أسمهان الكراجوسلي: الإعلامية التي كرست حياتها لعلاج الدمى

نص الحلقة :

أسمهان أشياء لا تقال ولا ينحكى فيها مواضيع شائكة ال60 طالب يلي بدقون وشوارب وأنا عمري 19 سنه وما مهتمين أصلاً بالرسم أنه شو الرسم يعني أنه أنا وين كيف أجيت لهون مثل ما بقولوا وقعت بحبن لك حبيتن حبيتن وقعت بالحب  

نسرين كل إنسان بهالحياة همه على قده وكل حكاية على قد ما فيها تنهدات وآهات كمان فيها ضحكات ولحظات حلوة اللجوء لأي بلد على مر السنين ومهما كانت أسبابه هو بحد ذاته محك وفرصة جديدة ليبحث الإنسان عن ذاته ويختبر قدراته وضيفة اليوم من بودكاست ذرف يدي بوصف الفنانة التشكيلية أسمهان الكرجوسلي بتأكد هالشي قضت من حياتها فترة طويلة تتنقل بين العمل الصحفي والإذاعي والتلفزيوني لكن عشقها للدمى كان دوماً يرجعها طفلة تلعب بالألعاب لتؤسس مستشفى الدمى في لندن وتحصل ب2021 على لقب World Best Arab Ceramic Artest تعالوا نسمع أسمهان يلي حترجعنا لدمشق لحي ساروجة ورد وتحكيلنا عن الطفولة وجذور الشغف

أسمهان أيه شو بدي أحكيلك لأحكيلك منطقة ساروجة ورد هي منطقتي محل ما خقلنا وعشنا بالشام من الشام القديمة عيلتنا فيني قلك نحنا 9 أولاد وأم وأب كان بالجيش وكان عنده هواية حب النحت طول عمرنا كان بيبقى يجيب صخر وينحت وجوه وينحت أجساد يعني ينحت شغلات إنسانية دائماً قاعد وعم ينحت أنا تأثرت فيه أخواتي تأثروا فيه لأنه العيلة كلياتها هنن فنانين حتى عندي عموم وعمات كمان فنانين المحيط هذا خلاني دائماً حس بإني أنا كمان عم أنحت معه كل ما بشوف الوالد عم ينحت أنا عم أنحت معه طبعاً الوالدة كانت هي بوقت فراغها كانت دائماً تعملي لعب من القماش بسوق الحميدية كان في بياعين لعب بيحطوا هالألعاب بتعرفي الvinyl أو البلاستيك يلي منسميها وأنا بوقف وبشتهي بس بدي لعبه فبتجي ماما دائماً بتقلي خلص بوعدك هلق بس نروح عالبيت رح ساويلك لعبة وفعلاً منرجع عالبيت وبتعملي لعبة قماشية من قماش وبتحطلها شعر ما بتروح هالذكرى من من بالي بتعرفي كانوا يجيبوا خشبتين يحطوا وحدة على وحدة مثل الصليب الشقف الأولانية اللي هيك الفوقانية العريضة هي الإيدين والخشبة التحتانية هي بيعملوا منها الرجلين دائماً عنا هيك خشبات وبتعمل منن كانت الألعاب بتلبسها هيك قماش وبتساويلا فساتين يعني كنت كثير كثير مبسوطة بس كان دائماً بحز بقلبي وقت بشوف الألعاب بالمحلات بسوق الحميدية إنه ياريت لو عندي وحدة من هدول اللعب وماما تقلي ما معنا هلق مرة انسرقت مني لعبة واحدة بنت إجت سرقتلي لعبة لسا ماما كانت عاملتلي ياها جديدة سرقتها وهربت فيها وأنا أبكي أبكي اللعبة راحت مني راحت ماما ساويتلي وحدة غيرها بس هي الذكرى ما بتروح بتعرفي أنه إجت وسرقتلي ياها وأنا بحب اللعب كتير كتير كتير 

نسرين عشق الدمى رافقه عشق الفن شغف جمع أفراد عائلة فنية وهالشي كان موجود بالدم والجينات لكن أكثر حدا كان باين عليه هو أسمهان يلي لفتت نظر المعلمات والجيران 

أسمهان كانت معلمة الجغرافيا دائماً تطالعني أنا وقف قبل ما يفوتوا الولاد على الحصة أنا برسم الخرائط لأنه بتعرف أنا رسمي منيح فبقعد برسم الخريطة بعمل الحدود بساوي وبعدين بتصير هي بتشرح انتقلنا إلى منطقة تانية بساروجة كمان فبهذا البيت كان في عنا جيران جيراننا كانوا شوي هيك أغنياء فكان في عنا الحيط تبع الكراج منرسم عليه أبون لجيراننا كان من المشجعين لإلي إني أرسم فصار يجبلي حوار منسميه الطبشور وأنه خدي أرسمي يا إلهي شو كنت أرسم وشو كنت أنبسط وهو يجي ويشجعني أرسمي أرسمي يعني هو يشجعني أكثر من بابا وأكثر من أي حدا تاني فكنت أرسم كثير كثير 

نسرين الموهبة لوحدها ما بتكفي كان لازم تتنمى بالعلم وعلى ما يبدو كان في موهبة تانية وشغف تاني عم يزاحم موهبة الرسم 

أسمهان قدمت على كلية الفنون الجميلة كان في مسابقة بهداك الوقت قدمت للمسابقة وانقبلت وكنت البنت الأولى بين المتسابقين فدخلت كلية الفنون مع أني كنت دائماً أنا هدفي من أنا وصغيرة أنا بدي صير معلمة يعني أنا بحب التدريس فكنت دائماً قلن أنا بدي صير معلمة عربي أو معلمة رسم السنة الأولى كنتِ بتدرسي كل شي عن الفن طبعاً الرسم التصوير الgraphic تهشير الطباعة النحت كل أنواع الرسم وبعدين من السنة الثانية بتختصي بالاختصاص اللي أنت بدك ياه كنت بحب طبعاً النحت لأنه بابا نحات لكني ما اختصيت نحت بحب الرسم أكتر فاختصيت بالرسم والتصوير وأنا عم أدرس قدمت بعد البكالوريا بسموها بهداك الوقت وكاله بالتدريس بيعطوكي متل صفوف بتدرسي فين إذا كانت معلمة أخدة إجازة إذا كان منطقة بعيدة ما فيها معلمات فكان بهداك الوقت كتير سهل أنه تفوتي وتدرسي بعد ما تجمعي بتصور 300 يوم أو 400 يوم تدريس بتصيري معلمة كامله بالأول بتكوني بسموها معلمة بالوكالة وبعدين بتصير معلمة كاملة 

نسرين وراء رغبة أسمهان بالتدريس بالتوازي مع دراستها للفنون كان في شخصية نسوية ثائرة حاسه إنه عندها رسالة بالحياة لنصرة المرأة ومساعدتها على التعليم والتمكين منشان هيك اختارت مدارس ريف دمشق للانطلاق بالمهنة النبيلة لتوعية البنات والشباب بأهمية العلم والفن 

أسمهان كان عندي دائماً حقوق المرأة وحقوق الطفلات بحز بقلبي بدي أعمل شي دائماً بدي أعمل شو بدي خلي البنت تتعلم فمشان هيك أنا قدمت على الريف يعني أنا ما كان بدي بقلب دمشق بدي ريف دمشق ورحت ودرست بريف دمشق وساهمت بإنه افتتحوا الإعداديات بريف دمشق وأولهم كانوا بالغوطة الشرقية بمنطقة اسمها حزة سقبا حمورية عين ترما عين منين تل منين دوما حرستا وقت أنا كنت درس ابتدائي البنت بتوصل لصف السادس وشاطرة بكونوا البنات شاطرين بتجي لعندي عم تبكي شبك حبيبتي بتقلي مشان الله رسبيني بالصف ما تنجحيني لك يا حبيبتي ليش تقلي لأنه بس أنجح بدن يطالعوني أهلي من المدرسه وبتجوز طالعوا بعدين فعلياً قانون جديد بسوريا ممنوع مطالعة البنات من المدرسة التعليم كان إلزامي ومجاني بالابتدائي وصار إلزامي ومجاني بالإعدادي والثانوي هذا على زمني وأنا شايفته كل الطلاب بهداك الوقت فينا نقول بال76 77 78 هدول طلابي يعني اللي هلق صاروا أجداد والبنات صاروا مو بس تيتات أمهات التيتات هلق الحقيقة رح قلك تجربه معي أنه أنا وقت كنت درس إعدادي بعين ترما وبسقبا كان مدير المدرسة يقلي نجحيهن وبس مشين لأنه نحنا منعمل مادة الرسم ما بين رياضيات وفيزياء هي راحة شوفي عدم الاهتمام حتى مدير المدرسة تعالقت أنا وياه وتركت المدرسة وقلتله شوف مادة الرياضيات عليها عشرين مادة الفيزياء عشرين كل المواد عليهم عشرين بتعرفي بالإعدادي ومادة الرسم عليها عشرين أنا بدي أعطين وبدي نبهن وبدي علمن هي مهمتي بالحياة بتعرفي 60 طالب كان عندي 60 بهداك الوقت والصف ال60 طالب يلي بدقون وشوارب وأنا عمري 19 سنه وما مهتمين أصلاً بالرسم أنه شو الرسم يعني فأنا لأمسكن وشدن ليتعلموا الرسم كنت ألجأ لمواد مثل منسميها المنظور يعني يلي إله علاقة بالرياضيات بعطين أنه كيف نرسم غرفة بالعمق الداخلي كيف نرسم كرسي بأبعاده الثلاثية فكانوا يتفاجأوا أنه هيك بالرسم أنت بتعطينا لأنه كانوا دائماً كيف بيجي أستاذ الرسم بقلن ارسمولي رحلة ارسمولي الطبيعة ارسموا شجرة أو بيت مشان أمسكهم وخليهوم يحسوا أنه هي مادة مثلها مثل أي مادة تانية وبترسب إذا ما بترسم وبنجحك إذا رسمت منيح 

نسرين أسمهان شخصية متمردة لأبعد حد ومن هي وصغيرة بتجاهر بآرائها المخالفة للعادات والتقاليد ومن أبرز هالآراء وقوفها بعناد ضد فكرة الزواج لكن لما القدر بيقول كلمته وبيجي النصيب وببلش القلب يدق بيستسلموا العشاق حتى أسمهان بتكن وبتقبل وكانت الإمارات العربية المتحدة هي الوجهة والسبب 

أسمهان بعد أن تخرجت من كلية الفنون وقعت بالحب كان في قانون بسوريا للشباب بتعرفي بروحوا عالجيش مباشرةً أنه وقت بيتخرجوا من أي جامعة ويكونوا من الخمسة المتفوقين الأوائل هدول بس بيحقلن يطلعوا للإمارات فقط للإمارات الexتبعي كان من الخمسة المتفوقين فلذلك راح للإمارات وبعدين تزوجنا منشان يقدر يبعتلي أني أنا زوجته لم شمل يعني  

أسمهان الشارقة كانت لساها صحراء بالثمانينات ما كان فيها إلا شي بنايتين وsupermarket واحد عشت بالشارقة واشتغلت طبعاً بالصحافة ومحمد غباش عمل مجلة سماها الأزمنة العربية مجلة الأزمنة العربية هي نوعاً ما سياسية كان فيها أبواب المجلة من بين الأبواب فيها متل كتابة شعر بكتابة الشعر فرضنا أنت بتاخدي الفكرة عن الشعر وبترسمي رسمه يلي هي منسميها illustration بالأبيض وأسود كمان كنت أعمل caricature كنت من أوائل النساء العربيات يلي بشتغل caricature سياسي بهداك الوقت بعمل بعض الأغلفة بعد سنة أو سنتين فيني قول إجى قرار بتوقيفه وقت إجى القرار كيف بدن يعملوا بدن يكملوا المجلة قام هنن إجوا للندن وجابونا معن وإلا ما كنا مفكرين بلندن 

نسرين فينا نعتبر السيدة أسمهان الكرجوسلي خبيرة بمجال الصحافة في لندن بل وشاهدة على عصر ازدهاره بزمن كانت فيه لندن بكل معنى الكلمة مربط خيل الصحافة العربية الباحثة عن مكان آمن لحرية الرأي والتعبير والمكان اللي حصلت فيه العائلة على اللجوء الإنساني واكتشفت فيه أسمهان بذاتها آفاق جديدة خلتها توقع بهوى المدينة 

أسمهان بهداك الوقت كانت لندن هي مركز الثقافة العربية هي المركز يلي صاروا يجوا العالم من وين ما كان منشان الحرية حرية الصحافة إذا فينا نقول إجا الشاعر الإماراتي اسمه حبيب الصايغ توفى من فترة فتح مجلة ثقافية اسمها أوراق واشتغلنا بالمجلة كملنا شغل بالمجلة بعدين لظروف ما ما بعرف شو سكروها وكان في أول صحيفة عربية تصدر بلندن اسمها العرب صحيفة العرب يلي هي صاحبها كان الحاج محمد الصالحين الهوني هي أول صحيفة قبل الشرق الأوسط حتى في لندن فكان في الشرق الأوسط وفي العرب الصحيفة لا زالت لحد الآن موجودة اشتغلنا فيها فترة كبيرة كنت أنا مسؤولة عن صفحة الأسرة المرأة وبكتب عمود يومي تحت اسم همسة وبرسم caricature يومي هلق أنا وقت اللي إجيت على لندن جابونا بشكل قانوني أنه نحنا مع الشركة لكن حتى مع هذا كان لازم بشكل انفرادي تقدمي للhome office إنه بدك تاخذ بقى إقامة خاصة لأنه المجلة سكرت فيما بعد فكان لازم نقدم كيف بدنا نقدم بدك تقدمي إما لجوء فرضنا بسموه إنساني أو لجوء سياسي فقدمنا وقتها أتصور أنه لجوء إنساني أنا بحب لندن كتير أنا لقيت نفسي في لندن أنا كل يوم بشكر الحكومة والدنيا إنه أنا موجودة في لندن أنا بسوريا كنت واجدة نفسي يعني ما إني من عيلة مقموعة أبداً بالعكس لكن مع هالشي أنا في لندن أنا إنسانه أنا عندي كرامه أنا إنسانة كاملة يعني بعمل يلي أنا بدي ياه بفكر متل ما بدي واشتغلت بالتدريس وعلمت الأجانب حتى اللغة العربية وشغلي بالصحافة كونلي شخصيتي أكتر وجدت نفسي 

نسرين تواجد العديد من وسائل الإعلام العربية بهداك الوقت بلندن فتح أمام أسمهان الكرجوسلي أبواب الإذاعة والتليفزيون وما بين الBBC والMBC قضت سنوات طويلة تشتغل بعالم الmedia وسخرت كل اهتماماتها الفنية للعمل في برامج الفن والأطفال والمساهمة في تأسيس القنوات الجديدة 

أسمهان 1987 هيك شي حطوا إعلان راديو الBBC عن إنه بدن يعملوا برنامج شبابي بما أني صحافية قدمت أنا للإعلان كانوا بدن شباب جداد صغار لأنه بتعرفي راديو الBBC كان هو هيئة الإذاعة البريطانية اللي بقلك هنا لندن دن دن دن ساعة Big Ben وقت فكروا أنن يغيروا نوعية البرامج ويحطوا برنامج شبابي موجه إلى الشباب العرب الموجودين هون ناخذ شو مشاكلن شو عم بعانوا كيف عايشين قدمت لإله ونجحت وبلشنا نداوم على Bush House كان هذا البرنامج اسمه برنامج شباب على هوى المديرة تبعنا هي الست سلوى الجراح يلي هي معلمتي وأنا كتير ببعتلها رسالة شكر وبحبها وبحترمها هي المخرجة يعني تبع البرنامج وكان من بيناتنا نحنا ال8 شباب كان في سام فرح ودينا عرب صرت شغلتي إني أنا أحمل هالمايك والراديو وروح دقدق بيوت العالم وشوف مين بحب يحكي يحكي عن متل بتعرفي مشاكل الشباب العربي أنه وقت بيجوا بلاقوا نفسهم عايشين لحالون بصير انقسامات وصراعات نفسية بين الأهل المتشددين وأبناءهم يلي عم يفوتوا على مدرسة إنجليزية فبضل الأب خايف على بنته وهي من المشاكل اللي كنا نشوفها إنه بيترك ابنه معلش هدا ولد والبنت بيروح هو بجيبها وبياخدها من المدرسة للبيت ومن البيت للمدرسة بقلب البيت عادات وقيم الإسلامية وبرة البيت بقلب المدرسة هية إنسانة تانية فكان في مشاكل كتيرة بعانوا منها الشباب بحمل هالمسجله والمايك وبروح بسجل ومنساوي مواضيع عن المخدرات مواضيع عن الtaboo يلي من تحت السجادة شو بصير أشياء لا تقال ولا ينحكى فيها مواضيع شائكة أنا تركت بعد سنتين كانت فتحت الMBC حطوا إعلان قدمت للإعلان فأخذوني بما أني أنا كنت already بشتغل بالراديو كنت فأول ما فتحت الMBC هون بلندن كانت أول محطة تلفزيونية عربية شافوا اهتماماتي بالرسم بالألعاب بالأطفال كتير أهتم بالأطفال كنت كنت أكتب قصص للأطفال وقت كنت مع صحيفة العرب عندي الصفحة تبعت الأسرة وبالمقابل في كان مجلة أطفال اسمها سعاد وسندباد هي المجلة كان فيها comicهيه قصص فأنا برسم القصص وبكتبها وبلونها وكل شي أنا بساوي بالمجلة بصباح الخير يا عرب أنا كنت من الطاقم يلي منسق المواد كان في يوم الخميس مختص بالمرأة وبالطفل أكثر من الأيام التانية فأنا كنت مسؤولة متل بيوم المرأة بروح بعمل مقابلات مع نساء عربيات عاملين شي بالبلد وكنت كمان باهتماماتي للأطفال عملولي برنامج أطفال كنت أول وحدة عملت برنامج أطفال بالمحطات هيه العربية فاسمه صباح الخير يا أطفال وكان في عندي كمان برنامج كمان للأطفال اسمه ضحك ولعب وجد وفن أنا طبعاً سميته وأنا يلي ساويته وكنت قدم برنامج فني يلي هو لوحة وفنان بروح بقابل فنانين تشكيليين إلهم علاقة بالعرب أو هنن عرب يعني حتى إنجليز اهتماماتهم عربية كتير كنت نشيطة على جميع الأصعدة بعد 10 سنوات الMBC سكرت راحت انتقلت طلبوني روح معن للإمارات بسبب أنه أولادي صغار كانوا ماقدرت بس بعد 4 سنين رجعت رحت لأنه ضلوا يقولولي تعالي تعالي فرحت وصرت مسؤولة عن الpromotion لقناة الأطفال يلي هي MBC3وكنت أعمل بعض الشغلات اللي بتنحط على الشاشة ما كملت السنة ورجعت كان فتحت محطة الBBC راح تفتح اتصلوا فيني فكنت أنا من مؤسسين تلفزيون الBBC العربي اشتغلت فيه قبل ما يفتح التلفزيون بكذا شهر صممنا وكملنا وعملت كنت أنا مسؤولة عن قسم الpromotion في التلفزيون 

نسرين السؤال اللي بيطرح نفسه إنه خلال سنوات العمل الإعلامي معقول تكون أسمهان نسيت شغفها التشكيلي معقول تكون كبرت ونضجت وبطلت تحب الألعاب 

أسمهان خلال وقتي كله وأنا عم أشتغل إن كان الMBC صحافة كذا الألعاب موجودة دائماً كنت عم أعمل الألعاب وكنت أسست شركة سميتها Ornina Dalls أنا وقت أول ما إجيت للبلد لهون مشيت بالطريق بتعرفي الواحد بده يتعرف عالبلد شفت واجهات المحلات يللي عليها هدول ألعاب الceramics مثل ما بيقولوا وقعت بحبهن لك حبيتن حبيتن فأنا والex تبعي عملنا course كانوا حاطين وقتها تعليم كيف بتعملي اللعبة الceramics وبما أنه نحنا دارسين نحت كمان فكان سهل علينا عملنا الcourse وجبنا فرن وجبنا كل الأدوات يلي لازم نعمل منه وبلشنا بbusiness يلي هو أنه نبيع ألعاب ceramics بفترات مثل يلي ما فيها شغل يلي سكر شغل يلي كذا نعمل الألعاب وقت تعلمنا نحنا الألعاب تعلمنا كيفية صنع الألعاب الceramics يلي هي على الطريقة القديمة اليدوية كيف كانوا يشتغلوها من 200 سنة شغل معقد مانه شغل سهل بتساوي قالب للعبة قديمة وبتجيبي القالب من الجبصين بتعبي بقلبه ceramics والceramics هو مادة طرية بعدين بدها تنشف بدك تحطيها بالفرن متل وقت بتعملي صحون خزفية بتشويها بتصير قاسية بترجعي بتلونيها بتحطيها بالفرن مرة تانية ليثبت اللون عليها وبتطالعيها من الفرن بتركبها على بعضها بتحطيلها الشعر بتساوي العيون التم الأسنان كل شي باللعبة بخيط الجسم بإيدي بحط الشعر بجيب بيروكات كبيرة وبساوي صغيرة يعني أنا بساوي اللعبة من البداية من الصفر للنهاية الفرق بينها وبين الجديد هلق أنه الجديد بينعمل بالمعامل يعني بينعمل فيه قوالب جاهزة بتفوت تحت المصنع بتعبوا الرجلين بيتعبوا الإيدين بساووا يعني العملية اللي تاخذ مني أنا أيام اللعبة الوحدة بتكلفني ب20£ وب40£ على حسب بدك تحطي الكهرباء بدك تحطي المصاريف يعني بتكلفني وقت بتحطيها بالسوق للبيع بتحطيها فرضنا ب100£ أو ب80£ بتشوفي جنبك محل تاني حاطط اللعب يلي هلق هي بتشوفيها لعبة إلها stand حلوة مثلها من نفس القوالب عاملينا ببيعها ب15£ معها علبة كل الناس ما بيعرفوا شو الفرق بين handmade وهي مو handmade شو فارقة معي يعني أنا بدي أشتري لعبة لبنتي بس مين اللي بيهتم الإنجليزي الcollector يلي هو بجمع لعب يلي بيعرف اللعبة أنه وقت بتقليله هي handmade شغل يد بقوم بقدرها وبحسها أنه رخيصة ما بحسها غالية 

نسرين وهيك صار فن صناعة دمى السيراميك يتمكن من أسمهان وصار همها تبحث عن الراغبين باقتناء هالنوع من الألعاب غالية الثمن وبالتأكيد جامعي التحف الإنجليز بتلاقيهم بالمزادات 

أسمهان بالمزادات بتشتري أي شي قديم بتعرفيه وله قيمه بصير فدرست عن الألعاب القديمه وهلق صرت مثل أنا بعرف اللعبة القديمه قدي عمرها ومن أيمتا صارت وقديش بتسوى إذا كانت في منها ما في منها قديش ندارتها وطبعاً كان في ناس بيهتموا بالألعاب القديمة الantique أنا بما أني بشتغل ألعاب وفنانة وهيك فصار يجوا لعندي لرمملن اللعبة القديمه فبتشتري أنت لعبة قديمة مشققة مكسور شقفة من وشها مكسور من إيدها يعني مانها بحاله جيدة فإذا بدك أنا قولها مثل ما بلغتي أنه مانها بحالة صحية جيدة مريضة فبيجيبولي ياها وأنا برجع برممها من أول وجديد أو أنا بطببها بعطيها أدوية بترجع بتشفى بتصير بحالتها الصحية الكاملة بيرجعوا هن بياخدوها ببيعوها بمزادات لأنه كلما كانت اللعبة أو الدمية بحالة صحية أفضل كلما ما بتنباع بمبالغ أعلى فأهم لعبة بالantique بعالم الantique هي اللعبة الفرنسية وقت بتلاقي لعبة فرنسية طبعاً أنا كيف بعرف اللعبه أنه بعرفها من الlogo والشعار يلي بيكون مطبوع على ظهرها مثل بعطيك مثال فرضنا إذا اشتريتي خاتم فضة بتلاقي بقلبه فيه مطبوع دمغة كمان اللعبة القديمة عليها دمغة برقبتها هي الدمغة بتدل على أي سنه انعملت وشو اسمها والشركة اللي ساوتها فأهم بالعالم هي اللعبة الفرنسية يلي هي بتنباع ب30 ألف و40 ألف وأكثر من حق سيارة 

نسرين جينات الفن عم تغلي غلي بهالعيلة طلع ابنها الكبير للسيدة أسمهان هو الفنان العالمي Peter Qassim واحد من أشهر مبدعي شخصيات الأبعاد الثلاثية شفتوا شغله بأفلام متل The Hunger Games وPlanet Of Apes وThe Jungle Book وAvatar ورغم أني حرقت المعلومة خلونا نسمع كيف بتحكي أسمهان بكل فخر عن أولادها 

أسمهان عندي 3 شباب الكبير فيهم هو كمان فنان تشكيلي وله اسم هلق بيشتغل 3D بصمم الشخصيات الكارتونية يعني بيشتغل لDisney وبيشتغل لشركات عالمية إذا شفتي فيلم Planet Of Apes البطل تبعه اللي هو سيزر الmonkey الكبير هذا القرد هو اللي شاغل Animation رسم شاغل مع Avatar ما بدي أحكي كثير عنه لكن كتير كتير فخورة فيه بيشتغل بالVR هلق بيعملوا الألعاب تبعيت الgames يلي بتروح على الiPhone الأصغر منه الروح الفنية تبعه أنه بيهتم بالantique بيهتم بالgames القديمين بيهتم بالcomics كثير عنده الcomics بشكل يعني فظيع أصغر واحد هو أستاذ بمدرسة كمان تأثر مني بحب التدريس وبيشتغل بتايلاند 

نسرين وبعد ما كبروا الولاد وانتهى الزواج استمر ل25 سنة وتركت أسمهان آخر عمل إلها بالإعلام في إذاعة الBBC صار عندها كل الوقت لتتفرغ للدمى وتعمل عدة مشاريع في آن واحد وترجع تدرس وتلحق شغف جديد 

أسمهان عملت مستشفى للدمى بيتي Dall Hospital بجيبولي الcollectors يلي هن مجمعين الألعاب القديمة الantique بصححلن ياها برممهاا بساويها وبطببهم بعطين دواء بحبون وما في حدا غيري عنده مستشفى للعرائس عم أعمل هلق ألعاب مثل مانك شايفة عم لبسن theme العربي تحت عنوان سحر الشرق بأزياء الشرق وعم أعمل معارض كل فترة وفترة بحط بعمل معرض وبحط فيه متل تقريباً 10 ألعاب كلياتهم فيهم مثل ما شايفة عندك بياع العرقسوس الشامي ملبسته اللبس والأزياء تبع الشام القديمة عندك الرجال الخليجي عندك المرأة الخليجية وبعمل طبعاً الأزياء أنا وبصمم هالشغلات وعملت لعبة كمان عن الكورونا اللبس تبعها هو من الmasks بحاول دائماً إني أتواصل مع العصر فهلق متفرغة لإلهم ومتفرغة كمان أني عم أدرس دبلوم بالأزياء فبدي كون هلق مصممة أزياء بعد فترة 

نسرين أسمهان نسيت تحكيلي عالتسجيل إنها حاصلة على جائزة أفضل فنانة سيراميك عربية بعام 2021 عن دميتها اللي بتحمل عنوان الراقص المولوي لكنها حكتلي عن زخم نشاط بفترة الكورونا اتجه لصناعة أفلام كرتونية قصيرة على يوتيوب منها حكاية دمية من الزمان 

 أصوات تدور حولها صخب وعويل وبكاء أطفال أفاقت من سباتها العميق لتجد نفسها بيد طفلة خائفة لتجد نفسها بين أناس يبكون ويصيحون 

أسمهان عملت قصة عن لعبة قديمة هلق بفرجيك إياها خليتها هي البنت فاقت من الزمن القديم هي antique عمرها 200 سنه فاقت قامت لاقت حالها بمخيم من مخيمات اللاجئين السوريين وهي لعبه عم تحكيلنا مشاهداتها 

أفاقت لتجد نفسها في مخيمٍ يعج بالأطفال لتجد نفسها بفستانٍ ممزق وطاقيةٍ تغطي شعرها المنفوش ومعطفٍ صوفيٍ أسود عتيق حافية لاحذاء برجليها المتعبتين وجلدها المتشقق 

أسمهان اللعبة هي وقت شافت حالها بين أطفال عم يعيطوا وأطفال عم يبكوا أصوات طلعت صارت تطلع أنه أنا وين أنا كيف إجيت لهون صارت تتذكر أيامها أنه وقت كانت بالعصر من 200 سنه كان في عندها بنت بتحبها اسمها أوليفيا البنت كانت تحملها وعايشة هيك ببيت كبير كيف هي وصلت لهالمكان كيف عم تسمع الأولاد يعني قصة حطيت هيك أحاسيسي فيها خلال فترة الكورونا 

تذكرت أنها كانت دمية أوليفيا المفضلة أوليفيا الطفلة ذات ال10 أعوام ابنة العائلة الأرستقراطية الثرية التي كانت تعيش في قصر في ضواحي مدينة باريس القديمة 

نسرين طلبت من الفنانة أسمهان الكرجوسلي تختملي حلقة اليوم بنصيحة تقدمها للاجئين العرب من خبرتها في العيش والعمل والاندماج في لندن وكمان من خبرتها كشخص بارع في فتح الأبواب وخلق الفرص يستحق بكل جدارة لقب اللاجئ المدير The Refugee Boss 

أسمهان شوفي أول شغله أنا بحب قول لكل مين بيجي لهون إن كان فنان ولا مو فنان أول شي يحترم الآخر لازم أحترم عاداتهم وتقاليدهم وأكلهم ودنيتهم مو أحمل ضيعتي معي وجيبها معي وأقعد عيش هون بنزاع نفسي يعني هلق المشكله كبيره عويصة عم بيصير في تقوقع العربي بده يطبق عاداته وأكله ولبسه وكل شي على أولاده طيب أنت بدك تبعت أولادك للمدرسة بالمدرسة في عالم ثاني وهذا يللي خلاني أنا أنجح بحياتي لأني أنا متقبلة للآخر وبحترمه