وليد عرفات: فنان الحلاقة المغامر صاحب الصوت الجميل

نص الحلقة :

وليد عرفات إذا بيمرق حدا بالطريق ما بسلم بدي أتخانق معه ليش ما بسلم بدي انجبر إني قاتل ناس أنا ما بدي أقتلهم هيك صار تفكيري تغيرت 100 درجة هلق رح يشوفوني الشرطة وعارف الدرس رح آكل قتله بخة spray ويطلعوني برة الميناء السبب الوحيد اللي خلاني أطلع لأنه  عليّ جيش وما بدي أخدم هذا الجيش بسبب الأوضاع بسوريا ناس ماتت معنا يحاولوا بدن يطلعوا يمسكوا أسلاك الكهرباء يموتوا بتذكر اثنين ماتوا من السودان قدام عيوننا

 

نسرين طرابلسي الصوت الحلو اللي عم تسمعوه لشب سوري اسمه وليد عرفات والحقيقة أنا ما عم بستضيف وليد كونه بغني لكن مشروع فان وليد المتنقل للحلاقة في لندن لفت نظر الصحافة وحرفة وبزنس الحلاقة الرجالية مجال قليل ما تتسلط عليه الأضواء وأثناء الحديث والحوار مع وليد اكتشفت بقصته دروس وعبر سيكولوجية وتربوية وإنسانية لا يمكن تلخيصها إلا بسماع الحكاية منه بالتفصيل لنعرف كيف تحول وليد الطفل المؤذي المتنمر مفرط الحركة والنشاط لوليد الشاب الناجح The Refugee Boss اللاجئ المدير تحول كبير لشاب صغير فركته الحياة بملح رحلة الموت وكويته تجربة اللجوء بنار الغربة ومع هيك قدر بكل شجاعة يغامر ويجابه ويوصل وينجح ورغم أنه من مواليد الكويت فضل يبدأ من درعا مكان النشأة وبداية القصة 

 

وليد عرفات وليد الصغير كان شقي كثير كنت بصراحة مجنن الحارة كلها خصوصاً أولاد أعمامي وأولاد الحارة الجيران كانوا على طول يشتكوا لأهلي كنت اتنمر عالناس وكنت خانق الناس بدون سبب كان يعني على سبيل المثال إذا بيمرق حدا بالطريق ما بسلم بدي أتخانق معه ليش ما بسلم نحنا أصلنا من درعا ضيعة اسمها ضيعة نوى الناس هيك شوية جداً بسيطين صوتنا عالي منصرخ كثير عشت بنوى لحتى صار عمري 8 سنين يوم من الأيام عملت شقاوة مع واحد ابن عمي كان بيتن بلزق بيتنا ماكان في عداوة بيننا أبداً أنا اللي عملت العداوة بيننا بدأت أنه أنا وياه دائماً منتخانق هو مو هو اللي يتخانق معي أنا أتخانق معه لأنني كنت شقي يمرق أحياناً ما يسلم يمرق أحياناً يتزورني ما يعجبني شكله ولهلق هو عايش وموجود بألمانيا بحبه والله من كل قلبي ابن عمي هو بس كنت دائماً أنا وياه نتخانق بس السبب الرئيسي ليش طلعنا من من درعا هو كان أنا بسبب شقاوتي أتخانق مع هاد أتخانق مع هاد لحتى وصلت لوين المواصيل 

 

نسرين طرابلسي من الواضح أنه وليد كان عنده متلازمة فرط الحركة والنشاط اللي بيتطلب كثير من المعرفة والوعي عند العائلة والمحيط للتعامل مع أصحابها وبعد ما فلت زمام الأمور من العائلة يا ترى شو كان دور المدرسة في العملية التربوية خاصةً أنه كان عمر وليد وقتها 8 سنين بسنة 2004 

 

وليد عرفات كان عندي نشاط وحيوية مو طبيعية يعني الطاقة التي كانت عندي وأنا صغير مو طبيعية ما أقعد كسر الدنيا بدقيقة وأركض بدقيقة كان العلاج بالنسبة لهم أنه الضرب يضربوني ما ينفع كل مرة يضربوني فيها أنا ولا كأنه صار أصلاً ولا كأنه انضربت بالأساس كنت أدرس أنا وأخي كنا سوى بنفس المدرسة خاف من الأستاذ الأساتذة يضربوني كتير يمكن هذا واحد من الأسباب يلي خلاني يمكن شقي كتير من ضرب الأساتذة ما كنت شاطر بالمدرسة ماكنت أصلاً مركز بالدراسة يعني روح عالمدرسة بس ما مركز بالدراسة مركز أكثر بالرفقة بالطلعات بالجيات بس بالمدرسة كدراسة كطالب كعلم ما كتير 

 

نسرين طرابلسي للابتعاد عن بيئة المشاكل لاقوا أهله أنه أفضل طريقة ياخذوا هالصبي ويهربوا عالشام واشتروا بيت بمنطقة مساكن الزاهرة شارع نسرين المنطقة اللي غالبية سكانها من الساحل السوري وهونيك بلش وليد يشوف حاله بعين تانيه عين المعجبين بصوته 

 

وليد عرفات  يعني وصلت على الشام قلت خلص هذا مكاني يوم من الأيام قاعد تحت بالحارة سمعت صوت حلو كثير كثير حدا عم يغني رحت لهنيك مع هي الجمعة اللي كانوا عم يغنوا استمتعت انبسطت كثير بالقعدة عم يغنوا أجوائهم بيشربوا متة هذا بيقله الله يعني جود ومدري شو أنا يعني أول مرة بيمرق  عليّ هيك انبسطت كثير هدول المقاطع كنت بدرعا بجوز شوفن بس على الفيديو هلق صرت شوفون حقيقة ناس عم تغني وهذا عم يصفق له انبسطت صرت يوم عن يوم كون بالحمام بالبيت مثلاً أجلك الله قاعد بالحمام غني جود صدى انبسط جود صاروا أحياناً رفقاتي سجلنا صوتك وأنت عم تغني أنا فكرن عم يضحكوا  عليّ بس بعد بفترة اكتشفت صوتي حلو يعني عندي صوت ما عندي هالطبقات بس عندي صوت حلو مثلاً يكون عندي حبيبة غنيلها موال كنت حب المجاملة من الناس أنه والله صوتك حلو حدا يمدح والله صوته انبسط هذا الشي يسعدني يوم على يوم صرت روح على جلسات جلسة محلية يعني بس هالناس اللي موجودين بهالحي فلان يضرب موال فلان يضرب موال وليد يتشجع أنا أتشجع كثير فوت أنا عالخط حتى لو أعرف عندي أخطاء وصوتي ما مثل صوتن بس عالقليلة حاول يوم على يوم صار صوتي يحلى أكثر وأكثر صار في تطور أكثر صارت الجمعة اللي فيها 20 يصير فيها 30 صار في ناس عم تسمع هالأصوات هاي صوت وليد صوت فلان صوت فلان صار في يعني تحدي صار في تحدي بالقعدات صرنا نشجع بعض هيك أنا اكتشفت أنه عندي موهبة غناء الناس صاروا كل يوم يتصلوا فيني تعال خلينا نسهر 

 

نسرين طرابلسي الولد الشقي طلع فنان بس للأسف ما توفرتله الفرصة ليصقل موهبته بالغناء فقيام الثورة السورية وبعدين حالة الحرب اللي عاشتها البلد وضعت أبناءها أمام خيارات صعبة كتير منهم اختاروا المغادرة حتى مايصيروا طرف بحرب ظالمه والمدهش أنه الشب الموسوم بالشقاوة والأذى كان من المسالمين وأسبابه كانت وجيهة ومفاجئة 

 

وليد عرفات السبب الوحيد اللي خلاني أطلع لأنه  عليّ جيش وما بدي أخدم هذا الجيش بسبب الأوضاع بسوريا بدي أنجبر أني قاتل ناس أنا ما بدي أقتلهم عرفتي  عليّ كيف ما بدي أقتل هي الناس لأنه بالنهاية هدول ناس يعني أنا لو أنه لنفترض سوريا بحرب مع دولة غير سوريا أي دولة تانية ما بطلع من سوريا بضل هنيك وحتى لو وصل يعني حتى لو النتيجة كانت هي موتي ما عندي أي مشكلة عادي بس إنه أنا روح وقاتل ناس يعني منا منا وفينا لأ هي بالنسبة إلي جريمة من وقت سافرت وتركت سوريا بالـ2015 طلعت من سوريا هون صار التغيير حسيت أنه صار في عندي مسؤولية أنا لازم أحملها مسؤولية حالي ما بقى في عندي أهل أنا إذا عملت مشكلة أهلي ما رح يجو يحلوها للمشكلة أنا إذا بدي خرجية بدي روح أشتغل لحتى طلع هي الخرجية هيك صار تفكيري تغيرت 100 درجة حتى حياتي تغيرت من ناحية المشاكل من ناحية الشقاوة يلي كانت عندي بطفولتي مو شي بعيد عني أني أعمل مشكلة بلبنان بس هذا كمان تغير صرت فكر مشاكل شلتها من راسي مر حدا يسلم ما يسلم إن شاء الله عمره أنا جاي لهون مشان أشتغل بس هذا الهدف الوحيد اللي أنا جاي منشانه على لبنان ولقيت شغل 18 ساعة شغل بمطعم جرسون يعني وعلى اللبناني كان بعملة لبنان 30 ألف يعني فيكي تقولي كنت أشتغل 18 ساعة مشان 15£ العيشة بلبنان كمان مانها عيشة فكرت أنه لقيت أفضل حل أنه هو يمكن السفر دور على حياة أفضل طبعاً أنا وقت ودعت أهلي بسوريا ماكنت مودعهن وداع أنه أنا وخلص ما عاد بدي شوفكم أنا عأساس رايح على لبنان وبدي أرجع بعد شهر شهر ونص برجعلكم 

 

نسرين طرابلسي صعوبة العمل بلبنان للسوريين كانت دافع جديد للمغادرة صار وليد يبعد أكتر عن البيت ويكبر وينضج عالطريق ومن ميناء طرابلس لمرسين وصل على تركيا وهنيك صار يقول لحاله وينك يا بابا لتساعدني وتحميني تعالوا نسمع كيف تصرف وليد لما صار وحيد 

 

وليد عرفات أول مرة بحياتي بشوف باخرة عمري 17 سنة أول مرة بسافر برة سوريا نزلت بمرسين ما بعرف أي شي كل شي كان غريب  عليّ ما حدا بيحكي عربي هلق أنا كان الشيء الوحيد اللي بدي ياه بدي خط تلفون خبر أبي أني وصلت شو بدي أعمل بدي أسأله شو بدي أعمل ما بعرف لقيت شب هيك صغير اشقر مبين أجنبي قلتله بتحكي عربي قال أي بحكي عربي طلع حلبي عبالي خط حكيت مع والدي قلتله أنا وصلت لهون شو بدي أعمل رفيقه قاعد بمرسين بسكن شبابي الله لا يورجيك الله يذكرهم بالخير حتى الحيوانات ما بتقبل تقعد فيه لهذا المكان فتت عالغرفة نايمين فيها 12 واحد لا المطبخ مطبخ ولا الحمام حمام وأنا وين طالع من بيت عز قعدت كذا يوم عندهم للشباب هون لحتى تعرفت على شباب تانيين هونيك كمان طالعين على ألمانيا بس لحتى توصلي على ألمانيا لازم أول شي تطلعي على اليونان صرنا ندور على مهربين على الأرخص والأضمن بنفس الوقت وكلياته بتركيا هنيك أكذب من بعضه يعني يقلك مضمونة بـ800$ 900$ مضمونة كأنه عم يقلك بدي شيلك وحطك باليونان ما كأنه عم يجيب سيرة أنه بدكم تطلعوا ببحر بدكم تطلعوا 100 شخص بالقارب ما يجيبلك السيرة هي كلها 

 

نسرين طرابلسي كل مرة بسمع عن رحلات اللاجئين بالبحر بتأثر الحكايات ما بتتشابه إلا بخط السير بس المعاناة والخوف وتفاوت قدرة الناس على التحمل والتذكر بتعمل من كل قصة نسخة مختلفة وليد بيتذكر أدق التفاصيل وحكى لي على 3 محاولات للوصول إلى اليونان 

 

وليد عرفات ما مشي البلم لسا شغلة ربع ساعة عشرين دقيقة في عليه وزن كثير غرقنا طبعاً غرق العائلات كانوا لهم الأولوية بالسترات كانوا عاطينن سترات نجاة وهيك واحد من الشباب اللي معنا بالبلم كان معاه لاسلكي فيه بيتواصل مع المهرب تواصلوا مع خفر السواحل التركي لحتى إجى بعد ما ضلينا بالبحر نص ساعة أخدونا عالسجن أسمائنا كذا من وين طلعتوا طلعونا من السجن طلعنا المحاولة التانية كانت وش الصبح بعد ما وصلنا لنص المي حسينا على البلم بلش ينفس طبعاً الواقع غير الحكي الواقع مؤلم وبخوف ومرعب أنه أنت تطلعي حواليك بس بحر بالمرة التانية كان معانا سترات نجاة كلياتنا من عدا تلاتة مننا شلحت سترة النجاة عطيتها لوحدة أفغانية قبل ما نوصل بلش البلم ينفس كمان غرقنا حتى إجى الخفر التركي رجع أخدنا مرة تانية وأخدونا بعنف مو مثل أول مرة يعني بلطافة أول مرة كانوا لطيفين أخدونا كمان عالمخفر نفس الموضوع تالت محاولة رب العالمين يسرها محمل حمل زيادة البلم وهذا كان أكبر الأسباب ليش عم يغرق البلم ما بتصدق عينك بنص البحر البكي الناس تبكي يعني صعب صعب يعني أنت قاعدة عالبلم هيك والمي عم تفوت عليك ومعنا كم سطل كلما تفوت المي نجرفها ونكبها برة لأنه إذا بده يضل يعبي مي رح يغرق نجرف المي نعبيها وهذا كلياته صعب موقف صعب ناس راكبة عبعضها وناس عم تشيل مي أنا كنت منهم ما عم نطلع حوالينا أنه هالبحر قديشه كبير وقديشه مرعب مركزين عالمي اللي بالبلم نشيلها ونكبها مشان ما نغرق باقي الناس تطلع حواليها تدوخ من الخوف وصلنا عاليونان قبل ما نوصل عالشط يعني نص العالم من الفرحة نطت وخلص كفت سباحة لأنه وصلنا والناس كلها تبكي مبسوطين كأنهم وصلوا عالجنة 

 

نسرين طرابلسي رحلة الوصول من اليونان لألمانيا كانت عجيبة فيها كل الأهوال اللي بتخطر على بال إنسان وبكل بلد من بلدان الطريق بتمشي أنت وخوفك وبينهش قلبك الرعب من متطرفين وكلاب بوليسية ومهربين وتجار وقوانين الهجرة أنت لاجئ ما أذيت حدا بس حاسس أنه كل العالم ضدك وما بفيدك شي غير عنادك وقوة قلبك وإصرارك إنك ما تبصم بأي نقطة حدودية إلا بالبلد يللي بتختار بإرادة حرة إنك تكون لاجئ فيه ولا تنسى دور يد القدر والقسمة والنصيب والمقدر والمكتوب 

 

وليد عرفات نزلنا بألمانيا الشباب استسلموا قال خلص بدنا نقعد بألمانيا ما بدنا نكفي عفرنسا يعني اللي صار فينا كافي وزيادة خلص ما عاد فينا بسمع من الناس أنه بريطانيا بيحكوا إنجليزي فرص عمل أكتر معاملتن أحسن فبعد ما وصلنا على ألمانيا وفتنا على الكامب أنا وأصدقائي صرنا يعني نقعد مع بعضنا نفكر نكفي ما نكفي شو نعمل نبصم بألمانيا نحكي تلفونات مع الناس اللي بفرنسا شو الوضع ما يبشرونا خير يقلولنا الوضع صعب جداً ونضل نفكر بنفس الوقت ألمانيا صعبة كيف صعبة الناس اللي موجودة فيها يقلولنا اللغة صعبة أوراقهم صعبة معاملتهم مو كويسة وهذا الشي يخلينا نغير رأينا كان عندي صديق بعرفه من زمان كتير بدرعا عايش هو بألمانيا قبلي قبل ما أنا أوصل كان هو هنيك قبل بـ3 4 سنين قلي برفقاتك يعني أنا ما بعرف بس إذا بدك أنت خلص خليك هو أنت عندي قالوا الشباب خلص نحنا بدنا نطلع ما رح نبصم طلعوا ودعتهم وراحوا حكيت معهم وصلتوا إي نعم وصلنا كيف الوضع قالوا لي والله أنت وحظك ناس بتفوت بالشاحنات ناس ما بتفوت ناس صرلها سنة ناس صرلها يوم أنت وحظك وأنا كل يوم أسأله لرفيقي والله ماني مقتنع بألمانيا ماني مقتنع تاني يوم الصبح رحت أنا وياه على المكان اللي بيبصموا فيه يعني بس بصمتي أنت ما عاد في داعي تروحي عبريطانيا رح يرجعوكي عألمانيا بس بصمتي خالص قررت أبصم رحت أول يوم استنينا من ال7 الصبح لل11 الصبح على الدور بس وصلت عالشباك بدي أبصم قالوا لي سكرنا هي التيكيت تعال بكرة مشان تبصم أول واحد بنفس الليلة بنفس اليوم يلي أنا كنت على أساس بدي أبصم فيه بالليلة هي حكيت مع رفقاتي قلتلون أنا بدي إيجي عفرنسا قالوا لي شو غير رأيك قلتلن أنا ما بدي أندم بعدين قول أنا بصمت بألمانيا وليش ما جربت أني روح عفرنسا بلكي الله يسرلي على بريطانيا ما بتعرفوا قلي هلق رحنا نبصم شو غير رأيك قلتله ما بحب أندم على شي خليني على الأقل حاول ما ظبطت هالمحاولة برجع ما تضل تحكي معي تقلي ضل بألمانيا تعال احجزلي تيكيت بتكون خدمتني خدمة العمر إجى معي حجزلي التيكيت ظبطلي أموري ودعني ومشيت وقفتنا الشرطة الألمانية بوقفوا اللاجئين اللي طالعين على فرنسا بوقفوهن وبيأخذون بالسيارة وبرجعون عالكامب بالليل الساعة 2 بالليل طلعت الشرطة عالباص صارت تشوف الجوازات شافوني لاجئ نزلوا لتحت عسيارة الشرطة مو لجوا بس برة شي 10 أشخاص كانوا هي الشغلات يعملوها كحاجز طيار أحياناً وأنت وحظك وقت نزلوني بتعرفي عتمة الدنيا 2 بالليل المكان اللي وقفونا ياه ما فيه ضوء أصلاً أبداً فتلت أنا هيك بقى هدول الناس هيك فتلت من الجنب التاني ورا الباص صرت حملوهن للناس بالسيارة والوقت اللي عم يحملوا الناس فيه فتلت من عند شوفير هيك شوي ورجعت وطلعت من قدام الباص وركبت بالباص رجعت ركبت بمحلي سكروا باب الباص وكفوا على فرنسا وصلت على كاليه ما كان عندي إنترنت ال4 أشخاص يلي كانوا معي ماني قادر أتواصل معاهم رحت بدي آكل عند مطعم تركي وأنا بدي فوت على المطعم لقيتهم جوا عم ياكلوا ال4 أشخاص سلمت عليهم بوستن كيف عرفت أننا هون قلتلهم والله صدفة قال أهلا وسهلا فيك بكرا رح تندم لأنك إجيت قلتلوا ما عليه شي خليني عالقليلة قول عن حالي أني حاولت 

 

نسرين طرابلسي حكالي وليد أنه رغم الإصرار والتحدي اللي كان يظهره قدام رفقاته كان في مقابيله لحظات إحباط وحزن وخوف وبكاء مرير تخليه يندم ويقول لحاله أنا شو كان بدي بهالصرعة لكن كل مرة كان ينجح بعبور حاجز ويتخطى حدود الخطر تزيد ثقته بنفسه ويندفع لاجتياز الحاجز اللي بعده وسألته كم مرة حاول يتخطى أسوأ نقطة عبور بأوروبا المعبر الحدودي بين بريطانيا وفرنسا كاليه 

 

وليد عرفات حاولت ما بينعدوا كنت قاعد 7 شهور أحياناً يكون عنا مخططين أنه نطلع على الparking يلي بصفوا فيه هدول فيه الشاحنات اللي بيطلعوا عبريطانيا والمشي على هذا الparking أحياناً بكون 3 ساعات 4 ساعات وتخيلي الصعوبة أنه يعني نروح ونقعد ليالي بغابات ننام ليالي حتى نركز على شاحنة معينة نطلع فيها نركب فيها يسوق فينا على كاليه وبكاليه يرجعوا يمسكونا كان معاهم بخاخ بيعمي العيون بيعمي العيون لمدة 10 دقائق ربع ساعة ما بتشوفي شي نفوت عالمينا لجوا الكلاب تشم ريحتنا تطلعنا أو على السكان لما بدن يعملوا سكان تبين أنه في بشر بهذه الشاحنة قبل ما ننزل من الشاحنة يقولولنا come come يضلوا يقولوا come ووقت نجي بس نقرب عليهم يبخوا هذا على عيوننا أحياناً ما يظبط الباص معنا الشاحنة نحاول عالقطار لأنه في قطارات وفي مينا نحاول عالقطار ناس ماتت معنا يحاولوا بدن يطلعوا يمسكوا أسلاك الكهرباء يموتوا بتذكر اثنين ماتو من السودان قدام عيوننا 

 

نسرين طرابلسي خاب أمل وليد من كاليه و لقى أنه لا جدوى من المحاولة فقرر يهرب على بلجيكا بالtrain ويتخبى بالحمام لما يجي مفتش التذاكر ورغم سذاجة الخطة نجحت بس ليش بده يطلع على بلجيكا وشو هي الخطة البديلة اللي وضعها ليوصل لكاليه من جديد ويعبر إلى المملكة المتحدة 

 

وليد عرفات سمعنا عن ناس عم تفوت على بريطانيا بالباصات كيف أنه الناس عم تركب مكان ما أنت تحطي شناتيكي الsuitcase بتحطيهم بالpackage الناس عم تتخبى هنيك نحن هيك سمعنا ما صدقنا أنه معقول عم يتخبوا هالساعات كلهم بهذا المكان اللي بيخنق حتى يوصلوا مجانين هدول مو معقولة رحت في الساعة عشرة وربع الصبح على النقطة يللي بيطلعوا منها الركاب من بلجيكا على لندن ووقفت مع الركاب لبست جاكيت مرتبة حتى ما بين أني لاجئ أنا راكب الشوفير نزل مثل عادته مثل ما أنا يعني حاسبها نزل مثل عادته راح يخلص أوراق هو فتل ضهره وهن الناس عم بعبوا شناتيهم دحشت حالي بين الشناتي فتت بالدقيقة اللي أنا معيرلها سكر البواب تبع الشناتي سكر الباص حكى شوي عالmike وبعدين اتحرك مشي ساعة ونص ساعتين يمكن ما عاد أتذكر وصل على كاليه كمان حكى على الmike اللي فهمته أنه راح يفتحوا الأبواب وينزلوا الشناتي يعني أنا هون قلت اتبهدلت هلق رح يشوفوني الشرطة وعارف الدرس رح آكل قتلة بخة spray ويطلعوني برة المينا ما كذبوا خبر والله فتحوا نزلوا الشناتي كل واحد أخد شنته وهنن عم ياخذوا شناتيهم نزلت أنا شافوني أشرتلهم بإيدي أنه ما تحكوا وبالفعل ما حكوا أي شي نزلت ووقفت معاهم إجت الشرطة وعم تدور علاجئين متلنا الشرطة ما انتبهوا أنه أنا لاجئ معي شنتة فاكريني راكب أنا من خوفي ما فتت بدن يفوتوا على مثل الهجرة والجوازات بختموا فيها يفتشولن الشنتة على القشاط ويطلعون على الطرف التاني من الباص أنه خلص تفتشوا هدول أنا خفت فوت على هجرة والجوازات شو بدي فوت أعمل معي جواز سوري فضليت واقف برة إجت شرطية وقالتلي أنه أنت ما فيك اتضل موقف هون أنا فهمت عليها ما بعرف أحكي أن ok خلص شكراً فهمت فتت لجوا ضليت طبيعي ملامح وشي طبيعية ما مبين  عليّ خوف أبداً مرتاح كثير قلق ما في أبداً موقف متلي مثل باقي هالناس على دور فأنا صار قدامي شخص واحد لحتى أوصل على الشباك اللي بختمه الجوازات شخص واحد بس قدامي يعني إذا مشي هذا الشخص خلص بلاقوني قبل ما هذا الشخص اللي قدامي يخلص تختيم خطفت رجلي اليسار على الخط يللي مخلصين في تختيم بس عم يستنوا شناتيهم خطفت رجلي شي بسيط بس فخلص اللي قدامي تختيم اللي وراي قرب الضابط ما انتبه أنه هذا كان هون عالخط وطلع ما انتبه لأنه ملتهي بالتختيم أنا كمان استغربت أنه معقول ما شافني أني أنا خطفت رجلي لهون تبع الشناتي ما له علاقة بالتختيم له علاقة بس تفتيش ما بشيك جوازك عطيته الشنتة فتشوها مرقت عالطرف التاني قالولي معك مصاري قلتلهم معي 100 € بس بس ما سألوني عن الجواز ولا شي فاكريني مختم لفيت سيجارة بدي مشان ركز أكثر ما يبين  عليّ توتر قعدت دخن أتلفت يمين وشمال شوف كيف بدي أرجع أركب بالباص هلق والشرطة معبية الدنيا صار كل زبون من الركاب يللي بالباص اللي أنا فيه كل يجي أتطلع فيه سلم عليه أحمله الشنتة وحطها بالpackage جوا بنفس الوقت عم سوي مكان بالشناتي مكان مشان أتخبى أنا فيه سكرت يعني أنه خلص ما عاد تسع شناتي سكرتها الشوفير ملتهي بالأوراق الزبائن عم يعطوه الشناتي وعم يطلعوا لفوق ما حدا منتبه  عليّ شو عم بشتغل فتلت عالطرف التاني تبع الباص شباك حكومي بس مسكر يعني ما فيه حدا قلت خلص هدا مكاني فتحت الجنب التاني اللي ما حبين عالناس ركبت وسكرت على حالي ركبت ما في 10 دقايق تحرك طلع عالباخرة وقف عيرتله ساعة إلا خمس دقايق نزل عرفت أنه أنا وصلت على بريطانيا أنا عارف حالي أني وصلت تسطحت هيك بالباص طبعاً عرقت كثير بس مبسوط كثير مبسوط بينزل شب بلجيكي على الأغلب من الباص هو عم يحكي وأنا عم بفهم عليه من الإشارات عم يدق على ظهري وعم يقلي يعني أنت good وترجملي عالتلفون قلي كنت عم بتفرج عليك وقت من أول ما طلعت صار يحكيني كلام أنت اللي عملته كتير منيح بطولي صرت أبكي كتير بكيت فرحت بعد 7 شهور أني جوعان أبيل فكتوريا أنا لحد هلق بعرفه للمطعم أخدني وطلبلي معكرونة أكلتها من الجوع جوعان بس بدي آكل خبرت أهلي وأنا عم ببكي إني وصلت كلن فرحوا وصاروا يبكوا والدتي الله يرحمها أخواتي أبي كله فرح إني وصلت اللي كان يوصل يعني الله بحبه ما سألني أنت من وين كل الطريق وهو عم يقلي you're hero يعني هيك كان يترجم you're hero يعني يقلي أنا كنت عم بتفرج عليك من بلجيكا اللي عملته أنت يعني أنت مجنون ويضحك يطلع فيني ويضحك يكتبلي عالمترجم أنا بحياتي ما مر  عليّ هيك حتى كتبلي قلي شافني بالهجرة والجوازات شو عم بعمل قال بس تركتك قال بدي شوف وين بدك توصل قال وصلت وحضني مع أنه الأجانب ما بيحضنوا بس حضني كان شخص يعني طيب عنجد اشترى لي شاحن قلتله بدي روح على الpolice هلق أنا هون لازم روح عالpolice سلم حالي كونن الpolice بريطانيا ما بيطردوك برا بريطانيا واجبن أنه يعني يؤمنولك حقوقك خلص هون بيفرزوك على بيت بعملوا الإجراءات اللازمة 

 

نسرين طرابلسي هلق ما بيكفي توصل على مخفر الشرطة المهم تقدر تشرحلن حالتك وطلبك ووليد ما كان بيحكي ولا كلمة إنكليزي وما في حل التفاهم مع الشرطي غير عبر برنامج الترجمة بس للأسف كان الموبايل خالص شحنه 

 

وليد عرفات قلتله Syria وفرجيته الجواز ما فهم شو يعني Syria ما فهم يعني أنت شو عامل دق اسمي ما لاقى شي قلي حكى بالإنجليزي أنه ما في شي أنا بدي فهمه أنه أنا لاجئ خذوني كلبشوني يعني خذوني طيب قلي ما في شي وطردني برا فكرني بجوز سكران أو مجنون مرقت سيارة شرطة عيطت عيطت ما وقف خفف شوي ركضت وضربتها من ورا للسيارة ضربتها بكل ما عندي من قوة ضربتها وقفوا قمت صرت عيط انفعلت كتير أنا عارف القوانين بأوروبا أنه ما بيضربوا الواحد مو مثل سوريا ما بيضربوا حدا عيط قد ما بدك عبر عن شعورك عبر عن رأيك كانوا كثير حبابين هو كان عم يقلي نوعاً ما أنه calm down خلص calm down أنه relax اشرحلي شو صاير قلتله تركيا قلي إي قلتله اليونان قلي إي ok قلتله كرواتيا مقدونيا صرت أشرحله يعني حاول أشرحله بطريقتي مقدونيا Germany اوستريا كاليه قام بعدين هو قلي الكلمة قلي refugee قلي ok ok ok فهم كلبشني انبسطت انا بس كلبشني خلص بدن ياخذوني يعني وأنا قاعد بالسيارة ومبسوط مين بينبسط أخدينه عالسجن أنا مبسوط 

 

نسرين طرابلسي لما وصل وليد على بلد اللجوء كان في رحلة تانية عم تستنى رحلة البحث عن عمل واضطر وليد يشتغل ويتنقل من مكان لمكان قبل ما يبدى بممارسة المهنة أو المصلحة اللي تحقق ذاته وتؤمن له الدخل المنتظم والأمان المعيشي 

 

وليد عرفات صديق من أصدقائي كان عنده محل الحلاقة بسورية كنت قضي كل وقتي عنده هنيك كان عندي فكرة عن الحلاقة مو إنه ما كنت أعرف كنت أعرف أحلق بس ما كتير بعد ما استلمت الإقامة هون ببريطانيا وصرت أسعى أني دور على الشغل كنت متأكد أني ما رح لاقي شغل حلاقة كوني ما بحكي لغة ولسا جديد عالبلد فصرت دور على أي شغل بطلع مصاري ما مهم شو الشغل واحد من أصدقائنا دلني على مطعم قلي أنه عم يدوروا على ناس بتشتغل رحت لعندهم وبالفعل اشتغلت عندهم مدة 6 شهور بس ما كنت مبسوط أبداً طلعت على شغل تاني شركة مواد غذائية يعطونا كتير مصاري قليلة ويشغلونا ساعات أطول انتقلت من شركة المواد الغذائية على شركة شحن كنت اشتغل 5 أيام من التنين للجمعة فقررت أنه بالسبت والأحد أحسن ماني قاعد روح دور عشي محل الحلاقة مرن حالي من أول وجديد بلكي بلاقيلي شي مصلحة ثابته طور من شغلي وأعمل مصاري أحسن يعني واحد من السبت والأحد اللي كنت معطل في يوم نزلت وصرت أسأل محلات الحلاقة إذا أنا ناقصهم شغيل كنت أشتغل عند الحلاق من 9 الصبح لـ9 المساء أخذ 30 £ سبت وأحد وأيام الأسبوع أشتغل بالشركة للشحن بس ما كانت هاميتني المصاري كان همي أني أتعلم المصلحة قررت أني دور على محل الحلاقة كوني صرت أحكي إنجليزي وصرت معلم بالحلاقة أني دور على شي أحسن وفيه مصاري أحسن وشغال وبالفعل لقيت محل أحسن واشتغلت فيه لمدة 3 سنين إجا lockdown قعدت بالبيت أسبوع ما تحملت القعدة اختنقت كثير كوني ماني متعود عأني أقعد بالبيت أبداً كان عندي شوي من رفقاتي بعد ما صرت أحلقلهم بالبيوت شفت أنه أنا عم طلع مصاري أحسن من محل الحلال اللي أنا كنت فيه بس شو المشكلة أنه أنت بدك تروحي لعندهم بالسيارة 

 

نسرين طرابلسي جائحة كورونا كانت نقطة مفصلية بحياة كثير من الناس فما قبل كورونا لا يشبه أبداً ما بعدها سواء بالأثر السلبي أو الإيجابي بعالم الأعمال ومن الناس اللي نقشت معهم وعرفوا يستغلوا الوضع ويجمعوا مصاري وليد عرفات 

 

وليد عرفات اشتريت فان وصممت الفان كصالون حلاقة من جوا إذا أي حدا بيبحث على Youtube حلاق متنقل في لندن رح يلاقي الفيديو هونيك وصرت أنشر الحلاقات اللي بحلقها على المواقع اللي أنا سويتهم اشتغلت هي الشغلة على الفان تقريباً سنة و7 شهور سنة و8 شهور وكان كتير الشغل الحمد لله منيح يعني وأنا كنت عارف مو أنه ما كنت أعرف شغلة الفان ما رح تشتغل لمدة طويلة بس بفترة الlockdown وبالفعل الحمدلله اشتغلت وعملت مصاري منيح فيها الحمد لله وهلق بعد ما رجعت فتحت محلات الحلاقة كل مين صار يروح عالحلاق اللي قريب على بيته اشتغلت بمحل حلاقة هلق ثابت وعم فكر يعني إن شاء الله هلق بهالفترة أفتح محل حلاقة ثابت لإلي أنا ومع الأيام إن شاء الله رح بفتح بجوز محل ثاني وثالث وأسس وطور من حالي أكثر يعني أكيد المحل راحة أكثر مساحة أكبر الناس خلاص الناس اللي بتجي على هذا المحل إذا عجبتها الخدمات اللي أنت عم تعطيها إياها رح تضل تجي يمكن لبعد 20 سنة على هذا المحل راحة نفسية أكثر وراحة الزبائن كمان المعدات والحلاقة هي 40% من من شغل الحلاقين 60% التانية هي كيف أنت تعاملك مع الزبون ما مهم كثير عنده الحلاقة بس المهم عنده أنه يرتاحله للحلاق ارتاح لطريقة كلامه لصدقه معاه يعني ارتاحله كتير أنا بالنسبة إلي كزبون إذا حبيت معاملته معي أكيد ما رح غيره منحكي قصص حلوة أنا وياه ما بحسسه أنه أنا جاي أحلقله آخذ مصاري وأمشي كأنه أنا جاي رفيقه لعنده جايين منشرب شي يعني أنا زبائني وقت كنا نقعد بالفان ما بس نقعد نحلق ونمشي لأ نسمع أغاني نحكي قصص طبعاً ما كل الناس عندها وقت بس أنا عم أحكيلك إذا الواحد بده يربي زبون هي الطريقة كثير بتساعد بيصير يحب أنه يحلق بس عندي 

 

نسرين طرابلسي نجاح وليد وتركيبته إيجابية المندفعة باتجاه أهدافه فادته بالعمل وساعدته يتعلم اللغة الإنجليزية بفترة قياسية رغم أنه ما كان بيعرف منا ولا كلمة 

 

وليد عرفات بأول محل حلاقة اشتغلت فيه الناس فادوني كتير اللي بيشتغلوا فيه ما حدا بيحكي فيهم عربي وهذا الشي ساعدني كثير أني أتعلم لغة وقت اشتغلت بمحل الحلاقة التاني هذا المحل الحلاقة التاني كان كله إنجليز واشتغلت عندهم 3 سنين قويت لغتي كثير كتير منيح رحت على college لمدة أسبوعين وبعدين فصلوني لأنه دوامي بالcollege كان من ال7 ل 9 المسا وأنا خلص شغل يا6 يا 7 دائماً روح متأخر تأخرت 3 مرات فصلوني من الcollege لهيك قررت أنه خلص أتعلم اللغة لحالي مع الناس والحمد لله تعلمت لدرجة أو لمستوى أنه أنا ما بعتاز أي حدا تحت أي ظرف كان لا سمح الله عندي شي مع المشفى عندي شي مع الشرطة عندي شي مع المحاكم لا سمح الله بخلص حالي بكل شي بدون مساعدة أي إنسان الإنسان دائماً وقت بده يتعلم لغة أو أي شي بالحياة مصلحة لا يستسلم ولا يخجل ويحاول لأنه لما تحاول أنت وتفشل الفشل هي علامة من علامات النجاح أي حلم بالحياة يمكن بيوم من الأيام أنه يصير حقيقة صدقيني بيوم من الأيام رح يتحقق حلمك وأكثر مما أنت تصورتيه إذا بيكون عندك الإصرار ولا تستسلم بأي شي بصير بحياتك 

 

نسرين طرابلسي بحق لوليد يفتخر بنفسه وبإنجازاته خاصةً بعد ما لم شمل عائلته كلها من سوريا وحمل مسؤوليتها ومن طوشة الطفل الشقي ولد إنسان مغامر صنع منه طريق السفر الصعب قصة نجاح بخاتمة سعيدة عنوانها إرادة التغيير بطلها وليد عرفات The Refugee Boss 

 

وليد عرفات  تغيرت كثير فيك تقولي يعني 100 درجة عن الصبي الشقي اللي كان وليد يمثله وقت كان صغير المعاناة اللي عانيتها بطريق السفر علمتني قيمة الأشياء يلي ماكنت أحسبلها وأنا صغير والتغيير هذا صار بسبب شقاوتي وأنا صغير أعطتني القوة أعطتني قوة قلب أني جازف وخاطر بأشياء بالعمر اللي أنا مريت فيه بالسفر والسفر هو بذات نفسه كمان علمني أنه أنا لازم أي شي بدي أعمله أحسب فكر لحتى أصل لهدف لحلم أصل لنتيجة أنا بدي ياها كثير مبسوط أنني مرقت بهي المرحلة الشاقة بعمري سوتني بالفعل زلمة علمتني كيف أحمل مسؤولية كون قد حالي علمتني أشياء لو بضل بسورية عايش لسا 60 سنة ماكنت بتعلمها الأشياء اللي صارت معي على الطريق بتصير بس أثناء السفر أثناء شق هذا الطريق من بلد فيها حرب لبلد آمنة