement والإدارة نتيجة شغلي نتيجة دراستي خلينا نقول والبلد هون بتساعد هلق أنا كان أنا ليش ما اشتغلت بشغلي أو بالمحاماة ما كان عندي وقت يعني في تعديل شهادة وفي بعدها موضوع اللغة لتكون أكاديمية وهيك فهي كلها بتروح مني وقت أنا يعني ما طلعت بال20 بس هلق إذا بتشوفي الناس اللي طلعت بهالأعمار الصغيرة شلون نجحت وشلون عملت إن كان بألمانيا وإن كان هون ببريطانيا وإن كان بكل أوروبا يعني 

نسرين أحمد عنده ثقة كتير كبيرة بنفسه فمع أنه مطعمه بيقدم الmenu التقليدي للمطاعم السورية واللبنانية لكنه كان حريص على أنه ينفذه بطريقة صحية خاصة أنه كان داخل على الإندماج بكل ثقله وحدد الشريحة المستهدفة بمشروعه الإنجليز 

أحمد قلتلك أنا يعني ذواق ذواق ذواق ماهر يعني هلق حلبي يعني أنا بالنهاية حلبي وبظن هي الكلمة بتكفي هلق بيزعلوا منا الشوام بس يعني الأكل اللي بقدمه هو الأكل الhealthy tasty طبعاً الأكل هو سوري المطبخ السوري واللبناني اللي هو التبولة والسلطات والشاورما بس بطريقة مو السيخ بطريقة الmarinated يعني والbeefed حمص والمتبل وحتى مدخل أنا بعض الأكلات اللي مو سورية مثلاً متل الطاجين بتعرفي الطاجين هو خضار يعني بالنهاية هي خضار خلينا نقول مسقعة مثلاً بس متعارف عليها هون بيعرفوها أنه طاجين حتى أنا أول ما فتحت ولحد الآن يعني بقلن أنه سوري لبناني لأنه بتعرفي هنن طالعين قبلنا ومتعرفين على أكلن قبلنا يعني هنن لجوؤهم من السبعينات نحن لجوءنا لسا جديد الشريحة المستهدفة هي الإنجليز يعني أنا مالي فاتح للجالية العربية الجالية العربية في مطاعم إلها كتير وفي هلق المشكلة هون شوفي أنا بدي أقلك شغله السوري لما طلع أو العربي عم بحاول عم يحصر حاله بالمجتمع تبعه يعني إذا بتطلعي هلق نحنا خلينا نحكي عالجالية السورية سكنهم قريب على بعض شغلهم مناطقهم معروفة علاقاتهم بين بعضهم هلق أنا يمكن شذيت شوي عن هالقاعدة إن كان بموضوع شغلي يعني أنا استهدفت أنا رحت لعند الإنجليز أعرفهم على أكلنا ما ما رحت لعند العرب هلق العربي أول ما يفتح بروح بيفتح بمناطق بده الزباين العرب طب أنت جاي لهون يعني أنت جاي على بريطانيا فأنت عايش مع إنجليز أنت ادخل في مجتمعهم يعني أنت روح لعندهم وعرف عن نفسك هنن ما رح يعرفوك يعني هن ما رح ينزلوا على Edgware Road قليل يعني اللي بينزل ممكن يشتهي على أرجيلة هلق صارت الأرجيلة عم تروح لعندهم مثال فأنت عرف عن نفسك نقول ثقافتك لإلن لا تضل أنت كأنك أنت ما طلعت من بلدك بالنهاية أنت عايش قوانينهم وبلدهم وثقافتهم الculture تبعهم أنت عايش عندهم الاندماج مو بس أنا والله وصلت عالبلد وخلص أخذت باسبورها معناها أنا اندمجت لأ لا عرفت عاداتهم لا عرفت طرقهم بالتعامل بالأكل بالشرب يعني أنت بالنهاية قاعدين نحن نحن لو كنا نحن ضيوف يعني نحن لو أخذنا جنسيات وقعدنا بس إذا بدنا نضل هيك بدنا نضل ضيوف 

نسرين المحل اللي أخذوا أحمد أصلاً كان فاتح بس مو شغال وبفضل خطته والتعديلات اللي أدخلها على لائحة الطعام وطريقة التحضير قدر بفترة قياسية يدير المكان على أكمل وجه حتى لما كل الدنيا سكرت وقت الكورونا مطعم أحمد ما سكر تعالوا نسمع ليش 

أحمد يعني أنا من أول يوم أخذتوا دخلت مصاري بدك ما تفكري بالربح أول فترة يعني أنا أول ما فتحت صرت أدور أنا أني أبيع أكثر وأربح أقل طبعاً هذا الشي كان يأثر علي مادياً بس أنا كنت مضطر أعمل هيك أنا فاتح بمنطقة فيها 20 coffee shop وrestaurant جنبي عندي منافسة قوية ومحل يعتبر لسا management جديد فأنا كانت الجودة كانت top الpackaging top لحد الآن أنا السعر متل كأني عم تاكلي أو خدمة five stars بسعر 3 نجوم فأنا كان هدفي أني أوصل لانتشار أكتر بأقل الأسعار بس للناس تعرف المحل وتعرف الأكل وتعرف الخدمة وتشوف وتعمل وبعدين دخلنا بقى بموضوع الcatering صرنا نعمل أعراس صرنا نعمل أعياد ميلاد صرنا نعمل كله show يعني نعمل الفلافل قدام الguests إذا أنت مثلاً بالبيوت صرنا نروح المشاوي الbarbecue ويصير قدامهم فهذا الشي مثل ما قلتلك حبوه الإنجليز لهلق نحن شغالين عليه عنا حجوزات لسنة لقدام فالcatering أول شغلة دعاية ثاني شغلة أنه أنت عم بتفرجيهم خدماتك وتفرجيهم الstyle تبعك وأكلك والcatering والbuffet والopen buffet تبعك وبنفس الوقت أرباحه أكتر يعني أنت عم تشتغلي ل600 أو 500 زبون بساعتين عرفتي ok فيها فيها تعب بس لما أنت بتكون صرتي تشتغلي فيه على مدة خلينا نقول سنتين وثلاثة عم تعملي catering صار الأمر سهل يعني نحن منشتغل من الشوك للسكاكين للمعالق للصحون للكاسات صراحة أول وحدة كانت لبطولة للسنوكر كانت وهي أول catering كان إلي كان القلق عندي يومين ثلاثة ماني نايم لأنه بدي ياه يكون شوي مرتب وأول catering فكان كثير حلو فهلق موضوع الcatering بمناطق الإنجليز قليل ما موجود عندهم فيه شركات كبيرة وأسعار كبيرة مو بهذا الترتيب يعني اللي نحنا نعمله أنه تطلعي تروحي أنت على house على الحديقة تعملي الbarbecue قدامهم وتعملي الفلافل واثنين وثلاثة ويترية عم يفتلوا طبعاً وأسعار ما هي أنه هالواو يعني أنا كمان فترة الكورونا ما سكرت أنا ولا يوم اشتغلت مع المشافي يعني أنا قدمت تقريباً شي 7 آلاف وجبة الNHS طبعاً بسعر التكلفة يعني آخذ التكلفة بس إنه ما سكرت المحل أخذنا بعض جوائز كمان ضمنها superhero تبع ريتشموند كتبت بعض الصحف وبعض مقالات نزلت عن اللجوء وعن السوريين My London هي بتجي Network News كمان عملوا لقاء حكوا أنه الrefugeeشلون عم بساعد وكان خلينا نقول كان عنصر فعال بالcommunity وبالمجتمع 

نسرين دوماً أحمد بيشرح معنى اسم المطعم Sidra للزبائن وسجل حقوق الاسم الحصرية إله في بريطانيا وعموم أوروبا وبيشرحلي بالتفصيل ليش لندن اللي بتتجمع فيها مطابخ العالم دوماً في هذا المطبخ السوري واللبناني حصة نجاح وشو الجديد اللي قدمه للزبائنه وصار trend خاص في 

أحمد أول شي الإنجليز نسبة الholiday تبعيتهم أغلبها بمناطق المتوسط اليونان صقلية Sicily بتلاقيهم رايحين لهنيك مالطا خلينا نقول عالأردن إسبانيا إيطاليا هالمناطق شرق الحوض المتوسط خلينا نقول فهذا الأكل هنن أول شي بيعرفوا وبحبوا الرسالة هي يعني الأكل ثقافة تراث اللامادي شوفي بحبوا سلطاتنا الdips تبعنا الحمص والمتبل والبابا غنوج هدول كثير بحبون الفلافل هلق صارت على كل خلينا نقول صارت حتى بالsupermarket الإنجليزي هلق بتدخلي على كل السوبر ماركات صارت الفلافل موجودة يعني صارت طبق رئيسي خلينا نقول للhealthy food أو للvegetarian حبوا الخبز تبعنا بسموه الflatbread أو الخبز السوري يعني هلق الدراسات كلها عم تطلع أن هو أفضل diet موجود هو الdiet تبع الMediterranean هي دراسات عم تطلع عندهم هنن بيعرفوها وهلق الكل هلق إذا بتشوفي صايرة ثورة خلينا نقول بموضوع الغذاء الصحي والhealthy فنحن منيجي بالمرتبة الأولى لأنه أكلنا بالأساس بيعتمد على 80% خضار ok في لحم بس الخضار نحن 80% وأي أي أكلة فيها لحم بيكون فيها خضار إن كان أنا عم بحكي عن الطبخ يعني حتى يعني هلق إذا بتطلعي على على خلينا نقول على المطابخ التانية مثل العراقي لحم ورز مثلاً الإيراني لحم ورز الخليجي لحم ورز الهندي نحن خضار نحن خضار ولحم يعني اعتماد المحل عندي على الأكل التحضير اليومي الfresh على هذا بخفف في الprofit ok بس أنا ما عندي شي frozen أبداً ما عندي شي بيتقدم ثاني يوم أنا كله تحضير يومي وfresh وهذا هنن اللي عم يدوروا عليه حالياً أنا علمتهم على سندويش الكبة أنا هلق الكبة رقم واحد الكبة عندي بتمشي بشكل فظيع أنا كل 15 يوم بدي ألف حبة كبيرة حبة الكبة الكبة يعني برغل هي برغل ولحمة وشوية نوتس يعني الكبة سوري بيجي بيساويها باقي الأكل مدربين عند سوريين بس هنن عندي توانسة أنا عندي جزائرية وأجانب لا لا بحبوا أكلنا يعني الإنجليز بحبوا أكلنا 

نسرين وهيك صار عند أحمد مطعمين والثالث عالطريق ومختار مناطق جنوب لندن مثل ويمبلدون وريتشموند وتوكلنا من اللي فيها زباينه الإنجليز ولما طلبت منه يختم الحلقة ختمها بعتب على السوريين اللي بيتحججوا ببعد المسافة ليوصلوا لعنده وبينصح أنه اللاجئ يغادر منطقة راحته وأمانه ويندمج مع أهل المكان حتى ما يبقى ضيف ويصير بحق مثل أحمد حمامي The Refugee Boss 

أحمد منرجع لنفس السبب منطقتي بعيدة منطقتي ما بيجوا عليها السوريين أو العرب خلينا نقول العرب عندي قلال بالمنطقة حتى ما في بقلك أنا لإجي لعندك ساعة ونص أو ساعة طريق منرجع لنفس المشكلة إجينا عبلاد اللجوء وضلينا منغلقين عبعضنا وما عرفنا عن حالنا ولا اندمجنا صح بنصح أنت جاي على بلد تروح لعند أهل البلد ما نضل نحن بمناطقنا منغلقين على بعضنا وثقافتنا نفسها وأكلنا نفسه وعاداتنا نفسها يعني يعني وصلنا لمرحلة صار هنن بقى يعني صاروا يريدوا يجوا يتعرفوا مين هدول اللي جايين طب نحن نروح لعندهم نعرفهم على حالنا أنت اليوم جاي مالك جاي زيارة أنت جاي صار وطن بديل إلك ورح يصير وطن أولادك يعني هذا هلق أنت وطن بديل لإلك بس هو الوطن الأساسي لأولادك فأنت قاعد معهم وعايش معهم هلق إذا منشوف نحن اليوم صار فيه رئيس وزراء لاجئ أصول لاجئة يعني إن كان وزيرة الداخلية وقبلها وزيرة الداخلية وعمدة لندن هدول كلهم إجوا من خلفية عوائل لاجئة هون فلأ نحن بدنا نقعد معهم بدنا نعيش معهم ونندمج معهم ما بصير نضل نحن بمجتمعاتنا